Read Plautdietsch (Low German) – De Bibel Titus 2 Bible Online

Titus 2 - Plautdietsch (Low German) – De Bibel bible

Titus 2

¹Du oba motst daut lieren, waut met de jesunde Lia stemt.

²Lia de elre Mana nichta, aunstendich un ierenhauft to sennen, daut see sikj beharschen, eenen jesunden Gloowen haben un leeftolich un jeduldich sent.

³Un jrod soo uk de elre Frues, daut see sikj ierenhauft oppfieren, soo aus daut heilje tookjemt. See sellen nich Pludarie driewen, uk nich aum Wien veskloft sennen. See sellen aundre goodet lieren.

⁴De elre Frues sellen de junge ermootjen äare Mana un Kjinja goot to sennen,

⁵jescheit un frintlich to sennen, rein em Charakta, sikj beharschen, äare Husoabeit verechten un äare Mana unjadon sennen, daut äwa Gott sien Wuat nich jelastat woat.

⁶Jrod soo spräakj de junge Mana Moot too, sikj selfst to beharschen.

⁷En aul disem go du met een goodet Biespel un eene reine, iernste Lia veropp.

⁸Räd heelsome Wieed, dee nich to veuadeelen sent, daut diene Jäajnasch sikj schämen motten, wiels see ons nuscht schlajchtet noräden kjennen.

⁹Saj de Sklowen, daut see äare Haren en aules sellen unjadon sennen, an toom Jefaulen läwen, un nich jäajenaun räden.

¹⁰See sellen nich von an stälen, oba bewiesen, daut opp an to veloten es, daut see de Lia von Gott un Jesus Christus doaderch auntrakjent moaken.

¹¹Wiels Gott siene seelichmoakende Jnod es fa aule Menschen verendach jekomen.

¹²Dee lieet ons uk de gottloose un weltliche Liedenschoften auftosajen, ons to beharschen un opprechtich un gottesferchtich en dise Welt to läwen,

¹³wäarent wie no de seelje Hopninj luaren, daut ons groota Gott un Heilant Jesus Christus en Harlichkjeit komen woat,

¹⁴dee sikj selfst hanjeef ons von aule Ojjerajchtichkjeit to raden, om fa sikj een Volkj to reinjen, daut hee selfst ieejent, un daut jieren goodet doonen well.

¹⁵Dit es dan waut du lieren saust. Ermon un vemon soo aus daut sikj jehieet. Lot die von kjeenem veachten.