Read Plautdietsch (Low German) – De Bibel Josua 11 Bible Online

Josua 11 - Plautdietsch (Low German) – De Bibel bible

Josua 11

¹Aus Jabin, de Kjennich von Hazor, von de Israeliten äaren Siech hieed, schekjt hee no Jobab, däm Kjennich von Madon, un nom Kjennich von Schimron un no däm Kjennich von Achschaf

²un no de Kjennichs, dee em Nuaden opp de Boaj un en de Stap aun de siedne Kaunt Kinneret un opp daut onjlikje Launt un en de Jäajent von Dor aum Mäa wonden.

³Un buta däm schekjt hee Bootschofta no de Kanaanita aun de oostne un aun de wastne Sied von de Boaj, un no de Amorita, Hetita, Perisita un Jebusita von opp de Boaj, un no de Hiwita waut em Launt Mizpa aum Boajch Hermon wonden.

⁴Dise kjeemen met äare gaunze Kjrichsmacht, een grootet Volkj, sooväl aus Sauntkjieena aum Mäa, un hauden uk sea väl Pieed un Woages.

⁵See deeden sikj met äare Truppen veeenjen om jäajen Israel to kjamfen, un loagaden sikj aula toop aun de Kjwalen von Merom.

⁶De HAR säd to Josua: Fercht die nich fa an! Wiels morjen en disen Tiet woa ekj dee aula ver Israel to dootjeschloagne moaken. No däm Siech sell jie äare Pieed lom moaken un äare Woages vebrennen.

⁷Un doa aum Wota von Merom, jreep Josua de Fiend äa Loaga, met aul siene Kjrieja, äwarauschent aun,

⁸un de HAR jeef Israel dee en äare Jewault. De Israeliten schluagen dee trigj un juagen dee hinjaraun nom Nuaden bat de groote Staut Sidon un bat Misrefot Majim un nom Oosten bat en de jlikje Stap von Mizpe. See schluagen dee aula doot, un leeten kjeenem doavon komen.

⁹Un no däm HARN sien Wuat leet Josua de Pieed de Footsänen derchschnieden un de Kaumf Woages vebrennen.

¹⁰Dan wonk Josua om un neem de Staut Hazor en, waut don de Hauptstaut von aul dise Kjennichrikjs wia, un schluach däm Kjennich met een Schwieet doot.

¹¹Un de Mana von Israel fieeden aun aule Enwona dän Baun derch, soo daut kjeena aum Läwen bleef; un de Staut wort doljebrent.

¹²Uk aul de aundre Städa neem Josua en un leet äare Kjennichs un aule Enwona doot moaken, soo aus Moses, däm HARN sien Deena, daut aunjeordnet haud.

¹³Oba de Städa, waut oppe Boaj stunden, vebrenden de Israeliten nich; bloos Hazor vebrend Josua.

¹⁴Daut gaunze Kaptol ut dise Städa un daut Vee deelden de Israeliten sikj en; oba aule Menschen schluagen see met äa schoapet Schwieet dol, bat dee utjerot wieren, un leeten nuscht läwendjet äwa.

¹⁵Soo haud de HAR sienen Deena Moses daut väajesajcht, un Moses haud dee Wieed aun Josua wiedajejäft. Un Josua deed sikj jeneiw doaraun hoolen, waut de HAR Moses väajesajcht haud.

¹⁶Soo neem Josua daut gaunze Launt en, de Boaj un de Stapen em Sieden, daut gaunze Launtstekj Goschen, daut onjlikje Launt em Wasten un de läaje Stapen biem Jordan,

¹⁷daut gaunze Launt von de kole Boaj, waut no Seir opptoo ligjen, bat Baal Gad en de läaje Launtschoft tweschen dän Libanon un dän Boajch Hermon. Aul de Kjennichs von dise Lenda neem Josua faust un muak dee doot.

¹⁸Hee must oba eene lange Tiet met dise Kjennichs kjamfen.

¹⁹Doa wia kjeene Staut, waut met de Israeliten Fräd muak, buta de Hiwita, waut en Gibeon wonden; de aundre musten aula met Jewault enjenomen woaren.

²⁰De HAR haud äare Enwona äare Hoaten soo hoat jemoakt, daut see toom Kaumf jäajen de Israeliten jinjen, om daut de Baun aun an derchjefieet wort, un see onen Jnod utjerot worden, soo aus de HAR daut to Moses jesajcht haud.

²¹Dan venicht Josua uk de Anakita, dee en de Städa Hebron, Debir un Anab un en de aundre Siedlungen opp daut Boajlaunt en Juda un Israel läwden, un fieed uk aun an dän Baun derch

²²un leet em Launt Israel kjeene Anakita äwa. Bloos de Anakita en Gaza, Gat un Aschdod bleewen von de Venichtunk äwa.

²³Soo neem Josua daut gaunze Launt en, krakjt soo, aus de HAR Moses daut em verut jesajcht haud, un jeef de Israeliten daut aus een Oafgoot, waut see fa sikj haben kunnen, jieda Staum sienen Deel. Un daut Launt kjeem vom Kjrich loos un haud Fräd.