Read Plautdietsch (Low German) – De Bibel Filippa 2 Bible Online

Filippa 2 - Plautdietsch (Low German) – De Bibel bible

Filippa 2

¹Moakt bie junt eena dän aundren mootich en Christus? Treest jie junt leeftolich? Hab jie em Jeist Jemeenschoft? Sent jie junt von Hoaten goot, un kjenn jie metfeelen met dee waut lieden?

²Dan moakt mie soo rajcht froo, daut jie junt eenich woaren, junt aula jlikjen goot sent, junt goot vedroagen un no eenalei sträwen.

³Siet nich nosikj un ieajiezich, väl mea, acht dän Näakjsten hecha aus junt selfst.

⁴Jie sellen nich bloos no daut kjikjen, waut junt selfst intressieet, oba uk no daut, waut dän näakjsten intressieet.

⁵Siet unjarenaunda soo jesonnen, aus Christus Jesus selfst wia.

⁶Jesus wia von siene Natua häa Gott, oba daut sach hee nich soo aun, daut hee daut met Jewault faustholen must.

⁷Hee trock sikj daut “soo aus Gott sennen” ut, neem eene Jestault aun aus een Kjnajcht, un wort doaderch soo aus wie Menschen, jebuaren aus een Mensch.

⁸Deemootich muak hee sikj jerinj un wort jehuarsom batem Doot, jo, batem Doot aum Kjriez.

⁹Doawäajen haft Gott am uk huach jehowen un am eenen Nomen jejäft, dee äwa aule Nomes steit.

¹⁰Em Nomen von Jesus sellen sikj aule Kjneeen em Himmel un opp de Ieed un unja de Ieed bieejen.

¹¹Un aule Tungen sellen to Gott siene Iea bekjanen, daut Jesus Christus Har es.

¹²Soo, leewe Frind, aus ekj doa wia, jehorcht jie un deeden waut ekj säd. Doot nu uk soo wieda wua ekj nich doa sie. Schauft met ferchten un zetren, daut jie seelich woaren.

¹³Wiels Gott wirkjt en junt beides, daut wellen un daut foadich moaken, soo aus am daut jefelt.

¹⁴Doot aules onen brumsch to sennen un onen to twiewlen.

¹⁵Dan sent jie Gott siene reine un schultfriee Kjinja, aun dee nuscht uttosaten es. Schient aus Lichta mank eene vedorwne un vedreide Menschheit en dise Welt.

¹⁶Hoolt junt aun daut läwenbrinjende Wuat, daut ekj mie aun Christus sienen Dach freien kaun, daut ekj nich vejäfs jeoabeit un mie aunjestrenjt hab.

¹⁷Un wan mien Läwen uk sull jeopfat woaren äwa junen hanjäwenden Gloowensdeenst, wudd ekj doch froo sennen un mie met junt freien.

¹⁸Freit junt uk doatoo un freit junt met mie.

¹⁹Wan de Har Jesus daut soo well, räakjen ekj Timotäus boolt hantoschekjen, om to hieren, woo daut met junt steit. Daut woat mie fresch Moot jäwen.

²⁰Ekj hab sest kjeenem aus am, dee soo opprechtich om jun gootgonen besorcht es.

²¹De aundre sieekjen äaren ieejnen nutzen, un nich Jesus Christus siene Sach.

²²Oba jie weeten, woo Timotäus sikj hanjestalt haft, un woo hee aus een Sän met däm Voda met mie toop aum Evangelium jedeent haft.

²³Doawäajen räakjen ekj am hantoschekjen, soo schwind aus ekj weet, woo sikj daut met mie romnämen woat.

²⁴Un ekj hab daut vetruen em Harn, daut ekj selfst uk boolt hankomen woa.

²⁵Ekj sach daut uk fa needich aun, mienen Brooda Epafroditus no junt trigj to schekjen. Hee es mien Metoabeida un Metkjamfa, von junt jeschekjt toom mie halpen.

²⁶Hee haud een velangen no junt aula un wia besorcht, wiels jie jehieet hauden, daut hee krank jeworden wia.

²⁷Un hee wia werkjlich doodeskrank, oba Gott erboarmd sikj äwa am, un nich mau äwa am, oba uk äwa mie, daut ekj nich noch eenen Trua mea haud.

²⁸Doawäajen hab ekj am soo schwind trigj jeschekjt, daut jie am wada seenen un junt freien kunnen, un ekj weinja to sorjen haud.

²⁹Nämt am en Christus met Freid opp, un doot soone Menschen väl wieet achten.

³⁰Wäajen de Oabeit fa Christus wia hee meist jestorwen aus hee sien Läwen oppet Spell sad, om mie en june Städ to deenen.