Read Plautdietsch (Low German) – De Bibel Josua 10 Bible Online

Josua 10 - Plautdietsch (Low German) – De Bibel bible

Josua 10

¹Adoni Zedek, de Kjennich von Jerusalem kjrieech daut to hieren, daut Josua Ai enjenomen un aun de Staut un dän Kjennich dän Baun derchjefieet haud, soo aus hee daut met Jericho un äaren Kjennich jedonen haud, un daut dee von Gibeon met Israel Fräd jemoakt hauden un medden mank an wonen bliewen kunnen.

²Un wäajen dise Norecht fercht de Kjennich sikj sea, wiels Gibeon wia eene groote Staut soo aus eene Kjennichstaut, un wia jrata aus Ai. Un buta däm wieren de Mana von Gibeon aus stoakje Kjrieja bekaunt.

³Doawäajen schekjt Adoni Zedek, de Kjennich von Jerusalem, Bootschofta no de Nobakjennichs Hoham von Hebron, Piram von Jarmut, Jafia von Lachisch un Debir von Eglon un foddad an opp:

⁴Komt häa un halpt mie, Gibeon doltoschlonen, wiels see haben met Josua un de Israeliten Fräd jemoakt.

⁵Dan saumelden sikj de fief Kjennichs von de Amorita; de Kjennich von Jerusalem, de Kjennich von Hebron, de Kjennich von Jarmut, de Kjennich von Lachisch un de Kjennich von Eglon met äa gaunzet Kjrichsvolkj un beloagaden Gibeon un kjamften jäajen de Staut.

⁶Dee von Gibeon schekjten Norecht no daut israelitische Loaga en Gilgal un leeten Josua sajen: Trakj diene Haunt nich trigj von diene Sklowen; komm schwind no ons, om ons to halpen un to raden! Aule Kjennichs von de Amorita, waut oppe Boaj wonen, haben sikj jäajen ons vesaumelt!

⁷Dan roopt Josua aule Mana ut Israel, waut Kaumf fäich wieren, toop un reisd met daut gaunze Häa von Gilgal loos.

⁸Un de HAR säd to Josua: Fercht die nich fa an! Ekj hab dee aula en diene Henj jejäft. Kjeena von an woat jäajen die bestonen kjennen.

⁹Josua reisd met siene Mana de gaunze Nacht derch, un soo jreepen see de Amorita äwarauschent aun.

¹⁰Un de HAR juach an eenen grooten Schrakj en ver Israel, un de Mana von Israel schluagen an venichtent dol un vefoljden an bat Bet Horon, un dreewen an noch wieda bat Aseka un Makeda.

¹¹Aus de Amorita de Stiej von Bet Horon raufranden, leet de HAR groote Hoagelstekja vom Himmel opp dän gaunzen Wajch bat Aseka faulen, soo daut see doot schluagen. Un doa storwen mea von an derch de Hoagelstekja, aus de Israeliten met Schwieed dootjemoakt hauden.

¹²Dan aun däm Dach, aus de HAR de Amorita aun de Israeliten utleewad, räd Josua met däm HARN un säd ver gaunz Israel: Sonn, sto stell bowa Gibeon, un Mon bowa daut Tol Ajalon!

¹³Un de Sonn stunt stell, un uk de Mon bleef stonen, bat daut Volkj sikj aun äare Fiend jerajcht haud. Dit steit em Buak von de Heldenleeda jeschräwen. Meist eenen gaunzen Dach bleef de Sonn medden aum Himmel stonen un spood sikj nich unjatogonen.

¹⁴De HAR haft nich noch emol soont opp een Mensch sien Jebäd jedonen, nich verhäa uk nich nohäa. Dit wort wiels de HAR selfst fa Israel kjamft.

¹⁵Aus see ieescht jesiecht hauden, jinkj Josua met daut gaunze Häa toop trigj no äa Loaga en Gilgal.

¹⁶De fief Kjennichs von de Amorita wieren wajchjekomen un hauden sikj en eene Heel bie Makeda vestoaken.

¹⁷Josua wort daut oba jemalt: De fief Kjennichs worden em Vestäakj en de Heel bie Makeda jefungen.

¹⁸Dan säd Josua: Fliet däm Engank von de Heel met groote Steena too, un stalt Mana aun dee to bewoaken.

¹⁹Jie aundre oba vesiemt junt nich, un vefolcht de äwajebläwne Fiend; daut dee nich en äare fauste Städa veschwinjen. Wiels de HAR, jun Gott, haft dee en june Henj jejäft.

²⁰Aus Josua un de Mana von Israel de Amorita venichtent jeschloagen hauden, soo daut äare Macht gaunz toopjebroaken wia un mau gaunz weinje en äare fauste Städa nenjekomen wieren,

²¹kjeemen de Mana von Israel aula onvelazt trigj no Josua en daut Loaga bie Makeda. Un doa woagd sikj em gaunzen Launt kjeena mea, daut Mul optomoaken jäajen Israel.

²²Josua säd: Moakt dän Engank von de Heel op un brinjt de fief Kjennichs rut no mie!

²³Un see deeden daut soo un brochten de fief Kjennichs ut de Heel rut no am: Däm Kjennich von Jerusalem, däm Kjennich von Hebron, däm Kjennich von Jarmut, däm Kjennich von Lachisch, un däm Kjennich von Eglon.

²⁴Aus de fief Kjennichs no am rutjebrocht wieren, roopt Josua aule Mana von Israel no sikj un säd to de Befälshaba vom Kjrichsvolkj, waut met am toom Kaumf jegonen wieren: Komt häa un sat june Feet opp dise Kjennichs äa Jenekj! Un see kjeemen un saden äare Feet opp de Kjennichs äa Jenekj nopp.

²⁵Dan säd Josua to de Mana: Habt kjeene Angst un lot junt von nuscht schrakjen! Siet mootich un entschloten, wiels krakjt soo aus dit woat de HAR aul june Fiend doonen, jäajen dee jie kjamfen woaren.

²⁶Dan schluach Josua de Kjennichs doot un honk de Doodes aun fief Beem opp, un doa hongen dee bat aum Owent.

²⁷Aus oba de Sonn unjajegonen wia, leet Josua dee von de Beem nämen un en de Heel schmieten, wua see sikj bennen vekropen hauden. Un see schmeeten groote Steena ver däm Engank von de Heel. Un dee sent doa bat disen Dach noch emma.

²⁸Aun däm selwjen Dach jreep Josua uk noch de Staut Makeda aun un neem dee en, un fieed aun däm Kjennich un aun aule Enwona dän Baun derch. Dee worden aula met Schwieed dootjeschloagen, soo daut kjeena äwableef. Josua deed daut met däm Kjennich von Makeda krakjt soo, aus hee daut met däm Kjennich von Jericho jedonen haud.

²⁹Von Makeda reisd Josua met daut gaunze israelitische Kjrichsvolkj no de Staut Libna un jreep dee aun.

³⁰Un de HAR jeef uk Libna met Kjennich toop en de Israeliten äare Henj. See schluagen aule Enwona met Schwieed doot un leeten kjeenem doavon komen. Un met däm Kjennich von de Staut deeden see daut krakjt soo, aus see daut met däm Kjennich von Jericho jedonen hauden.

³¹Von Libna reisd Josua met gaunz Israel toop no de Staut Lachisch, un see omkjrensten dee un jreepen dee aun.

³²Un aum tweeden Dach von de Beloagrunk jeef de HAR de Staut en de Israeliten äare Henj. See neemen dee en un schluagen aule Enwona doot, soo aus en Libna.

³³Dan kjeem Horam, de Kjennich von Gesser, opp, om Lachisch to halpen; oba Josua bekjamft am un sien Kjrichsvolkj soo lang, bat kjeena äwableef.

³⁴Von Lachisch reisden see no de Staut Eglon, omkjrensten dee un jreepen dee aun.

³⁵See neemen dee aun däm selwjen Dach en, un schluagen dee met Schwieed dol, un fieeden dän Baun derch aun aul dee, dee doa bennen wieren, krakjt soo aus see daut met Lachisch jedonen hauden.

³⁶Von Eglon reisd Josua met gaunz Israel toop no de Staut Hebron. See jreepen dee aun

³⁷un neemen dee en un schluagen de Staut met däm Kjennich un aule Enwona toop, un uk de Siedlungen doarom met Schwieed dol. Un see fieeden dän Baun derch soo daut kjeena doavon komen kunn. Soo aus see daut met Eglon jedonen hauden.

³⁸Doa wonk Josua om, un aule Israeliten met am toop, un jinjen no Debir un jreepen de Staut aun.

³⁹See neemen dee en met aul de Siedlungen, waut doatoo jehieeden, un fieeden dän Baun derch aun däm Kjennich un aun aule Enwona, soo daut kjeena aum läwen bleef. Soo aus see daut met Hebron un Libna un äare Kjennichs jedonen hauden, soo deeden see daut uk met Debir un äaren Kjennich.

⁴⁰Soo neem Josua daut gaunze Launt en: Daut Boajlaunt, un daut onjlikje Launt em Sieden, de Eewasch von de Boaj uk de läaje Stapen; hee schluach aul de Kjennichs, un leet nuscht äwa, waut wajch komen kunn. Un aun aules, waut läwd, fieed hee dän Baun derch, soo aus de HAR, Israel äa Gott, daut aunjeordnet haud.

⁴¹Josua schluach daut dol un neem daut en, von Kadesch Barnea bat Gaza un daut gaunze Launt Goschen bat Gibeon.

⁴²Aul dise Kjennichs un äa Launt brocht Josua soo opp eemol met eenen Kjrich unja siene Jewault, wiels de HAR, Israel äa Gott, fa Israel kjamft.

⁴³No dit jinjen Josua un daut gaunze Kjrichsvolkj von Israel trigj no äa Loaga en Gilgal.