Read Plautdietsch (Low German) – De Bibel Efeesa 2 Bible Online

Efeesa 2 - Plautdietsch (Low German) – De Bibel bible

Efeesa 2

¹Jie wieren en june Sinden jeistlich doot, aus jie noch soo läwden aus dise Welt daut velangd,

²un de onsechtboare Macht, dee äwa dise Welt harscht, unjadon wieren, dän Jeist, dee en dee wirkjt, dee Gott nich jehorchen.

³Wie läwden to eene Tiet uk aula soo aus ons Fleesch daut velangd un wuatoo onse Lost ons dreef, un wieren von Natua ut Kjinja unja Gott sienen Oaja, soo aus aule aundre.

⁴Oba Gott es soo rikj aun Jnod, un hee es ons soo goot en siene Leew,

⁵daut hee ons met Christus toop wada toom Läwen brocht, wan wie uk doot en onse Sinden wieren. Derch Jnod woa wie seelich.

⁶Gott haft ons met Christus Jesus toop oppjewakjt un met am toop eenen Plauz em Himmel jejäft,

⁷daut hee en de tookjinftje Tieden ons en Christus Jesus bewiesen kunn, woo vetraflich rikj hee aun Jnod es, un woo sea goot hee ons es.

⁸Jie sent derch Gott siene Jnod jerat, wiels jie jleewen. Daut es nich derch june Woakjen. Daut es een Jeschenkj von Gott.

⁹Daut es nich ut Woakjen, soo daut kjeena Uasoak haft sikj selfst to lowen.

¹⁰Doaderch, daut wie met Christus Jesus vebungen sent, haft Gott ons niejeschaufen un en eenen Staunt vesat, daut wie goodet doonen kjennen. Nu sell wie uk doano läwen.

¹¹Vejät nich, jie wieren von Natua ut aus Nichjuden jebuaren. Un jie worden von dee, dee derch Menschenhaunt beschnäden sent, de onbeschnädne jenant.

¹²Jie wieren don onen Christus, un aun Gott sien Volkj wia jie framd. Un waut Gott aun Israel vemoakt un toojesajcht haud, jinkj junt nuscht aun. Jie hauden nuscht to hopen un wieren onen Gott en dise Welt.

¹³Oba nu es daut aundasch; nu sent jie Christen. Jie wieren wiet auf, oba nu sent jie derch Christus Jesus sien Bloot gaunz noaun jebrocht.

¹⁴Christus es ons Fräd. Hee haft von dee beid Gruppen eene jemoakt un de Waunt doljebroaken, dee ons tranen deed.

¹⁵Christus haft en sienem Fleesch daut Jesaz un de Väaschreften ut däm Wajch jebrocht, daut hee en sikj selfst kunn von dee twee eenen nieen Mensch schaufen, un doaderch Fräd schaufen,

¹⁶daut hee ons beid derch daut Kjriez en eenem Kjarpa met Gott toopbrocht, un doaderch met de Fientschoft een Enj muak.

¹⁷Un hee kjeem un prädijd de Fräd to beid, to junt, dee wiet auf wieren un uk to dee, dee dicht bie wieren.

¹⁸Derch Jesus hab wie aule beid derch eenen Jeist dän Wajch no däm Voda.

¹⁹Dan sent jie nu nich mea framde Waundra, oba Metbirja met de Heilje un Jlieda en Gott siene Famielje,

²⁰dee opp de Apostel un Profeeten äaren Grunt jebut es wuaraun Jesus Christus selfst de rajchta Akjsteen es,

²¹derch dän de gaunza Bu toophelt un waust, soo daut et fa onsen Harn eenen heiljen Tempel jeft.

²²En däm sent uk jie nenjebut, soo daut Gott em Jeist eene Woninj haft.