Read Plautdietsch (Low German) – De Bibel 1. Timotäus 6 Bible Online

1. Timotäus 6 - Plautdietsch (Low German) – De Bibel bible

1. Timotäus 6

¹Lot aule Sklowen, dee noch unja daut Joch sent, äare Haren wieet achten to ieren, soo daut nich jäajen Gott sienen Nomen un jäajen onse Lia jerät woat.

²Un lot dee, dee jleewende Haren haben, nich nichachtent jäajen an sennen, wiels see sent Breeda. Lot an leewa soo väl bäta deenen, wiels Jeschwista em Gloowen sent, dee doaderch Jewenst haben. Dit es waut du prädjen un lieren saust!

³Wan irjentwäa met eene aundre Lia oppkjemt un nich met de Woarheit stemt, dee de Har Jesus Christus jerät haft, un uk nich met de Gloowenslia stemt, dee dän Grunt fa een Läwen met Gott lajen deit,

⁴dee es stolt met daut, waut hee sikj enbilt, un vesteit noch nuscht vom Gloowen, un haft een ojjesundet velangen sikj äwa Wieed to strieden. Doarut kjemt Aufgonst, Lastrunk, beesa Vedocht,

⁵un Oneenichkjeit tweschen soone Menschen, dee em denkjen vedunkelt sent, un de Woarheit nich haben. See meenen de Christengloowen es doa, jeschaftlichen Jewenst doaderch to haben.

⁶Un secha es daut een groota Jewenst dän Christengloowen un Fräd to haben.

⁷Wie haben nuscht en dise Welt nenn jebrocht; un doawäajen kjenn wie [4] uk nuscht met rut nämen.

⁸Un wan wie Kjleeda un Äten haben, doamet sell wie tofräd sennen.

⁹Oba dee, dee doa wellen rikj woaren, faulen en Vesieekjungen un loten sikj von onsennje Lesten schlenjen, dee dän Menschen en daut vedoawen un en de Vedaumnis rieten.

¹⁰Jiez es eene Wartel wuarut aulahaunt beeset kjemt; eenje haben sikj daut jelesten loten un sent doaderch vom Gloowen aufjeert un haben sikj selfst doaderch väl Weedoag toojesat.

¹¹Oba du, Mensch, dee du Gott aunjehieescht, go soowaut ut däm Wajch un sträw no daut Goode, no Jerajchtichkjeit, no Gloowen, no Leew, un sie jeduldich un gootmeenent!

¹²Kjamf dän gooden Gloowenskaumf; hool daut eewje Läwen faust, wuatoo Gott die beroopen haft, un wuavon du, ver väle, een goodet Bekjantnis jejäft hast.

¹³Ekj jebeed die ver Gott, von däm aulet Läwen kjemt, un ver Christus Jesus, dee ver Pontius Pilatus een goodet Bekjantnis jeef,

¹⁴daut du de Jebooten rein un oschuldich helst bat ons Har Jesus Christus kjemt.

¹⁵De rajchte Tiet fa am to komen, woat Gott, de Seelja, un eensich Jewaultja, de Kjennich äwa aule Kjennichs, un Har äwa aule Haren bestemmen.

¹⁶Hee es de eensja Onstoaflicha, dee en een Licht wont, wua kjeena hankomen kaun, däm kjeen Mensch jeseenen haft, uk nich seenen kaun. Am jehieet aule Iea un eewje Macht! Amen.

¹⁷Saj de rikje en dise Welt, daut see nich sellen stolt sennen, un äare Hopninj opp daut onsechre Jelt saten, oba opp Gott, dee ons rikjlich aules schenkjt, om daut met Freid to brucken.

¹⁸Saj an see sellen goodet doonen, daut see rikj sent aun goode Woakjen. See sellen mildjäwrich sennen, un jieren aun aundre aufdeelen,

¹⁹wuaderch see sikj eenen Schauz saumlen, dee eenen gooden Grunt fa de Tookunft lajcht, un aul hia, daut woare Läwen kjanen.

²⁰Oo Timotäus! Hool daut secha, waut Gott die aunvetrut haft, un hab nuscht to doonen met daut ladje, weltliche Jeplaupa un daut Jestried, daut doa väastalen saul, daut see väl weeten.

²¹Daut es waut eenje väajäwen, un sent doaderch vom Gloowen jeert. Bliew en de Jnod!