Read Plautdietsch (Low German) – De Bibel 1. Tessalonicha 5 Bible Online

1. Tessalonicha 5 - Plautdietsch (Low German) – De Bibel bible

1. Tessalonicha 5

¹Soo, leewe Breeda, äwa Tiet un Stund wanea Jesus komen woat, es daut nich needich, junt mea to schriewen.

²Jie weeten selfst goot, daut dän Harn sien Dach soo komen woat, aus een Stäla enne Nacht.

³Wan de Menschen sajen woaren: Aules es ruich un secha, dan woat äa vedoawen plazlich äwa an komen soo aus de Weedoag äwa eene Fru komen, dee een Kjint to Welt brinjt. Doa woat daut kjeen doavonkomen jäwen.

⁴Oba jie, Breeda, sent nich von dee, dee em diestren läwen, daut junt dee Dach aus een Stäla äwafaulen kaun.

⁵Jie aula sent Kjinja vom Licht un Kjinja vom Dach. Wie sent nich vonne Nacht un uk nich vom diestren.

⁶Dan well wie nu uk nich schlopen, soo aus de aundre. Well wie waka un bie kloaren Vestaunt bliewen.

⁷Dee waut doa schlopen, dee schlopen de Nacht, un dee waut sikj bedrinkjen, bedrinkjen sikj de Nacht.

⁸Oba wiels wie toom Dach jehieren, well wie kloa denkjen, un Gloowen un Leew aus een Brostschilt droagen un de Hopninj opp onse Seelichkjeit aus een Schutzhelm.

⁹Gott haft ons nich doatoo bestemt, daut ons sien Jerecht trafen saul, oba daut wie derch onsen Harn Jesus Christus seelich woaren.

¹⁰Jesus storf fa ons, soo daut wie nu, auf wie schlopen ooda waka sent, met am toop läwen kjennen.

¹¹Doawäajen moakt junt unjarenaunda Moot un but junt unjarenaunda opp, soo aus jie daut uk doonen.

¹²Breeda, ekj saj junt noch, hoolt dee en Ieren, dee mank junt en de Jemeent oabeiden, dee Gott äwa junt jesat haft un dee junt belieren.

¹³Wiels see de Oabeit doonen, wiest daut jie Leew fa an habt. Un läft frädlich met eenaunda.

¹⁴Breeda, siet mootich un wiest dee trajcht, dee onordentlich läwen. Treest dee, dee de Moot verutscht es. Halpt de schwake un haft met aulen Jedult.

¹⁵Seet doano, daut kjeena däm aundren schlajchtet met schlajchtet trigjtolen deit. Sträft emma doano, junt unjarenaunda goodet to doonen, un daut uk aun aule Menschen.

¹⁶Siet emma froo.

¹⁷Hoolt aun met bäden.

¹⁸Siet en aule Loagen dankboa, wiels Gott daut en Christus Jesus von junt velangt.

¹⁹Unjadrekjt dän Jeist nich.

²⁰Veacht nich, waut profeetisch jesajcht woat.

²¹Unjasieekjt aules, un waut goot es hoolt faust.

²²Blieft von aul daut wajch, daut waut beeset aun sikj haft.

²³Mucht Gott selfst, de Frädens Gott, junt derch un derch heiljen, un junen Jeist un Seel un Kjarpa onbeschädicht un rein bewoaren, bat ons Har Jesus Christus wadakjemt.

²⁴Hee, dee junt roopt, es tru; hee woat daut uk doonen.

²⁵Breeda, bät uk fa ons.

²⁶Jreest aule Breeda met een heiljen Kuss.

²⁷Ekj laj junt daut om Gott sient haulwen aunt Hoat, daut jie disen Breef aule Breeda väaläsen.

²⁸Mucht de Jnod von onsem Harn Jesus Christus met junt sennen!