Read Plautdietsch (Low German) – De Bibel Galata 6 Bible Online

Galata 6 - Plautdietsch (Low German) – De Bibel bible

Galata 6

¹Breeda, wan jie emol wäm doabie trafen, daut hee sikj vesindicht, dan sell jie, dee jie jeistlich sent, däm frintlich un leeftolich trajchthalpen, un paust opp fa die selfst, daut du nich uk vesocht woascht.

²Halpt eena däm aundren siene Laust droagen un doaderch doonen, waut Christus sien Jesaz velangt.

³Wiels, wan irjentwäa denkjt, daut et met am waut es, wan daut doch nuscht es, dee schmäat sikj selfst aun.

⁴Lot eenem jiedren sien ieejnet Woakj unjasieekjen, un seenen, auf hee doa waut finjt sikj to lowen, un sikj nich aun sienen Noba mäten.

⁵Wiels een jiedra woat siene ieejne Laust droagen motten.

⁶Wäa met däm Wuat unjarecht woat, saul däm aulahaunt goodet tookomen loten, dee am unjarechten deit.

⁷Ert junt nich! Gott lat sikj nich spotten. Waut een Mensch seit, woat hee uk arnten.

⁸Wäa doa seit sien Fleesch to jefaulen, woat von däm Fleesch vedoawen arnten. Wäa oba seit dän Jeist to jefaulen, woat vom Jeist daut eewje Läwen arnten.

⁹Well wie nich meed woaren goodet to doonen, wiels wan wie nich mootloos woaren, woa wie arnten, wan daut ieescht Tiet doatoo es.

¹⁰Doawäajen sull wie, soo foaken aus wie Jeläajenheit haben, aun aule Menschen goodet doonen, un besondasch aun dee, dee met ons toop em Gloowen stonen.

¹¹Kjikjt emol, waut ekj fa groote Latren moak, wan ekj met miene ieejne Haunt schriew!

¹²Dee junt doatoo bedwinjen wellen, daut jie junt sellen beschnieden loten, doonen daut om bie de Menschen goot aunjeseenen to woaren, om nich met Christus sien Kjriez vefolcht to woaren.

¹³Dee, dee sikj beschnieden loten, hoolen selfst nich daut Jesaz. See velangen de Beschniedunk von junt doawäajen, daut see sikj enbillen kjennen, daut see junt soo wiet jekjräajen haben, daut jie junt beschnieden leeten.

¹⁴Von mie saul kjeena hieren, daut ekj mie met irjent sestwaut groot doo, aus met däm Harn Jesus Christus sien Kjriez, wuaderch [4] de Welt fa mie jekjriezicht es, un ekj fa de Welt.

¹⁵Bie Jesus Christus helt sikj daut jlikj, auf beschnäden ooda onbeschnäden. Bie am talt bloos eene niee Kjreatua.

¹⁶Un Fräd un Jnod äwa aule, dee sikj aun dise Räajel hoolen, soogoa äwa Gott sien Israel.

¹⁷Wan mie dan nu uk wiedahan kjeena mea Trubbel moaken wudd, wiels mien Kjarpa haft aul Noawen, om Jesus sient haulwen!

¹⁸Mucht Jesus Christus ons Har siene Jnod met junem Jeist sennen, leewe Breeda! Amen.