Read Plautdietsch (Low German) – De Bibel Efeesa 4 Bible Online

Efeesa 4 - Plautdietsch (Low German) – De Bibel bible

Efeesa 4

¹Aus eena, dee fa dän Harn em Jefenkjnis es, kroag ekj junt aun: Läft soo daut et doamet stemt, wuatoo Gott junt beroopen haft.

²Siet bescheiden, frintlich un jeduldich. Habt soo väl Leew, daut jie junt unjarenaunda vedroagen.

³Siet emma doano ut, de Eenichkjeit em Jeist to bewoaren, wuaderch jie met eenaunda vebungen bliewen.

⁴Daut jeft mau eenen Kjarpa un eenen Jeist, jrod soo aus jie aula derch een un deeselwje Hopninj, beroopen sent.

⁵Daut jeft uk mau eenen Harn, eenen Gloowen un eene Doop.

⁶Daut jeft mau eenen Gott un Voda fa ons aula: Hee steit äwa aule, schauft derch aule un läft en aule.

⁷Een jiedra von ons haft soo väl Jnod jekjräajen aus am von Christus jeschonken es.

⁸Doawäajen sajcht daut: “Aus hee nopp foaren deed, fieed hee faustjenomne wajch un jeef de Menschen Gowen.”

⁹Wan daut jesajcht es, hee es nopp jefoaren, waut meent daut sest, aus daut hee ieescht rauf jekomen es, bat doa, wua de Ieed ligjen deit?

¹⁰Hee, dee rauf kjeem, es dee, dee wada nopp foaren deed, wiet äwa aule Himmel, wiels hee sull met siene Macht un Harlichkjeit de gaunze Welt fellen.

¹¹Siene Gowen wieren dise: Daut hee eenje aus Apostel, eenje aus Profeeten, eenje aus Evangelisten, eenje aus Hoad un eenje aus Lierasch aunstalen deed.

¹²Dit deed hee om aul Gott siene Kjinja toom Christendeenst reedtomoaken, wuaderch Christus sien Kjarpa (daut es de Jemeent) jebut woat,

¹³bat wie aula to eene Eenichkjeit em Gloowen un Erkjantnis aun Gott sienen Sän komen, daut wie volstendje Menschen en Christus sent, soo wiet daut Christus bie ons eent un aules es.

¹⁴Wiels wie sellen nich lenja Kjinja sennen, dee sikj von veleidende Menschen äare Lieren aunschmäaren loten, un soo aus de Walen vom Wint han un häa jeschmäten woaren, derch äare Errlieren, wuamet see de Menschen veleiden.

¹⁵Wie motten en eenem leeftoljen Jeist de Woarheit vebreeden. Un wie motten en aules oppwaussen un Christus änlich woaren, dee ons Haupt es.

¹⁶Unja Christus siene Kontroll paussen aule Jläda aum Kjarpa toop un de gaunza Kjarpa woat derch paussende Jelenkja toopjehoolen. Un wan jieda Jlett deit, waut daut kaun, dan waust de Kjarpa un but en Leew opp.

¹⁷Waut ekj junt nu saj, es soo aus de Har daut haben well. Jie sellen nich mea soo läwen aus de Velkja, dee aun nuscht wieetvollet denkjen.

¹⁸Met äare Jedanken jriepen see em diestren rom un haben kjeenen Aundeel aun daut Läwen von Gott, wiels see von Gott nuscht weeten un em Hoat blint un vestokt sent.

¹⁹See sent stomp jeworden jäajen aules, waut äa ieejnet Jewessen an sajen kunn. See läwen huachhäa un loten sikj en oppscheiselje Sachen gonen, onen sikj to schämen.

²⁰Soowaut hab jie aun Christus nich jeseenen un uk nich von am jelieet.

²¹Daut es, wan jie äwahaupt waut von am jelieet haben. Wiels en Jesus hab wie de volle Woarheit.

²²Seet daut jie von däm oolen Mensch looskomen, dee junt soo läwen muak aus jie deeden, un dee sikj derch siene aunschmäarende Lost selfst en de Grunt brocht.

²³Jie sellen derch dän Jeist vom Grunt opp en Seel un Senn, niee Menschen woaren,

²⁴dee no Gott sienem Bilt en Jerajchtichkjeit un Heilichkjeit jeschaufen sent.

²⁵Hieet opp met lieejen un rät de Woarheit eena toom aundren, wiels jie sent aula Jläda aun eenaunda.

²⁶Wan jie junt oajren, dan sorcht soo, daut jie junt derch junen Oaja nich vesindjen, un veeenicht junt ea de Sonn unjajeit.

²⁷Jäft däm beesen Fient kjeene Jeläajenheit.

²⁸Wäa met stälen jeploacht es, saul doamet opphieren un oabeiden gonen un opprechtich met siene Henj sien Broot vedeenen, un soo väl, daut hee waut haft, dee to jäwen, dee nuscht haben.

²⁹Rät nuscht, waut dän näakjsten schoden kaun. Rät bloos daut, wuaderch dee jeholpen woaren, dee junt hieren.

³⁰Beleidicht Gott sienen Heiljen Jeist nich. Wiels de Jeist es Gott sien Tieekjen, daut hee ons ieejent, de Garantie, daut de Dach kjemt, daut wie hia rut jerat woaren.

³¹Woat nich mea betta un fuchtich äwa eenaunda un vezoajcht junt nich. Hieet opp to schrieen un to beleidjen. Lot von soowaut nuscht mea sennen.

³²Siet leewa von Hoaten leeftolich eena toom aundren. Vejäft junt unjarenaunda, soo aus Gott junt en Jesus Christus aules vejäft haft.