Read Plautdietsch (Low German) – De Bibel 2. Timotäus 2 Bible Online

2. Timotäus 2 - Plautdietsch (Low German) – De Bibel bible

2. Timotäus 2

¹Un du, mien Sän, sie stoakj derch de Jnod, dee en Christus Jesus es!

²Un waut du von mie, derch väle äa Zeichnis jehieet hast, daut vetru true Mana aun, dee em Staund sent uk aundre to lieren.

³Soo aus een gooda Soldot fa Christus Jesus, nemm soo aus ekj, dien Poat von lieden opp die.

⁴Een Soldot dee em Deenst beschafticht es, woat sikj daut nich noch drock moaken fa sien auldoagschet Läwen to sorjen, daut hee däm jefaulen kaun dee am aunjestalt haft.

⁵Soo es daut uk fa dee, dee en de Wad ranen. Wan dee sikj nich aun de Räajlen hoolen, kjrieen dee nich eenen Pries.

⁶Een Foarma, dee schwoa oabeit, saul daut ieeschte Poat von de Arnt kjrieen.

⁷Moakj die daut, waut ekj saj, un de Har woat die halpen daut aula to vestonen!

⁸Denkj aun Jesus Christus, dee vom Doot oppstunt, dee von David häastaumt, soo aus mien Evangelium lieet,

⁹wäajen daut ekj lieden mott un aus een Vebräakja enjestopt sie. Oba Gott sien Wuat es nich faustjenomen.

¹⁰Un wuawäajen ekj dit aula derch go, es, daut Gott sien utjewäldet Volkj uk mucht de woare Seelichkjeit un de eewje Harlichkjeit kjrieen, dee en Christus Jesus to haben es.

¹¹Daut es de Woarheit, soo aus jesajcht woat: Wan wie met am stoawen, woa wie uk met am läwen;

¹²wan wie jeduldich uthoolen, sell wie met am toop rejieren; saj wie ons von am loos, dan woat hee sikj uk von ons loossajen;

¹³wan wie nich jleewen, hee blift tru; hee kaun sikj selfst nich ontru woaren.

¹⁴Hool an dit väa un vemon an iernstlich, en Gott [2] siene Jäajenwuat, sikj nich äwa Wieed to strieden, wuarut nuscht goodet kjemt, oba toom Schoden es fa dee, dee daut hieren.

¹⁵Sie flietich von Gott de Aunerkjanunk to kjrieen, daut du daut Woarheits Wuat rajcht lieren deist, daut du die doamet nich schämen brukst.

¹⁶Jeff die nich auf met ladje, weltliche Räden, wua nuscht doarhinja es; wiels dee brinjen bloos mea Gottloosichkjeit met sikj.

¹⁷Un soon Jeräd frat sikj aus een Kjräft. Hiemenäus un Filetus sent mank dee,

¹⁸dee vom Gloowen aufjeert sent un sajen, daut de Doodes aul oppjestonen sent, un haben doaderch aundre opp däm Errwajch jebrocht.

¹⁹Oba Gott sien fausta Grunt blift stonen un haft dise Enschreft: De Har kjant de sienje, un: Wäa emma sikj to Gott sienen Nomen bekjant, saul sikj von aule Ojjerajchtichkjeit friehoolen.

²⁰En een grootet Hus sent oba nich bloos goldne un selwane Jefässa, oba uk Jefässa von Holt un Leem, eenje sent to eenem ierenvollen Jebruck un eenje jrod daut Jäajendeel.

²¹Un wäa sikj von daut reinicht, daut nich to Ieren es, woat een Jefäs to Ieren sennen, daut doa jeheilicht un reed es, daut de Meista to aule goode Woakjen brucken kaun.

²²Go de Jugentlost ut däm Wajch, un sträw no Jerajchtichkjeit, Gloowen, Leew un Fräd met dee, dee dän Harn ut een reinet Hoat aunroopen.

²³Oba jeff die met kjeen tierichtet, onsennjet Jestried auf, wiels doaderch jeft daut bloos Zank.

²⁴Un däm Harn sien Kjnajcht saul nich zenkjisch sennen. Hee saul to aulemaun frintlich bliewen un een gooda, jeduldja Liera sennen.

²⁵Hee saul siene Jäajna leeftolich trajchtwiesen kjennen; veleicht schenkjt Gott an daut, daut see omkjieren, un daut see de Woarheit kjanen lieren,

²⁶daut see doaderch to Besennunk komen, daut see dän beesen Fient ut de Schlenj komen, en dee hee an helt, to doonen, waut hee velangt.