Read Plautdietsch (Low German) – De Bibel 1. Timotäus 4 Bible Online

1. Timotäus 4 - Plautdietsch (Low German) – De Bibel bible

1. Timotäus 4

¹De Jeist sajcht sea dietlich, daut en de latste Tiet eenje vom Gloowen auffaulen woaren un sikj aun errfierende Jeista un Lieren hoolen, dee vom Soton staumen.

²See woaren to dit jebrocht woaren derch heichlarische Läajna, dee een Brenntieekjen em Jewessen haben.

³Dise lieren, daut Menschen sikj nich befrieen sellen, un vebeeden, daut to äten, waut Gott jemoakt haft, daut dee met Dank aunnämen sellen, dee doa jleewen un de Woarheit kjanen.

⁴Wiels aules, waut Gott jemoakt haft, es goot, un aules, waut eena met Dank aunnemt, brukt nich wajch jeschmäten woaren;

⁵wiels daut es jeheilicht worden derch Gott sien Wuat un derch daut Jebäd.

⁶Wan du de Breeda dit väahoolen deist, dan woascht du Christus Jesus goot deenen, aus eena dee siene Noarunk derch dän Gloowen ut de Woarheit nemt, aun dee du die helst.

⁷Hab nuscht met weltliche Foblen to doonen, met dee, de oole Frues sikj aufjäwen; eew die en jetliche Dinja.

⁸Wiels de kjarpaliche Eewunk halpt nich aul too väl, oba en jetliche Dinja eewen halpt fa dit Läwen uk fa daut eewje Läwen.

⁹Dit Wuat es woa, un loont sikj auntonämen.

¹⁰Dit es daut, wuafäa wie oabeiden un sträwen, [2] wiels wie onse Hopninj opp dän läwendjen Gott jesat haben, dee een Heilant fa aule Menschen es, un besondasch fa dee, dee doa jleewen.

¹¹Dit lia un befäl de Menschen to doonen.

¹²Lot kjeenem opp die rauf kjikjen doawäajen, daut du noch junk best. Sie fa de jleewende een Väabilt em Wuat, em Waundel, en Leew, em Jeist, em Gloowen un en Reinheit.

¹³Hool aun, de Schreft to läsen, to prädjen un to lieren, bat ekj komen woa.

¹⁴Vejat nich von dee Gow, dee du profeetisch kjrieechst aus de Eltestasch die de Henj oppläden.

¹⁵Eew die en diene Oabeit, un jeff die soo doarenn han, daut de Menschen seenen, daut du doarenn toonemst.

¹⁶Sorj soo fa die selfst un fa diene Lia, daut du doabie bliewen woascht. Wan du daut doonen woascht, woascht du die selfst seelich moaken, un uk dee, dee die hieren.