Read Plautdietsch (Low German) – De Bibel 1. Tessalonicha 1 Bible Online

1. Tessalonicha 1 - Plautdietsch (Low German) – De Bibel bible

1. Tessalonicha 1

¹Paulus, Silvanus un Timotäus schriewen no de Jemeent en Tessalonich, dee derch Gott onsen Voda un onsen Harn Jesus Christus läft un bestonen deit: Wie wenschen junt Jnod un Fräd!

²Wie danken Gott emma fa junt aula un denkjen aun junt wan wie bäden.

³Wie denkjen onen opphieren doaraun, woo jie em Gloowen wirkjen, woo besorcht un leeftolich jie fa dän näakjsten sent, un woo jie soo faust opp däm Harn Jesus Christus hopen.

⁴Breeda, wie weeten, daut Gott junt goot es un sikj junt jewält haft, siene Kjinja to sennen.

⁵Daut Evangelium hab jie nich bloos met Wieed jekjräajen. Gott siene Krauft un de Heilja Jeist wieren doarhinja, un wie kunnen met groote Jewesheit räden. Jie weeten, woo wie ons mank junt benomen haben, wie wieren junt goot.

⁶Un jie haben ons un dän Harn Jesus toom Väabilt jenomen. Jie haben daut Wuat met Freid oppjenomen, wan jie uk väl doaderch lieden musten. De Heilja Jeist jeef junt de Freid doatoo.

⁷Soo sent jie een Väabilt jeworden fa aul dee, dee en Mazedonien un Achaja toom Gloowen jekomen sent.

⁸Von junt es daut Wuat no Mazedonien un Achaja jekomen, un daut haft sikj uk aulawäajen runtjerät, woo jie aun Gott jleewen. Daut bruck wie aul kjeenem mea vetalen.

⁹Aulawäajen sajen see ons, waut fa goodet daut jedonen haft, daut wie bie junt wieren. See vetalen ons, woo jie junt to Gott bekjieet haben un june Jetta veloten haben, un woo jie nu däm woaren un läwendjen Gott deenen.

¹⁰Nu wacht jie opp sienen Sän, dän Gott vom Doot oppjewakjt haft, un dee vom Himmel wadakomen saul. Jesus es dee, dee ons vom komenden Jerecht raden deit.