Read Plautdietsch (Low German) – De Bibel Galata 5 Bible Online

Galata 5 - Plautdietsch (Low German) – De Bibel bible

Galata 5

¹Dan blieft nu en dee Frieheit, wuatoo Christus ons veholpen haft, un lot junt nich wada een Sklowenjoch opplajen!

²Ekj, Paulus, saj junt: Wan jie junt beschnieden loten, dan halpt junt Christus nuscht.

³Ekj saj noch eemol to eenem jiedren, dee sikj beschnieden lat, daut hee dan schuldich es daut Jesaz gaunz to hoolen.

⁴Wan jie derch daut Jesaz wellen jerajcht woaren, dan hab jie junt von Christus loosjemoakt un sent von de Jnod aufjefollen.

⁵Onse Hopninj es, daut wie derch dän Heiljen Jeist un derch Gloowen ver Gott jerajcht woaren.

⁶Bie Christus Jesus talt daut nich een bät, auf wie beschnäden sent ooda nich. Hee velangt Gloowen, dee derch Leew toom väaschien kjemt.

⁷Jie wieren aul soo fein opp däm Wajch. Wäa haft junt oppjehoolen, daut jie nich mea no de Woarheit horchen?

⁸Doa haft dee junt nich too berät, dee junt beroopen haft.

⁹Daut nemt bloos een kjlienet bät Häw derch dän gaunzen Dieech to gonen.

¹⁰Wiels wie em Harn eent sent, hab ekj noch daut vetruen en junt, daut jie nich woaren eene aundre Jesennunk aunnämen, un daut Gott dän strofen woat, dee junt vewerren deit, eendoont wäa daut es.

¹¹Leewe Breeda, wan ekj noch prädijd, daut Menschen sikj musten beschnieden loten, wuarom wudd ekj dan Vefoljunk lieden? Dan brukt doch sikj kjeena aun Christus sien Kjriez steeten.

¹²Ekj wensch daut dee, dee junt trublen, sikj selfst schnieden wudden un junt tofräd loten!

¹³Breeda, junt haft Christus to Frieheit veholpen. Bloos brukt dee Frieheit nich, daut Fleesch dän Wellen to loten. Deent eena dän aundren en Leew.

¹⁴Wiels daut gaunze Jesaz es met een Wuat toopjefot: “Du saust dienen Noba jrod soo goot sennen aus die selfst.”

¹⁵Wan jie junt oba unjarenaunda bieten un derchholen, seet doa no, daut jie junt nich unjarenaunda en de Grunt brinjen.

¹⁶Ekj saj junt soo: Waundelt em Jeist, dan woa jie daut nich doonen, wuano daut Fleesch jelesten deit.

¹⁷Wiels daut Fleesch velangt jrod daut, waut de Jeist nich well, un de Jeist well daut, waut daut Fleesch nich well. Dee beid sent sikj emma jäajenäwa, daut jie nich doonen, waut jie doonen muchten.

¹⁸Wan jie junt vom Heiljen Jeist rejieren loten, haft daut Jesaz junt nuscht mea to sajen.

¹⁹Waut daut Fleesch fa Woakjen haft es kloa: doa es Ehebruch, Huararie, Onreinheit, onbandjet Läwen,

²⁰Aufjettarie, Zaubarie, Fientschoft, Striet, Habsucht, Wutt, nosikj sennen, Zank, Spoolarie,

²¹Aufgonst, Mort, [3] supen, un fräten un soowaut mea. Ekj hab junt daut aul eemol jesajcht, oba ekj saj daut noch eemol: Dee, dee soowaut doonen woaren en Gott sien Rikj nich nenkomen.

²²Dän Jeist siene Frucht es Leew, Freid, Fräd, Jedult, Frintlichkjeit, gootjesonnen sennen, Gloowen, Jelindichkjeit un Selfstbeharschunk.

²³Jäajen soone es daut Jesaz nich.

²⁴Dee, dee Christus Jesus aunjehieren, haben daut Fleesch met Lost un Liedenschoften toop jekjriezicht.

²⁵Wan wie em Jeist läwen, dan well wie uk em Jeist waundlen.

²⁶Dan bruck wie nich no Iea un aunseenen sieekjen, wuaderch Aufgonst un Oaja kjemt.