Read Plautdietsch (Low German) – De Bibel Josua 20 Bible Online

Josua 20 - Plautdietsch (Low German) – De Bibel bible

Josua 20

¹De HAR räd met Josua un säd:

²Saj de Israeliten: Stemt junt de Friestäda rut, wuavon ekj junt derch Moses jesajcht hab.

³No dise Städa kaun dee han flichten, waut onen Aufsecht, un onen jewult eenen Mensch dootjeschloagen haft, om daut dee junt toom Schutz deenen fa de Aunjehieeje waut daut Bloot rajchen wellen.

⁴Wäa no eene von dise Städa flichten deit, saul buten ver daut Stautspuat stonen bliewen un siene Sach ver de Leida von de Staut väabrinjen. Un dan sellen see am en de Staut oppnämen un am Rum jäwen bie an to wonen.

⁵Un wan de Blootrajchna am hinjaraun kjemt, sellen see dän onaufsechtlichen Dootschlona nich rutleewren, wiels hee onen daut jeplont sienen näakjsten dootjeschloagen haft un däm verhäa goanich fientlich jewast es.

⁶Soon Faul mott en eene Jerechts Vehaundlunk enne Jemeent beschloten woaren, un dan doaf de onaufsechtliche Dootschlona en de Staut wonen, bat dee en dise Tiet aumtierende Huagapriesta jestorwen es. Dan doaf hee no de Staut, von wua hee jeflicht es, un no siene Famielje trigjkomen.

⁷Dan stemden de Mana von Israel dise Städa to Friestäda rut: Aun de wastne Sied vom Jordan Kedesch en Galiläa opp daut Boajlaunt von Naftali, un Sichem opp daut Boajlaunt en Efraim, un Kirjat Arba, waut nu Hebron es, opp daut Boajlaunt en Juda.

⁸Aun de aundre Sied vom Jordan, nom Oosten han von Jericho, bestemden see Bezer opp daut huage Staplaunt en daut Launtstekj von däm Staum Ruben, un Ramot en Gilead en de Jäajent von däm Staum Gad, un Golan en Baschan en däm Staum Manasse sien Launtstekj.

⁹Dit wieren de rutjestemde Städa fa aule Israeliten un aul de framde, waut en äare Medd wonden. Doa kunnen Menschen Schutz finjen dee onen Aufsecht eenen Mensch dootjeschloagen hauden, un eena em Frintschoft von eenen dootjeschloagnen daut Bloot rajchen well. Dee sull nich von däm Blootrajchna dootjemoakt woaren, ea hee ver de Jemeent jestonen haud.