Read Plautdietsch (Low German) – De Bibel Kolossa 3 Bible Online

Kolossa 3 - Plautdietsch (Low German) – De Bibel bible

Kolossa 3

¹Wan jie nu met Christus vom Doot oppjestonen sent, dan sieekjt no daut, waut bowen es, wua Christus bie Gott aun de rajchte Sied setten deit.

²Denkjt aun daut waut doa bowen es, un nich aun daut waut oppe Ieed es.

³Jie sent jestorwen, un jun Läwen es met Christus en Gott vestoaken.

⁴Wan Christus, dee nu ons Läwen es, verendach komen woat, dan woa jie met am toop uk harlich hanjestalt woaren.

⁵Doawäajen moakt aules en junt doot waut von june sintliche Natua kjemt, de Huararie, Orreinichkjeit, sintelje Liedenschoften, beese Lost un Jiez. Jiez es krakjt soo aus Jetta deenen.

⁶Wiels jrod wäajen soowaut woat Gott sien Oaja äwa dee komen, dee nich jehorchen.

⁷Un soowaut muak jie met aus jie doabennen läwden.

⁸Oba nu lajcht soowaut uk aules auf: Sikj oajren, grollen, schlajcht sennen, spotten, niedatrajchtje un beleidjende Wieed ut jun Mul.

⁹Doot nich unjarenaunda lieejen. Jie haben jun oolet ekj met siene beese Natua un Woakjen aufjelajcht.

¹⁰Un jie haben eene niee Natua aunjenomen, dee emma dolla no däm likjent, dee junt jemoakt haft.

¹¹En de niee Natua, dee soo aus Christus es, jeft daut nich soowaut aus Juden ooda Griechen, beschnäden sennen ooda nich beschnäden sennen, Skieten, framde Velkja, Kjnajchts ooda Friee. Doa es Christus aules un en aulen.

¹²Jie sent von Gott jewält un heilich, un hee es junt goot. Aus soone lot junt nu von Gott beschenkjen un trakjt junt Jesus siene Ieejenschoften aun: sikj von Hoaten erboarmen, frintlich sennen, deemootich, saunftmootich un jeduldich sennen.

¹³Vedroacht eena dän aundren, un vejäft junt unjarenaunda, wan wäa eene Kloag jäajen dän aundren haft. Soo aus de Har junt vejäft haft, soo mott jie uk vejäwen.

¹⁴Un äwa aules siet leeftolich, soo daut aules to eene volkomne Eenichkjeit vebungen woat.

¹⁵Un lot Christus sien Fräd en june Hoaten rejieren. Gott haft junt doatoo jewält, sienen Fräd to haben aus Jläda aun eenen Kjarpa. Un siet dankboa.

¹⁶Lot Christus sien Wuat rikjlich mank junt wonen. Belieet un halpt eena dän aundren en aule Weisheit. Sinjt von een dankboaret Hoat Psalmen un jeistliche Leeda, Gott to ieren.

¹⁷Un aules, waut jie sajen un doonen, doot en onsen Harn Jesus sienen Nomen. Derch am dankt Gott onsen Voda.

¹⁸Frues, siet june Mana unjadon, soo aus sikj daut em Harn jehieet.

¹⁹Un jie Mana, siet june Frues goot, siet leeftolich un nich hoat to an.

²⁰Kjinja, jehorcht en aules june Elren; daut jefelt däm Harn.

²¹Jie Vodasch, veoajat un vebettat june Kjinja nich, daut see nich schuchta un mootloos woaren.

²²Oabeida, jehorcht june Wieetslied en aule Sachen, un nich mau dan, wan see junt seenen, om an to jefaulen. Jehorcht met een opprechtjet Hoat un en Gottesforcht.

²³Aules waut jie doonen, daut doot von Hoaten jieren aus fa Gott, un nich fa Menschen.

²⁴Jie weeten, daut jie vom Harn een Oafgoot kjrieen woaren. Jie deenen däm Harn Christus!

²⁵Wäa orrajcht deit, woat fa sien orrajcht trigjetolt kjrieen, un doa woat kjeena väajetrocken woaren.