Read Plautdietsch (Low German) – De Bibel 1. Timotäus 2 Bible Online

1. Timotäus 2 - Plautdietsch (Low German) – De Bibel bible

1. Timotäus 2

¹Ieeschtens, rod ekj junt nu, daut jie drinjent bäden. Bät uk fa aundre un dankt fa aule Menschen,

²fa de Kjennichs un aule dee huach aunjestalt sent, daut wie en Gottesforcht un Opprechtichkjeit ruich läwen kjennen.

³Daut es goot un es Gott onsen Heilant aunjenäm,

⁴dee doa haben well, daut aule Menschen sellen jerat woaren un de Woarheit kjanen lieren.

⁵Wiels doa es een Gott, un doa es een Vemedla, dee tweschen Gott un Menschen steit: de Mensch Christus Jesus,

⁶dee sikj selfst hanjeef aus Leesjelt fa aule Menschen. Daut wia to rajchte Tiet Bewies doafäa, daut Gott haben well, daut aule Menschen sellen jerat woaren.

⁷Un ekj wort aus Prädja un Apostel aunjestalt (ekj räd de Woarheit un lieej nich), fa de Velkja een Liera to sennen em Gloowen un en de Woarheit.

⁸Waut ekj nu haben well, es daut de Maunslied, wuaemma see sent, bäden. See sellen heilje Henj opphäwen kjennen, un nich Bettanis ooda Twiewel em Hoat haben.

⁹Un de Frues sellen sikj aunstendich un schmock kjleeden. Äa Straums saul nich em Hoa flajchten ooda Golt un Kralen omhenjen sennen,

¹⁰oba en goode Woakjen, soo aus daut eene Gottesferchtje Fru tookjemt.

¹¹Eene Fru saul em Stellen lieren, un unjadon sennen.

¹²Ekj jäw daut nich too, daut eene Fru aundre lieren saul, uk nich, daut see Har äwa äaren Maun es.

¹³Wäajen Adam wort ieescht jemoakt, un dan Eva.

¹⁴Adam wort uk nich veleit, oba de Fru wort veleit un bruak Gott sien Jesaz.

¹⁵Oba wan see uk Kjinja to Welt brinjen mott, see kaun seelich woaren, wan see em Gloowen un Leew un en de Heiljunk blift, un sikj beharscht.