Read Plautdietsch (Low German) – De Bibel Efeesa 5 Bible Online

Efeesa 5 - Plautdietsch (Low German) – De Bibel bible

Efeesa 5

¹Aus Gott siene leewe Kjinja, sträft am emma änelja to woaren.

²Habt soone Leew eena toom aundren aus Christus to ons haud, un sien Läwen fa ons opfad aus eenen scheenen Jeroch aun däm Gott eenen Jefaulen haud.

³Oba soo aus daut heilje tookjemt, lot bie junt nich emol soo väl aus von Huararie, Orreinichkjeit ooda Jiez, de Räd sennen.

⁴Jie sellen nich schaundboare un noarenhauftje Räd haben, uk nich Dommheit driewen, dee junt nich aunsteit. Eeft junt leewa, dankboa to sennen.

⁵Wiels jie weeten sea goot: Wäa sikj met Huararie aufjeft ooda jiezich es, waut Jettadeenst es, soone Menschen haben kjeenen Aundeel aun Christus un aun Gott sien Rikj.

⁶Lot junt nich veleiden derch ladje Wieed; wiels jrod doawäajen kjemt Gott sien Oaja äwa dee Menschen, dee Gott nich jehorchen wellen.

⁷Habt nuscht met soone Menschen to doonen.

⁸Ieescht läwd jie uk em diestren, oba nu haft Gott en junt Licht oppdachen loten. Dan läft nu uk aus soone Kjinja, dee daut Licht haben.

⁹Daut Licht brinjt goodet, Jerajchtichkjeit un Woarheit verendach.

¹⁰Prooft daut to lieren un to doonen, waut däm Harn jefelt.

¹¹Un habt nuscht to doonen met onfruchtboare Woakjen, dee von em diestren komen; stalt dee leewa verendach.

¹²Daut es eene Schaund doavon to räden, waut em Jeheemen väajeit.

¹³Waut oba derch daut Licht opjedakjt woat, es to seenen; un aules waut to seenen es, es em Licht.

¹⁴Doawäajen es jesajcht: “Wakj opp, dee du schlapst, un sto opp vom Doot, dan woat Christus die Licht jäwen.”

¹⁵Siet väasechtich, daut jie derch dit Läwen gonen aus kluake Menschen un nich aus soone, dee nich weeten, waut to de Sach jehieet.

¹⁶Un nuzt de Tiet ut, wiels daut es eene schlajchte Tiet.

¹⁷Siet veninftich un finjt ut, waut de Har von junt velangt.

¹⁸Un bedrinkjt junt nich aun Wien, wuaderch jie de Kontroll äwa junt selfst velieren, oba woat voll vom Heiljen Jeist.

¹⁹Rät eena toom aundren met Psalmen un sinjen un jeistliche Leeda. Sinjt un spält em Hoat däm Harn to ieren.

²⁰Un dankt en aules emma Gott, dän Voda, fa aules en Jesus Christus onsen Harn sienen Nomen.

²¹Schekjt junt eena toom aundren ut Ieaforcht fa Christus.

²²Un jie Frues, siet june Mana soo unjadon, aus jie däm Harn sent.

²³Wiels de Maun steit äwa siene Fru, soo aus Christus äwa siene Jemeent steit, fa dee hee sikj selfst hanjeef äa Heilant to sennen.

²⁴Un soo aus de Jemeent Christus unjadon es, soo sellen de Frues en aules äare Mana unjadon sennen.

²⁵Mana, siet june Frues jrod soo goot, aus Christus siene Jemeent goot wia, un sikj selfst fa ar hanjäwen deed,

²⁶daut hee ar heiljen kunn, aus hee ar ieescht met däm Wuat soo aus met Wota, jewoschen haud,

²⁷daut dee en siene Uagen nich plakich ooda veknutscht, oba heilich un oschuldich wia.

²⁸Soo sellen uk de Mana äare Frues jrod soo goot sennen aus äaren ieejnen Kjarpa. Wäa siene Fru goot es, es sikj selfst goot.

²⁹Noch haft kjeena sien ieejnet Fleesch veschmäten. Een Mensch vesorcht un näat sienen Kjarpa, soo aus Christus daut fa siene Jemeent deit,

³⁰wiels wie Jläda aun sienem Kjarpa sent.

³¹“Dit es wuarom een Maun Voda un Mutta veloten woat, om met siene Fru toop to sennen, un dee twee woaren een Fleesch sennen.”

³²Dit es een grootet Jeheemnis, un ekj meen doamet Christus un siene Jemeent to schildren.

³³Oba aulemol, jie Mana sellen june Frues jrod soo goot sennen, aus junt selfst, un de Frues sellen soo sorjen, daut see äare Mana achten.