Read Plautdietsch (Low German) – De Bibel Josua 1 Bible Online

Josua 1 - Plautdietsch (Low German) – De Bibel bible

Josua 1

¹No däm aus däm HARN sien Deena Moses jestorwen wia, säd de HAR to Nun sienen Sän Josua, Moses sienen Deena:

²Mien Deena Moses es jestorwen; nu moak die opp un trakj äwa dän Jordan, du un daut gaunze Volkj, en daut Launt, waut ekj de Israeliten jejäft hab.

³Aul de Städen, wua june Feet noppklunjen woaren, hab ekj junt jejäft, soo aus ekj Moses vesproaken hab.

⁴Jun Launtstekj saul von de Wiltnis em Sieden bat aum Boajch Libanon em Nuaden rieekjen, un von däm grooten Eufrat Riefa bat aun daut Meddelmäa em Wasten, de Hetita äa gaunzet Launt, saul junt sennen.

⁵Kjeen Fient woat die wadastonen kjennen, wiels ekj woa die dien läwen lank biestonen; soo aus ekj met Moses jewast sie, soo woa ekj uk met die sennen. Ekj woa mie nich von die trigjtrakjen un die em Stäakj loten.

⁶Sie mootich un entschloten! Wiels du saust dit Volkj daut Launt endeelen, waut ekj an toom Oafgoot jäwen woa, soo aus ekj äare Vodasch daut jeschwuaren hab.

⁷Nu bliew mootich un hool die faust aun daut, waut mien Deena Moses jesajcht haft! Hool mien Jesaz, waut hee die äwajäft haft, un lot nich daut kjlanste doavon onbeacht; om daut du Erfolch hast, met aules waut du äwanemst.

⁸Doo de Aunwiesungen von en mien Jesazbuak emma wada utspräakjen, un denkj aum Dach uk de Nacht doaräwa no, om daut du en aulem soo haundelst, aus doa bennen jeschräwen steit. Dan woascht du Erfolch haben un aules waut du aunfangst, jlekjlich to Enj brinjen.

⁹Horch, ekj hab die jesajcht, daut du mootich un entschloten best. Hab kjeene Angst, un lot die von nuscht enschrakjen, wiels ekj, de HAR, dien Gott, bliew bie die, bie aules waut du doonen woascht.

¹⁰Dan roopt Josua de Oppsechta em Volkj un säd:

¹¹Got derch daut Loaga un moakt äwaraul bekaunt: Veschauft junt Väarot, wiels om dree Doag woa jie hia äwa däm Jordan gonen, un en daut Launt komen un daut ennämen, waut de HAR, jun Gott, junt jäwen woat.

¹²Un to de Stam Ruben un Gad un dän haulwen Staum Manasse säd Josua:

¹³Denkjt aun de Wieed, waut Moses, däm HARN sien Deena, junt jesajcht haft: De HAR, jun Gott, jeft junt aun dise Sied vom Jordan jun Launt.

¹⁴June Frues un Kjinja un jun Vee lot en daut Launt bliewen, waut Moses junt aun dise Sied Jordan jejäft haft. Oba aule Mana waut toom Kjrich fäich sent, sellen bewaufnet ver äare Breeda, de aundre Israeliten, äwagonen un an halpen

¹⁵daut Launt entonämen, waut de HAR, jun Gott, an jäwen woat. Mau ieescht wan de HAR june Breeda soo aus junt eenen Wonplauz jejäft haft, derw jie trigjkomen un junt hia en daut Launt aun de oostne Sied Jordan aunsiedlen, soo aus Moses junt daut toojesajcht haft.

¹⁶Un see auntwuaden Josua: Wie wellen aules doonen waut du ons jesajcht hast, un wua du ons hanschekjst, doa well wie hangonen.

¹⁷Soo aus wie Moses jehorchten, soo well wie die uk jehorchen. Mucht de HAR, dien Gott, met die sennen, soo aus hee met Moses wia!

¹⁸Wäa sikj diene Wieed jäajenaun sat un nich deit waut du sajchst, mott met däm Doot bestroft woaren. Bliew mootich un entschloten!