Read Plautdietsch (Low German) – De Bibel Kolossa 1 Bible Online

Kolossa 1 - Plautdietsch (Low German) – De Bibel bible

Kolossa 1

¹Paulus, dee derch Gott sienen Wellen Christus Jesus sien Apostel es, un Brooda Timotäus

²schriewen no de heilje en Kolossä, de true Breeda en Christus: Wie wenschen junt Jnod un Fräd von Gott onsen Voda!

³Wie danken Gott dän Voda von onsem Harn Jesus Christus, emma wan wie aun junt denkjen un fa junt bäden.

⁴Wie haben von junen Gloowen aun Christus Jesus jehieet, un woo jie aule heilje goot sent.

⁵Daut haft doamet to doonen, daut doa eene Hopninj fa junt em Himmel reed licht. Doavon hieed jie aus junt daut woare Wuat, daut Evangelium, jeprädicht wort.

⁶Un soo aus daut en de gaunze Welt waust un Frucht brinjt, soo deit daut uk bie junt von däm Dach aun, aus jie daut hieeden un Gott siene Jnod en Christus vestonen kunnen.

⁷Soo hab jie daut von Epafras, onsen leewen Metoabeida, jelieet. Hee es Christus sien trua Deena fa junt. [1]

⁸Hee haft ons uk von june Leew jesajcht, dee jie derch dän Heiljen Jeist haben.

⁹Fuaz von don aun aus wie daut hieeden, hild wie aun, fa junt to bäden. Wie bäden, daut Gott junt mucht to vestonen jäwen, waut sien Wellen fa junt es, un daut junt daut nich aun jeistliche Ensecht fälen mucht.

¹⁰Wie bäden, daut jie Gott to jefaulen läwen kjennen, un derch goode Woakjen Frucht brinjen un Gott emma noda kjanen lieren.

¹¹Un mucht Gott junt stoakj moaken, doano aus siene Macht harlich es, daut jie aules jeduldich un met Freid uthoolen kjennen.

¹²Dankt Gott dän Voda doafäa, daut hee junt [2] fäich jemoakt haft, daut Oafgoot to kjrieen, waut Christus fa de heilje em Licht reed jemoakt haft.

¹³Hee haft ons ut de Jewault vonne diestre Machten rut jerat, un haft ons nenn jesat en daut Rikj von sienen leewen Sän, Jesus Christus.

¹⁴En Jesus hab wie onse Radunk, daut meent, Jesus haft ons onse Sinden vejäft.

¹⁵Christus likjent jeneiw Gott, dän wie nich seenen kjennen. Hee wia doa ea irjentwaut oppe Ieed jemoakt wort.

¹⁶Derch am muak Gott aules waut em Himmel un oppe Ieed jemoakt worden es, waut to seenen es un waut nich to seenen es, auf Troonen, Rejierungen, Harschoften un Jewaulten, daut es aules derch am un fa am jemoakt.

¹⁷Hee wia doa ea irjent waut jemoakt wort, un derch am besteit aules.

¹⁸De Jemeent es sien Kjarpa, un hee es de Kopp (daut Haupt). Von am kjemt daut Läwen, un hee es de Ieeschtjebuarna von de Doodes, daut hee en aules dän ieeschten Plauz haft.

¹⁹Gott jefoll daut, daut de Sän de volle Gottheit en sikj haud.

²⁰Derch dän Sän wull Gott aules met sikj veseenen, aules waut oppe Ieed ooda em Himmel es, doaderch daut Jesus Fräd jemoakt haft derch sien Bloot aum Kjriez.

²¹Jie selfst wieren verhäa Gott framd, un en jun schlajchtet Läwen wia jie Gott fientlich jesonnen.

²²Oba Christus haft junt derch sienen kjarpalichen Doot wada met Gott toopjebrocht, om junt rein, heilich un schultloos ver am hantostalen.

²³Doabie kjemt daut nu doaropp aun, daut jie em Gloowen gaunz faust bliewen, un daut jie nich aufkomen von de Hopninj em Evangelium. Soo hab jie daut jehieet, un soo es daut aule Menschen unja däm Himmel jeprädicht worden. Ekj, Paulus, sie sien Deena jeworden.

²⁴Ekj frei mie en daut waut ekj fa junt lieden doaf, om soo aun mienem Kjarpa foadich to moaken waut aun de lieden von Christus fa siene Jemeent noch fält. De Jemeent es sien Kjarpa.

²⁵Ekj sie een Deena aum Evangelium jeworden doaderch daut Gott mie aunjestalt haft, junt sien Wuat sea rikjlich to prädjen.

²⁶Daut es daut Jeheemnis, waut von eewje Tieden häa vestoaken wia, nu oba von Gott fa siene heilje verendach jebrocht worden es.

²⁷Gott wull siene heilje daut nu weeten loten, waut fa een harlichet Rikjtum en dit Jeheemnis fa aule Velkja es. Daut es, Christus en junt, daut es dee Harlichkjeit, met dee jie räakjnen kjennen.

²⁸Disen Christus prädj wie un woarnen un belieren aule Menschen en aule Weisheit. Doaderch well wie eenen jiedren bat doa brinjen, daut hee volkomen es en Christus.

²⁹Dit es wuafäa ekj mie aunstrenj un oabeid derch de Krauft von Christus, dee en mie wirkjt.