Read Plautdietsch (Low German) – De Bibel Josua 14 Bible Online

Josua 14 - Plautdietsch (Low German) – De Bibel bible

Josua 14

¹Dit sent de Launtstekja, waut de Israeliten aus Oafgoot em Launt Kanaan kjrieejen, waut de Priesta Eleasar un Josua, Nun sien Sän, un de Leida von de Volkjsgruppen, mank de Stam en Israel vedeelden.

²Soo aus de HAR daut derch Moses aunjeordnet haud, worden de Launtstekja aun de wastne Sied vom Jordan mank de näajenunhaulf Stam derch daut Loss vedeelt.

³De tweeunhaulf Stam haud Moses äa Oafgoot aun de oostne Sied vom Jordan jejäft. De Leviten oba haud hee kjeen Launt aus Oafgoot mank an jejäft.

⁴De Nokomen von Josef wieren en twee Stam jedeelt: Manasse un Efraim. De Leviten oba jeewen see kjeenen Aundeel aum Launt, bloos Städa wua see wonen kunnen, un Weidstapen fa äa Vee, waut see hauden.

⁵De Israeliten vedeelden daut Launt mank de Stam, soo aus de HAR Moses daut väajesajcht haud.

⁶De Mana von Juda kjeemen en Gilgal ver Josua; un Kaleb, Jefune sien Sän, eena von Kenas siene Nokomen, säd to Josua: Du weetst, waut de HAR ons beid en Kadesch Barnea derch Moses, dän Gottesmaun, toojesajcht haft.

⁷Ekj wia don 40 Joa oolt, aus Moses, däm HARN sien Deena, mie von Kadesch Barnea rutschekjt, om daut Launt to unjasieekjen. Un ekj berecht am no mien bastet Weeten un Jewessen.

⁸Oba miene Staumbreeda, waut met mie toop daut Launt unjasocht hauden, muaken daut Volkj Angst; ekj leet mie oba nich veleiden un vetrud däm HARN, mienen Gott.

⁹Doa aun däm Dach deed Moses schwieren un säd: Daut Launt, wua du aus Spion äwajegonen best, saul dient un diene Nokomen äa Oafgoot sennen fa emma, wiels du die aun däm HARN, mienen Gott, jehoolen un am vetrut hast.

¹⁰Nu kaust seenen, de HAR haft mie aum Läwen jehoolen, soo aus hee mie daut toojesajcht haft. Von dan aus de HAR dit to Moses säd, en dee Tiet aus de Israeliten en de Wiltnis rom waundaden, sent 45 Joa vegonen. Un nu kjikj, ekj sie vondoag 85 Joa oolt

¹¹un sie noch krakjt soo stoakj aus aun däm Dach, aus Moses mie rutschekjt. Soo aus miene Krauft don wia, soo es dee nu uk noch, om toom Kaumf to gonen.

¹²Doawäajen jeff mie nu daut Boajlaunt aus mien Deel, wua de HAR aun janen Dach von jerät haft. Du weets noch von don, daut de Anakita dort en groote stoakj vesechade Städa wonen. Veleicht steit de HAR mie soo bie, daut ekj dee vedriewen kaun, soo aus de HAR daut vesproaken haft.

¹³Doa deed Josua Kaleb, Jefune sienen Sän, säajnen un jeef am de Staut Hebron aus Oafgoot.

¹⁴Doawäajen wort Hebron daut Oafgoot waut Kaleb, Jefune sienen Sän, eenen Nokomen von Kenas bat disen Dach jehieet, wiels hee sikj tru aun däm HARN, Israel äaren Gott, jehoolen haud.

¹⁵Hebron wia verhäa de Staut von Arba, waut de jratsta Mensch von de Riesen mank de Anakita wia. Un daut Launt kjrieech Fräd vom Kjrich.