Read Plautdietsch (Low German) – De Bibel Josua 5 Bible Online

Josua 5 - Plautdietsch (Low German) – De Bibel bible

Josua 5

¹Aus aul de Kjennichs von de Amorita, waut aun de wastne Sied Jordan wonden, un aule Kanaanita Kjennichs aum Meddelmäa daut hieeden, woo de HAR däm Jordan ver de Israeliten utdrieejen leet, bat daut gaunze Volkj Israel doa derchjegonen wia, wort an Angst fa de Israeliten, un see veluaren aulen Moot.

²Dan säd de HAR to Josua: Moak die Massasch von Steen un doo aule Maunslied en Israel beschnieden, soo aus daut aul emol ea wort.

³Dan muak Josua sikj steenane Massasch un beschneet de Maunslied von Israel opp eenen Plauz, dee von dan aun Väahut Eewa heet.

⁴Un dit es de Grunt, wuarom Josua dee beschneet: Aule Maunslied, waut ut Ägipten rutjetrocken wieren, aul dee waut bie de Utwaundrunk ut Ägipten Kjrieja wieren, wieren oppe Reis derch de Wiltnis jestorwen.

⁵Aus de Israeliten Ägipten veleeten, wieren aule Maunslied beschnäden; oba dee waut oppe Reis derch de Wiltnis jebuaren wieren, dee wieren nich beschnäden worden.

⁶De Israeliten waundaden 40 Joa en de Wiltnis, bat daut gaunze Volkj utjestorwen wia, dee aus Kjrieja ut Ägipten jetrocken wieren, wiels see däm HARN siene Stemm nich jehorcht hauden, un de HAR an vesproaken haud: Jie sellen daut Launt nich seenen, waut ekj june Vodasch vesproaken hab, daut Launt, waut von Malkj un Honnich äwarant!

⁷Äare Säns, dee de HAR haud oppwaussen loten un aun äare Städ stunden, dee beschneet Josua. Wiels see dee hinjawäajes nich beschnäden hauden wieren dee noch onbeschnäden.

⁸No däm aus dee aula wieren beschnäden worden, bleewen see doa em Loaga, bat de Wunden jeheelt wieren.

⁹Un de HAR säd to Josua: Vondoag hab ekj de ägiptische Schaund von junt raufjenomen. Un dise Städ wort Gilgal jenant bat dän vondoagschen Dach.

¹⁰Aus de Israeliten bie Gilgal opp de Stap bie Jericho äa Loaga hauden, fieeden see aum 14. Dach en de 1. Moonat aum Owent daut Passafast.

¹¹Aum näakjsten Dach eeten see toom ieeschten mol von daut, waut em Launt Kanaan jewossen wia: Jereeschte Jeträajd Kjieena un onjesuadet Broot.

¹²Von disen Dach aun hieed uk daut Mauna opp, wiels see nu von daut Jeträajd em Launt äten kunnen, soo daut de Israeliten von däm Dach aun kjeen Mauna mea fungen. See eeten aul en daut ieeschte Joa von de Arnt em Launt Kanaan.

¹³Aus Josua dicht bie Jericho wia, kjikjt hee opp, un sach daut doa een Maun ver am stunt, waut een ut de Scheed jetroknet Schwieet enne Haunt haud. Josua jinkj no am un fruach: Jehieescht du to ons ooda to onse Fiend?

¹⁴Hee säd: Beides nich. Ekj sie de Befälshaba äwa däm HARN sien Häa; un sie nu jrod jekomen. Dan schmeet Josua sikj ut Ieaforcht ver am han un säd: Waut haft mien Har sienen Deena to sajen?

¹⁵Dan säd de Befälshaba äwa däm HARN sien Häa to Josua: Trakj die de Schoo ut, wiels du steist opp heilje Grunt! Un Josua deed, waut hee am säd.