Read Plautdietsch (Low German) – De Bibel Efeesa 3 Bible Online

Efeesa 3 - Plautdietsch (Low German) – De Bibel bible

Efeesa 3

¹Dit es de Uasoak wuarom ekj, Paulus, Christus Jesus sien faustjenomna, om junt Velkja äat haulwen ensetten mott.

²Jie motten secha von daut Aumt jehieet haben, daut Gott siene Jnod mie jeschonken haft, un daut ekj aun junt uteewen saul,

³un daut Gott mie sien Jeheemnis openboat haft, soo aus ekj junt kort jeschräwen hab.

⁴Dit saj ekj om junt daut kloa to moaken, woo ekj daut Jeheemnis von Christus vesto.

⁵Dit wia de Menschenkjinja en frieejre Tieden nich soo kloa jesajcht, aus siene heilje Apostel un Profeeten daut nu derch dän Jeist haben.

⁶Daut es dit: Daut de Velkja uk Metoawen un Jläda aun dän selwjen Kjarpa sent un Aundeel haben aun daut, waut en Christus Jesus derch daut Evangelium vesproaken es.

⁷Un fa dit Evangelium sto ekj em Deenst, doano, aus Gott mie derch siene Krauft Jnod jeschonken haft.

⁸Un wan ekj uk de jerinjsta von aule Heilje sie, mie es dise Jnod jeschonken worden, de Velkja daut Evangelium to prädjen, daut doa väl rikja es aus sikj irjentwäa denkjen kaun.

⁹Ekj saul aule Menschen met Gott sienen jeheemen Plon bekaunt moaken, dee von Eewichkjeit häa bie am wia, dee aules jeschaufen haft.

¹⁰En onse Tiet sellen aule Harschoften un Jewaulten en de Himmelswelten derch de Jemeent seenen, woo rikj Gott aun Weisheit es.

¹¹Dit wia soo aus Gott sikj daut von Eewichkjeit häa väajenomen haud un nu derch Christus Jesus onsen Harn utjefieet haft.

¹²En däm hab wie Moot un vetruen, em Gloowen no Gott to komen.

¹³Doawäajen ermon ekj junt nich mootloos to woaren, äwa waut ekj om junt haulwen lieden mott. Daut sull junt ieren.

¹⁴Dit es wuarom ekj ver onsen Gott un Voda kjneeen doo.

¹⁵Von am kjemt de Nomen Voda fa aule Famieljes em Himmel un oppe Ieed.

¹⁶Un ekj bäd fa junt, daut hee, doano aus hee rikj aun Harlichkjeit es, junt Krauft schenkjen mucht, derch sienen Jeist ennalich stoakj to sennen,

¹⁷daut Christus derch dän Gloowen bie junt em Hoat wonen mucht, un daut jie muchten en Leew faust jewartelt sennen.

¹⁸Ekj bäd uk daut jie met aule aundre Heilje toop muchten de Krauft kjanen lieren, wuaderch jie bejriepen kjennen, woo lank un breet, woo huach un deep Christus siene Leew es.

¹⁹Jie sellen Christus siene Leew kjanen lieren, un dee jeit väl wieda aus wie oppfoten ooda vestonen kjennen, soo daut jie vollens un gaunz haben muchten, waut Gott fa junt haft.

²⁰Däm, dee derch siene Krauft väl mea en ons doonen kaun, aus wie ons denkjen ooda vestonen kjennen,

²¹däm traft aule Iea en de Jemeent un en Christus Jesus derch aule Jennerazionen, en aule Eewichkjeit! Amen.