Read Plautdietsch (Low German) – De Bibel Titus 3 Bible Online

Titus 3 - Plautdietsch (Low German) – De Bibel bible

Titus 3

¹Hool an daut väa, daut see de Rejierunk un dee, dee Jewault äwa an haben, sellen jehorchen, un emma reed sennen goodet to doonen.

²See sellen äwa aundre nich schlajchtet räden, un to aule Menschen frädlich, frintlich un leeftolich sennen.

³Wiels wie wieren to eene Tiet selfst onveninftich, onjehuarsom, veert, aun veschiedne Lost un Vejnieejen veskloft, un läwden een schlajchtet, aufjenstjet Läwen. Wie worden vestat un vestaden aundre.

⁴Oba aus ons frintelja Gott un Heilant verendach kjeem met woo goot hee aule Menschen wia,

⁵rad hee ons. Daut wia nich, daut wie Jerajchtichkjeits Woakjen opptowiesen hauden, daut wia ut sien ieejnet Metlieden. Wie worden doaderch niejebuaren, daut hee ons wosch, un derch dän Heiljen Jeist nieet Läwen jeef,

⁶dän hee derch Jesus Christus ons Heilant rikjlich äwa ons komen leet,

⁷daut wie, nu daut wie derch siene Jnod sent jerajchtfoadicht worden, Oawen sent, wiels wie de Hopninj opp eewjet Läwen haben.

⁸Dit es een Wuat wuaropp wie ons veloten kjennen, un du saust jrod dit emma wada betoonen, soo daut dee, dee äa vetruen en Gott jesat haben, sikj bemieejen goodet to doonen. Dit es waut goodet, daut aulemaun to nutzen kjemt.

⁹Oba jeff die nich auf met een onsennjet Jezank un Jestried äwa Jeschlajchts Rejistasch un daut Jesaz, dee kjeenem waut nutzen.

¹⁰Wäa Spoolungen aunstalt, sull eemol un dan noch eemol jewoarnt woaren. Dan oba hab wieda nuscht met am to doonen.

¹¹Du weetst, daut soon Mensch em denkjen vekjieet es un wieda sindicht, un sikj doaderch selfst veuadeelt.

¹²Wan ekj Artemas un Tiechikus no die schekjen woa, dan doo aules, waut du kaust, om no mie no Nikopolis to komen, wiels ekj hab mie väajenomen doa toom Winta to bliewen.

¹³Doo uk aules, waut du kaust Zenas dän Ofkot, un Apollos opp däm Wajch to brinjen un doano to seenen, daut an daut aun nuscht fälen woat.

¹⁴Un lot onse Menschen uk lieren goodet to doonen, om doa to halpen, wua daut needich fält, daut see nich onfruchtboa bliewen.

¹⁵Aul dee, dee hia bie mie sent, jreessen junt. Jrees aulem, dee ons em Gloowen goot sent. Mucht de Jnod met junt aula sennen!