Read Plautdietsch (Low German) – De Bibel 2. Timotäus 4 Bible Online

2. Timotäus 4 - Plautdietsch (Low German) – De Bibel bible

2. Timotäus 4

¹Ver Gott un Christus Jesus, dee de Läwendje un de Doodje rechten woat, un dee aus Kjennich met sien Rikj kjemt to harschen, ermon ekj die iernstlich:

²Prädj daut Wuat, auf de Tiet rajcht es ooda nich. Vemon un dreiw, oba bliew doabie jeduldich. Spräakj an Moot too, daut see doaderch waut lieren.

³Wiels doa woat eene Tiet komen, en dee see de jesunde Lia nich mea vedroagen woaren, un see woaren sikj Lierasch aunschaufen, dee soo lieren aus an daut jefelt, dee an bloos noch de Uaren kjitlen.

⁴See woaren äare Uaren von de Woarheit wajch dreien un leewa no Foblen horchen.

⁵Du oba, bliew en aule Omstend derchjedocht un besonnen. Vesaj nich wan du lieden motst. Doo dienen Deenst soo aus daut eenem Evangelisten tookjemt.

⁶Wiels ekj woa aul jeopfat, un de Tiet es hia, daut ekj Aufscheet nämen mott.

⁷Ekj hab dän gooden Kaumf jekjamft, ekj hab bat aum Enj utjehoolen, ekj hab Gloowen jehoolen.

⁸Fa wiedahan licht fa mie eene Jerajchtichkjeits Kroon reed, dee de Har, de jerajchte Rechta mie aun janem Dach jäwen woat. Dee kjrie nich bloos ekj, oba aul dee, dee sikj doa to freien, daut de Har komen woat.

⁹Doo dien mäajlichstet boolt no mie to komen.

¹⁰Wäajen, wiels Demas dise Welt soo goot jeworden es, haft hee mie veloten un es no Tessalonich jetrocken. Kreszens es no Galatien [4] un Titus no Dalmatien jegonen.

¹¹Bloos Lukas es noch bie mie. Brinj Markus met, dän kaun ekj em Deenst goot brucken.

¹²Oba Tiechikus, dän hab ekj no Efesus jeschekjt.

¹³Wan du kjemst, brinj dän Äwarock met, dän ekj en Troas bie Karpus leet, uk de Bieekja, un gaunz secha uk de Buakrollen.

¹⁴Alexanda de Koppaschmett haft mie väl Schoden toojesat. De Har woat am doano beloonen aus siene Woakjen wieren.

¹⁵Heed du die fa däm, wiels dee sad sikj onse Lia met aule Jewault jäajenaun.

¹⁶Aus ekj daut ieeschte mol em Vehia wia, stunt mie kjeena bie. See veleeten mie aula. Mucht daut nich jäajen an jehoolen woaren.

¹⁷Oba de Har stunt mie bie un jeef mie Krauft de Bootschoft to jäwen, daut aule Velkja hieren kunnen, un ekj wort fa däm Leiw sienen Frät veschoont.

¹⁸De Har woat mie ut aulet beese ruträden un secha en sien himlischet Rikj nenbrinjen. Doafäa saul hee von Eewichkjeit to Eewichkjeit jeieet woaren! Amen.

¹⁹Jrees Priszilla un Aquilla, un Onesiforus sien gaunzet Hus.

²⁰Erastus bleef en Korint; oba Trofimus leet ekj krank en Milet.

²¹Doo aulet mäajelje, noch ver däm Winta to komen. Eubulus, Pudens, Linus, un Klaudia un aule Breeda bestalen die to jreessen.

²²Mucht de Har Jesus Christus met dienem Jeist sennen! De Jnod met junt!