Read Plautdietsch (Low German) – De Bibel 2. Timotäus 3 Bible Online

2. Timotäus 3 - Plautdietsch (Low German) – De Bibel bible

2. Timotäus 3

¹Denkj doaraun, daut en de latste Doag jreslich schwoare Tieden sennen woaren.

²Menschen woaren väl von sikj selfst hoolen, nom Jelt hinjaraun sennen, sikj selfst huachhoolen, jäajenaun sennen, Lastren, de Elren nich jehorchen, ondankboa, onheilich sennen,

³dee woaren sikj nich goot sennen un nich veseenen loten, sikj unjarenaunda spotten un veachten, sikj nich beharschen un onbandich sennen, daut goode nich lieden kjennen,

⁴sikj unjarenaunda veroden, ruchloos un stolt sennen met daut, waut see sikj enbillen, un daut Vejnieejen leewa haben aus Gott.

⁵See jäwen noch väa gottesferchtich to sennen, oba jleewen nich aun siene Krauft. Von soone Menschen bliew wajch.

⁶Von soone komen dee häa, dee sikj en de Hiesa han un häa schlikjen un soone Frues fa sikj jewennen, dee met Sind beloden sent, un sikj en äare Schwakheit met äare Lost nich rot weeten,

⁷dee doa emma lieren oba niemols bat doa komen, daut see de Woarheit vestonen.

⁸Un jrod soo aus Janes un Jambres Moses jäajenaun wieren, soo sent dise Menschen jäajen de Woarheit. Daut sent Menschen met een vekomnet Jedajchnis, Daugeniksen, dee nich toom Gloowen komen.

⁹Oba dee woaren daut nich to väl waut wieda brinjen, wiels äa Onsenn woat von aulemaun jeseenen woaren, soo aus sikj daut bie jane beid romneem.

¹⁰Du best met miene Lia, mien benämen, mien sträwen, mienen Gloowen, miene Jedult, miene Leew, miene Bestendichkjeit,

¹¹un de lieden dee mie toojesat woaren, bekaunt. Un waut ekj en Antiochia, Ikonion un Liestra uthoolen must, weetst du. Un ut aul däm rad de Har mie rut.

¹²Aul dee, dee dän fausten Wellen haben aus Christen fromm to läwen, motten met Vefoljunk räakjnen.

¹³Oba met de gottloose un veleidende Menschen woat daut je lenja, je schlemma. Dee veleiden un woaren veleit.

¹⁴Du oba bliew bie daut, waut du jelieet hast un die aunvetrut es, wiels du weetst, von wäm du daut jelieet hast.

¹⁵Un wiels du von Kjint aun met de Heilje Schreft bekaunt best, kaun dee die dän Wajch wiesen, woo du derch dän Gloowen aun Christus Jesus kaust seelich woaren.

¹⁶Aule Schreft von Gott jejäft, [3] es wieetvoll ons to belieren, ons uttobätren, ons trajchttowiesen, un ons to unjarechten, woo rajcht to läwen,

¹⁷soo daut een Gottesmensch em Staund es en goode Woakjen jeschekjt to sennen.