Read Plautdietsch (Low German) – De Bibel 1. Tessalonicha 4 Bible Online

1. Tessalonicha 4 - Plautdietsch (Low German) – De Bibel bible

1. Tessalonicha 4

¹Wieda, Breeda, jie haben von ons jelieet, woo jie Gott to jefaulen läwen sellen, soo aus jie daut uk aul doonen. Nu froag wie junt un moaken junt en däm Harn Jesus Moot, daut jie doarenn noch emma toonämen.

²Jie weeten, waut wie junt derch däm Harn Jesus aunjeordent haben.

³Gott sien Wellen es dit, daut jie heilich läwen, daut jie junt von aule Huararie friehoolen.

⁴Jieda Maun saul lieren, sikj selfst to kontrollen, un saul vesieekjen met reine Jedanken un met Respakjt siene ieejne Fru to jewennen.

⁵Kjeena saul siene Fru brucken, om siene onbandje Lost to befrädjen, soo aus de Menschen daut doonen, dee nuscht von Gott weeten.

⁶Kjeena saul äwa de Jrenslienjes stieen un sienen Brooda en dise Sach utnutzen un schoden; de Har Gott es een Rechta äwa aul soone Sachen un woat daut bestrofen, soo aus wie junt daut verhäa jelieet haben.

⁷Gott haft ons nich jewält, orrein to sennen, oba heilich.

⁸Wäa dit veachten deit, veacht nich Menschen, oba Gott, dee ons sienen Heiljen Jeist jejäft haft.

⁹Waut de Leew eena toom aundren aunbelangt, doaräwa bruck wie junt nich schriewen, wiels Gott selfst junt jelieet haft, eenaunda goot to sennen.

¹⁰Un jie sent aule Glowensjeschwista en Mazedonien goot. Oba wie wullen junt Moot moaken, doarenn noch tootonämen.

¹¹Lot daut eene Ierensach fa junt woaren, daut jie stell un ruich läwen, daut een jiedra sikj om siene Sach kjemmat un soo oabeit, aus wie junt daut jeliet haben.

¹²De Welt saul jun opprechtjet läwen seenen, un daut jie von kjeenem aufhenjich sent.

¹³Breeda, wie wellen junt nich em onkloaren loten äwa dee, dee aul jestorwen sent, daut jie nich truaren brucken, soo aus dee, dee kjeene Hopninj haben.

¹⁴Wiels wan wie jleewen, daut Jesus jestorwen un vom Doot oppjestonen es, woat Gott derch dän Harn Jesus un met am toop uk dee no sikj nämen, dee aul enjeschlopen sent.

¹⁵Dit saj wie junt met Jesus siene ieejne Wieed, daut wie, dee doa läwen un bliewen bat de Har wadakjemt, woaren dee nich veropp komen, dee aul enjeschlopen sent.

¹⁶De Har woat selfst vom Himmel raufkomen un lud sajen, waut passieren saul. De hechsta Enjel woat roopen un Gott siene Posaun woat jeblost woaren. Dan woaren dee, dee em Gloowen aun Christus seelich jestorwen sent, toieescht oppstonen.

¹⁷Dan woa wie, dee wie läwen un jebläwen sent, tojlikj met an opp de Wolkjen metjenomen woaren, un onsen Harn bejäajnen; un dan woa wie emma bie am sennen.

¹⁸Met dise Wieed treest junt unjarenaunda.