Read Plautdietsch (Low German) – De Bibel 1. Timotäus 5 Bible Online

1. Timotäus 5 - Plautdietsch (Low German) – De Bibel bible

1. Timotäus 5

¹Doo eenen oolen Maun nich utschellen. Räd am soo aun, aus wan hee dien Voda wia, un de jinjre Mana aus Breeda,

²elre Frues aus Mitta, jinjre Frues aus Sestren, un hool diene Jedanken rein.

³Iea de Wätfrues, dee doa werkjlich Wätfrues sent.

⁴Wan eene Wätfru Kjinja ooda Grootkjinja haft, dan lot dee lieren, daut ieeschte äare Christenpflicht aun äare Famielje to bewiesen, un aun de Elren doonen, waut see schuldich sent; wiels daut es soo aus Gott daut jefaulen deit.

⁵Eene Wätfru, dee werkjlich auleen steit, haft äare Hopninj opp Gott jesat un vekjieet Dach un Nacht em Jebäd met Gott.

⁶Dee oba, dee doa huachhäa läft, läft, oba es jeistlich doot.

⁷Un dit brinj an bie, daut see soo läwen daut an nuscht väatoschmieten es.

⁸Wan oba wäa nich fa sien ieejnet Frintschoft sorcht, un besondasch fa dee von siene ieejne Famielje, dee haft doamet sienen Christengloowen aufjesajcht un es oaja aus eena, dee nich jleewen deit.

⁹Lot eene Wätfru bloos dan opp de List jebrocht woaren wan see nich unja 60 Joa oolt es, un bloos emol befriet jewast es.

¹⁰See mott uk soo jeläft haben, daut von äare goode Woakjen jerät woat, un daut see äare Kjinja goot belieet haft. See mott uk sennen gaustfrie jewast un de heilje de Feet jewoschen haben. See mott uk de bedrekjte biejestonen haben un sikj unja aule Omstend bemieecht haben, goodet to doonen.

¹¹Oba jinjre Wätfrues nemm nich opp diene List nopp; wiels wan dee daut velangen no eenem Maun kjrieen, bräakjen dee äa Vespräakjen aun Christus, un wellen sikj befrieen,

¹²un brinjen doaderch de Beschuldjunk äwa sikj, daut see äa Vespräakjen nich jehoolen haben.

¹³Un en soone Tiet sent see en Jefoa ful to woaren, wäarent see von een Hus nom aundren gonen; un nich mau ful woaren, oba aus Schneppanäsen romgonen un pludren äwa Dinja, wuavon nich sull jerät woaren.

¹⁴Doawäajen rod ekj jinjre Wätfrues sikj to befrieen, Kjinja to haben un Husoabeit to doonen, daut de Fient nich eene Uasoak finjt äwa ons to lastren,

¹⁵wiels doa sent soone, dee aul aufjekomen sent un daut met dän Soton hoolen.

¹⁶Wan irjent eene jleewende Fru [3] Wätfrues haft, dee von ar aufhenjich sent, dan lot ar dee methalpen, un lot dee nich eene Laust fa de Jemeent sennen, daut see dee biestonen kaun, dee doa werkjlich Wätfrues sent.

¹⁷Lot de Eltestasch, dee doa goot väastonen, doafäa jehoolen woaren, daut an dobbelde Iea traft, un besondasch dee, dee aum prädjen un lieren schwoa oabeiden.

¹⁸Wiels de Schreft sajcht: “Du saust däm Oss nich daut Mul toobinjen, wan dee drascht”; un: “Een Oabeida es sienen Loon wieet”.

¹⁹Eene Kloag jäajen eenen Eltesta nemm nich aun, wan doa nich twee ooda dree met äa Zeichnis doarhinja stonen.

²⁰Dee, dee biem sindjen bliewen, strof ver aulemaun, daut aundre sikj doaderch ferchten to sindjen.

²¹Ekj saj die en aulem Iernst, ver Gott un Christus Jesus un siene heilje Enjel, daut du die aun dise Räajlen helst, un die von kjeene Spoolunk beräden latst.

²²Sie nich too schwind reed irjentwäm de Henj opptolajen, daut du die doaderch fa aundre äare Sinden veauntwuatlich moakst. Hool diene Henj rein.

²³Drinkj nich mea bloos Wota, oba wiels du soo foaken krank best, drinkj uk een bät Wien wäajen diene Moag.

²⁴Eenje Menschen äare Sinden sent verendach, un gonen an veropp en daut Jerecht. Aundre äare oba, komen mau lota verendach.

²⁵Jrod soo sent uk eenje äare Woakjen, dee doa goot sent, openboa, oba dee, dee nich goot sent, bliewen uk nich vestoaken.