Read Plautdietsch (Low German) – De Bibel 2. Tessalonicha 2 Bible Online

2. Tessalonicha 2 - Plautdietsch (Low German) – De Bibel bible

2. Tessalonicha 2

¹Ons Har Jesus Christus woat wadakomen un dan woa wie met am toopjebrocht woaren. Doawäajen laj ekj junt dit nu aunt Hoat, leewe Breeda:

²Lot junt nich soo leicht derchenaunda brinjen ooda Angst moaken, daut Jesus sien Dach aul saul jekomen sennen. Eendoont auf de Norecht derch eene profeetische Räd kjemt ooda derch een Wuat ooda eenen Breef, dän wie sullen jeschräwen haben.

³Lot junt von kjeenem opp irjent eenen Wajch aunschmäaren. Ieescht mott daut komen, daut väle von Gott auffaulen, un daut de jesazloosa beesa Mensch, dee fa de Hal bestemt es, verendach kjemt.

⁴Hee es Gott sien Fient, dee sikj jäajen aules sat waut Gottesdeenst heet un heilich jehoolen woat. Dee jeit soo wiet, daut hee sikj en Gott sienen Tempel sat, un sajcht, hee es Gott.

⁵Kjenn jie junt nich besennen, daut ekj junt dit säd aus ekj bie junt wia?

⁶Un jie weeten, waut am noch trigjhelt, daut hee sikj mau ieescht openboaren kaun, wan siene Tiet doatoo jekomen es.

⁷De Jesazloosichkjeit es em Jeheemen aul aum Woakj, oba ieescht mott dee noch wajch jenomen woaren, dee daut noch opphelt.

⁸Dan woat dee beesa, de Jesazloosa, verendach komen. De Har Jesus woat dän derch dän Jeist ut sienem Mul ombrinjen, un derch siene Harlichkjeit met am een Enj moaken, wan hee komen woat.

⁹De Jesazloosa woat en Soton siene Krauft komen, un derch dee woat hee veloagne Tieekjens un faulsche Wunda doonen.

¹⁰Hee woat deejanje toom beesen veleiden, dee veloaren gonen, wiels see räakjnen dee Woarheit nuscht, dee an raden kunn, un haben dee nich aunjenomen.

¹¹Doawäajen schekjt Gott an jewaultjen Errlieren, daut see de Läajes jleewen,

¹²un daut aul dee vedaumt woaren, dee de Woarheit nich jleewen, oba äare Freid aun de Ojjerajchtichkjeit haben.

¹³Wie motten Gott dän tietäwa danken fa junt, onse Breeda, dee de Har goot es. Gott haft junt von Aunfank aun jewält, daut jie seelich woaren. [1] Hee heilicht junt em Jeist un lat junt aun de Woarheit jleewen.

¹⁴Derch ons leet hee junt daut Evangelium prädjen, daut jie onsen Harn Jesus Christus siene Harlichkjeit kjrieejen.

¹⁵Breeda, dan siet nu staunthauft, un hoolt daut faust, waut jie derch onse Wieed ooda Breew jelieet haben.

¹⁶Mucht ons Har Jesus Christus selfst un Gott ons Voda, dee ons goot es un ons eenen eewjen Troost un eene goode Hopninj derch siene Jnod jejäft haft,

¹⁷june Hoaten treesten un junt stoakj moaken en aul goodet doonen un räden.