Read Plautdietsch (Low German) – De Bibel Josua 18 Bible Online

Josua 18 - Plautdietsch (Low German) – De Bibel bible

Josua 18

¹De gaunze Jemeent von Israel vesaumeld sikj en Silo un recht doa daut Vesaumlungszelt opp, un daut Launt wia an unjadon.

²Doa wieren oba noch säwen Stam von Israel, waut äa Oafgoot noch nich enjedeelt hauden.

³Dan säd Josua to de Mana von dee Stam: Woo lang well jie noch wachten, bat jie daut Launt fa junt em Jebruck nämen, waut de HAR, june Vodasch äa Gott, junt jejäft haft?

⁴Wält junt ut jieda Staum dree Mana, dee ekj schekjen kaun, daut see derch daut Launt gonen un daut kloa oppschriewen no äare Oafgoot Flekja un wada trigj no mie komen.

⁵Deelt daut Launt en säwen Deel! Juda saul opp sien Launtstekj em Sieden bliewen, un de Stam von Josef opp äa Launtstekj em Nuaden.

⁶Jie oba sellen de säwen Deelen vom Launt oppschriewen, un de List no mie brinjen. Ekj woa dan hia ver däm HARN, onsen Gott, daut Loss schmieten.

⁷De Leviten traft kjeen Aundeel aum Launt mank junt, wiels de Priesta Deenst fa däm HARN es äa Oafgoot. Gad un Ruben un de haulwa Staum Manasse haben äaren Deel em Oosten aun jantsied Jordan jekjräajen, waut Moses, däm HARN sien Deena, an jejäft haft.

⁸Dan muaken de Mana sikj opp un jinjen loos; un Josua säd to an: Got loos un reist derch daut Launt un schrieft aules opp un komt trigj no mie, om daut ekj hia en Silo ver däm HARN fa junt daut Loss schmieten kaun.

⁹Dan jinjen de Mana derch daut Launt un deelden daut gaunze Launt en säwen Deelen, un stalden eene List no de Städa no opp, waut en dise Deelen lagen. Un dan kjeemen see trigj no Josua en daut Loaga bie Silo.

¹⁰Un Josua leet däm HARN derch daut Loss entscheiden, un soo aus daut Loss troff, soo vedeeld hee daut Launt tweschen de latste Stam en Israel.

¹¹Daut ieeschte Loss foll opp dän Staum Benjamin met siene Volkjsgruppen. See kjrieejen daut Launtstekj tweschen de Stam Juda un Josef.

¹²De Nuadjrens fangt em Oosten aum Jordan aun un jeit nopp bat däm Boajchrigjen em Nuaden von Jericho, un wieda boajopp no de Boaj em Wasten, un dan no de Stap von Bet Awen,

¹³un von doa äwa dän Boajchrigjen nom Sieden han von Lus, waut nu Betel es, un dan rauf no Atrot Adar, bie däm Boajch, dee von daut unjaschte Bet Horon nom Sieden han licht.

¹⁴Von doa dreit de Jrens sikj aun de wastne Sied rom nom Sieden, von däm Boajch nom Sieden von Bet Horon, un jeit bat Kirjat Baal, waut nu Kirjat Jearim es, eene Staut en Juda. Daut es de wastne Sied.

¹⁵Ver Kirjat Jearim bicht de Jrens nom Oosten rom, un jeit aun de Kjwal Neftoach vebie,

¹⁶no de Kaunt von däm Boajch aun de nuadne Sied von daut jlikje Launt Refaim. Hinja Refaim fangt daut Hinnom Tol aun. Dan jeit de Jrens derch daut Hinnom Tol aun däm Boajchrigjen bie de Jebusita Staut Jerusalem velenjd no de Rogel Kjwal.

¹⁷Wieda rant dee nom Nuaden no de Sonnen Kjwal un no Gelilot, waut jäajen daut Eewa bie Adumim licht, un kjemt rauf nom Bohan Steen, dee no Ruben sienen Sän Bohan veneemt es;

¹⁸un jeit dan no de Spetz vom Boajch aun de nuadne Sied von Bet Araba un kjemt rauf no Bet Araba.

¹⁹Dan jeit de Jrens äwa no däm Boajchrigjen em Nuaden von Bet Hogla, un äa Enj es aum nuadnen Eewa vom Soltmäa, doa wua de Jordan nenrant. Daut es de Siedjrens.

²⁰De Jordan es de Oostjrens. Tweschen dise Jrensen licht daut Oafgoot von däm Staum Benjamin met siene Volkjsgruppen.

²¹De Städa fa däm Staum Benjamin siene Volkjsgruppen sent dise: Jericho, Bet Hogla, Emek Keziz,

²²Bet Araba, Zemarajim, Betel,

²³Awim, Para, Ofra,

²⁴Kefar Amoni, Ofni un Geba. Daut sent twalf Städa met äare aunligjende Darpa.

²⁵Dan uk noch Gibeon, Rama, Beerot,

²⁶Mizpe, Kefira, Moza,

²⁷Rekem, Jirpeel, Tarala,

²⁸Zela, Elef un de Jebusita Staut, daut es Jerusalem, Gibea un Kirjat Jearim; 14 Städa met äare aunligjende Darpa. Dit es daut Launt, waut de Volkjsgruppen von däm Staum Benjamin aus Oafgoot jehieet.