Read Plautdietsch (Low German) – De Bibel Josua 21 Bible Online

Josua 21 - Plautdietsch (Low German) – De Bibel bible

Josua 21

¹Dan kjeemen de Leida von de Volkjsgruppen ut däm Staum Levi no däm Priesta Eleasar un no Josua, Nun sienen Sän, un no de Leida von de Volkjsgruppen ut de aundre Stam von Israel

²no Silo em Launt Kanaan un räden met an un säden: De HAR haft derch Moses aunjeordnet, daut ons Städa jejäft woaren toom wonen, un Weidstapen fa ons Vee.

³Dan jeewen de Israeliten de Leviten no däm HARN sien Wuat von äa Oafgoot dise Städa un äare Weidstapen.

⁴Bie de Endeelunk foll daut ieeschte Loss opp de Volkjsgruppen von Kehat siene Nokomen. Un de Nokomen von däm Priesta Aaron von de Leviten kjrieejen von de Stam Juda, Simeon un Benjamin derch daut Loss 13 Städa.

⁵De äwaje Volkjsgruppen von Kehat worden derch daut Loss tieen Städa von de Volkjsgruppen ut de Stam Efraim, Dan un dän haulwen Staum Manasse toojedeelt.

⁶De Volkjsgruppen von Gerschon siene Nokomen kjrieejen von de Volkjsgruppen ut de Stam Isachar, Asser, Naftali un dän haulwen Staum Manasse en Baschan derch daut Loss 13 Städa.

⁷De Volkjsgruppen von Merari siene Nokomen worden twalf Städa ut de Stam Ruben, Gad un Sebulon toojedeelt.

⁸Soo jeewen de Israeliten de Leviten derch daut Loss dise Städa un äare Weidstapen, soo aus de HAR daut derch Moses aunjeordnet haud.

⁹Von däm Staum Juda un däm Staum Simeon jeewen see dise Städa, waut met Nomen jenant sent,

¹⁰no Aaron siene Nokomen von Kehat siene Grupp ut däm Staum Levi, wiels daut ieeschte Loss wia opp an jefollen.

¹¹See jeewen an de Staut von Arba, dee Anak sien Voda wia, waut nu Hebron es, opp daut Boajlaunt en Juda, met de Weidstap runtom.

¹²Daut Akalaunt un de Darpa waut to de Staut jehieed, jeewen see Kaleb, Jefune sienen Sän, aus Oafgoot.

¹³See jeewen däm Priesta Aaron siene Nokomen de Friestaut Hebron, waut fa de Dootschlonasch bestemt wia, met äare Weidstap toop. Un wieda kjrieejen see Libna met äare Weidstap,

¹⁴Jatir un äare Weidstap, Eschtemoa un äare Weidstap,

¹⁵Holon un äare Weidstap, Debir un äare Weidstap,

¹⁶Ajin un äare Weidstap, Jutta un äare Weidstap, un Bet Schemesch un äare Weidstap. Daut wieren näajen Städa von dise beid Stam.

¹⁷Von däm Staum Benjamin jeewen see vea Städa: Gibeon, Geba,

¹⁸Anatot un Alemet met äare Weidstapen toop.

¹⁹Aules toop hauden de Priesta, Aaron siene Nokomen, 13 Städa met äare Weidstapen.

²⁰De äwaje Volkjsgruppen, von de Leviten von Kehat siene Nokomen, worden vea Städa ut däm Staum Efraim derch daut Loss toojedeelt.

²¹See jeewen an de Friestaut fa de Dootschlonasch: Sichem un de Weidstap opp daut Boajlaunt en Efraim, un Gesser met äare Weidstap,

²²un Kibzajim un Bet Horon met äare Weidstapen.

²³Un von däm Staum Dan vea Städa: Elteke met äare Weidstap, Gibbeton met äare Weidstap,

²⁴Ajalon met äare Weidstap un Gat Rimmon met äare Weidstap.

²⁵Un von däm haulwen Staum Manasse twee Städa: Taanach un Gat Rimmon met äare Weidstapen.

²⁶Daut sent aules toop tieen Städa met äare Weidstapen toop fa de äwaje Volkjsgruppen von Kehat siene Nokomen.

²⁷De Volkjsgruppen von de Leviten von Gerschon siene Nokomen worden twee Städa ut däm haulwen Staum Manasse jejäft: De Friestaut fa de Dootschlonasch: Golan en daut Launtstekj Baschan un Beeschtera met äare Weidstapen toop.

²⁸Un von däm Staum Isachar vea Städa: Kischjon, Daberat,

²⁹Jarmut un En Ganim met äare Weidstapen toop.

³⁰Un vom Staum Asser vea Städa: Mischal, Abdon,

³¹Helkat un Rehob met äare Weidstapen toop.

³²Un von däm Staum Naftali dree Städa: De Friestaut fa de Dootschlonasch: Kedesch en Galiläa, Hamot Dor un Kartan met äare Weidstapen toop.

³³Dit wieren aules toop 13 Städa met Weidstapen toop, waut de Gerschonita jehieeden.

³⁴De äwaje Leviten, de Volkjsgruppen von Merari siene Nokomen, kjrieejen von däm Staum Sebulon vea Städa: Jokneam, Karta,

³⁵Dimna un Nahalal met äare Weidstapen toop.

³⁶Un von däm Staum Ruben vea Städa: Bezer, de Friestaut fa de Dootschlonasch, opp de huage Staplauntschoft, un Jahaz,

³⁷Kedemot un Mefaat met äare Weidstapen toop.

³⁸Un von däm Staum Gad vea Städa: Ramot en Gilead, de Friestaut fa de Dootschlonasch,

³⁹Mahanajim, Heschbon un Jaser met äare Weidstapen toop.

⁴⁰Aul dise twalf Städa jehieeden de äwaje Leviten, de Volkjsgruppen von Merari siene Nokomen.

⁴¹Aules toop kjrieejen de Leviten medden en daut Launt von de Israeliten 48 Städa met äare Weidstapen toop.

⁴²Bie dise Städa wia daut emma de Staut, un daut Weidlaunt runtom. Soo wia daut bie aule Städa.

⁴³Soo jeef de HAR Israel daut gaunze Launt, waut hee äare Vodasch jeschwuaren haud to jäwen. Un see neemen daut en un wonden doabennen.

⁴⁴Un de HAR jeef an runtom Fräd, soo aus hee äare Vodasch daut vesproaken haud. Kjeena von äare Fiend kunn jäajen an bestonen, wiels de HAR jeef dee aula en äare Jewault.

⁴⁵Soo haud de HAR aul siene Vespräakjungen erfelt; nuscht wia utjebläwen von daut goode, waut hee sien Volkj Israel vesproaken haud. Daut wia aula soo jekomen.