Read Plautdietsch (Low German) – De Bibel Josua 6 Bible Online

Josua 6 - Plautdietsch (Low German) – De Bibel bible

Josua 6

¹De Staut Jericho wia veschloten un vesechat, aus de Israeliten noda kjeemen, soo daut kjeena rut ooda nenkomen kunn.

²De HAR säd to Josua: Horch, ekj hab de Staut Jericho met äaren Kjennich un äare Kjrieja toop en diene Jewault jejäft.

³Go sas Doag, jieda Dach eemol rom de Staut, met aulet Kjrichsvolkj toop.

⁴Un säwen Priesta sellen Posaunen von Schop Hieena ver de Bundeskjist droagen. Aum säwenden Dach got säwen mol rom de Staut, un de Priesta sellen doabie met de Posaunen blosen.

⁵Wan de Posaunen oba ieescht aunhoolent jeblost woaren un jie dän Schaul von de Posaunen hieren, dan stemt aula een grootet Kjrichsjeschrech aun. Dan woat de Stautsmia omfaulen, un daut Kjrichsvolkj saul nengonen, jieda eena doajäajen wua hee es.

⁶Dan roopt Josua, Nun sien Sän, de Priesta no sikj un säd to an: Nämt däm HARN siene Bundeskjist opp june Schulren. Un säwen von junt Priesta sellen säwen Posaunen von Schop Hieena ver däm HARN siene Kjist droagen.

⁷Toom Volkj oba säd hee: Moakt junt opp un got rom de Staut! Un de erfoarne Kjrieja sellen ver de Bundeskjist gonen.

⁸Aus Josua daut Volkj daut jesajcht haud, muaken sikj de säwen Priesta opp, waut de säwen Posaunen ver de Bundeskjist druagen, un blosden doamet, un de Kjist met däm HARN sienen Bunt foljd an hinjaraun.

⁹De Kjrieja jinjen ver de Priesta, waut met de Posaunen blosden, un daut äwaje Volkj kjeem de Kjist hinjaraun, un de Posaunen worden dän tietäwa jeblost.

¹⁰Josua säd to daut Kjrichsvolkj: Jie sellen kjeen Kjrichsjeschrech moaken uk nich june Stemmen hieren loten; jie sellen kjeen Wuat räden bat däm Dach, wua ekj to junt saj: “Moakt een Kjrichsjeschrech!” Dan sell jie daut Kjrichsjeschrech moaken.

¹¹Soo leet hee daut gaunze Volkj met däm HARN siene Bundeskjist eemol runtom de Staut gonen, un see kjeemen wada trigj en daut Loaga un bleewen doa äwa Nacht.

¹²Aum näakjsten Morjen muak Josua sikj tiedich opp, un de Priesta neemen de Bundeskjist opp äare Schulren.

¹³De säwen Priesta druagen de säwen Posaunen von Schop Hieena ver däm HARN siene Kjist un blosden bieaun biem gonen met de Posaunen. Daut Kjrichsvolkj jinkj ver an, un daut äwaje Volkj kjeem de Bundeskjist hinjaraun, un de Posaunen worden de gaunze Tiet jeblost.

¹⁴Uk aum tweeden Dach jinjen see eemol rom de Staut rom un kjeemen trigj no daut Loaga. Soo deeden see daut sas Doag.

¹⁵Aum säwenden Dach muaken see sikj tiedich opp, aus daut aunfunk to doagen un jinjen en de selwje Form rom de Staut; bloos aun däm Dach jinjen see säwen mol rom de Staut.

¹⁶Un biem säwende mol, aus de Priesta äare Posaunen blosden, säd Josua to daut Volkj: Nu moakt een Kjrichsjeschrech! Wiels de HAR haft junt de Staut jejäft.

¹⁷Oba horcht häa: De Staut es däm HARN jeweit un steit unja sienen Baun met aules, waut doabennen es. Kjeen Mensch un kjeen Tia doaf aum Läwen bliewen. Bloos de Hua Rahab un aul dee, dee en äa Hus sent, sellen veschoont woaren, wiels see de Spionen vestuak, waut wie rutschekjten.

¹⁸Doot junt heeden, waut von daut Jebaunde fa junt to nämen, sest kjemt de Baun äwa daut gaunze Loaga von Israel un brinjt junt en daut vedoawen.

¹⁹Oba aul daut Selwa un Golt un aul daut Jereetschoft von Koppa un Iesa saul däm HARN jehieren, un en siene Woninj jebrocht woaren.

²⁰Dan deeden de Priesta met äare Schophieena blosen, un aus daut Volkj dän Posaunenschaul hieed, muak daut een grootet Kjrichsjeschrech. Dan foll de Mia om, un de Mana von Israel drenjden von aule Sieden en de Staut nenn un neemen dee en

²¹un schluagen no däm HARN sien Wuat aules met Schwieed doot, waut en de Staut läwd: Mana un Frues, Kjinja un oole Lied, uk de Rinda, Schop un Äsels.

²²Josua säd to de beid Mana, waut daut Launt unjasocht hauden: Got en de Hua äa Hus un holt de Fru met aul äare Aunjehieeje toop doarut, soo aus jie ar daut jeschwuaren haben.

²³Dan jinjen de Mana, waut Spionen jewast wieren, doa nenn un holden rut aules waut to Rahab jehieed, äaren Voda äare Mutta un äare Breeda. See brochten aul äa Frintschoft en Sechaheit un brochten dee no eenen Plauz biesied daut israelitische Loaga.

²⁴Oba de Staut, un aules waut doabennen wia, vebrenden see met Fia. Bloos daut Selwa un Golt un daut koppane un iesane Jereetschoft brochten see en dän Loagarum bie däm HARN siene Woninj.

²⁵De Hua Rahab oba, met äa gaunzet Vodahus toop, un aules waut see haud, leet Josua läwen. Un see wond medden en Israel bat dän vondoagschen Dach, wiels see de Spionen vestoaken haud, waut Josua utjeschekjt haud, om Jericho to unjasieekjen.

²⁶Dan spruak Josua de Woarnunk ut: Veflucht es dee Maun ver däm HARN, wäa sikj oppmoakt un dise Staut Jericho wada oppbut! De Gruntsteena lajen, woat am sienen ieeschtjebuarnen Sän kosten, un de Puaten ensaten, woat am sienen jinjsten Sän kosten.

²⁷De HAR wia met Josua, soo daut hee em gaunzen Launt aunerkjant un jeloft wort.