Read Plautdietsch (Low German) – De Bibel Filemon 1 Bible Online

Filemon 1 - Plautdietsch (Low German) – De Bibel bible

Filemon 1

¹Ekj Paulus, dee om Christus Jesus sient haulwen faustjenomen sie, un Timotäus ons Brooda, schriew die, Filemon, ons leewa Brooda un Metoabeida,

²un onse Sesta Afia un Archippus, ons Metkjamfa, un diene Husjemeent:

³Mucht Gott ons Voda un Jesus Christus ons Har, junt Jnod un Fräd schenkjen!

⁴Ekj dank mienem Gott jiedatsmol wan ekj fa die bäd,

⁵wiels ekj hia, waut du fa eenen Gloowen aun dän Harn Jesus hast, un woo du diene Leew aun aule Heilje bewiesen deist, daut du an goot best.

⁶Ekj bäd uk doarom daut diene Gloowens Jemeenschoft met mie, daut wirkjen mucht, daut du aul daut goode, waut wie en Christus Jesus haben, noch volstendja kjanen lieescht.

⁷Wie haben doaderch väl Freid un Troost jekjräajen daut du aundre soo goot best, wiels derch die, leewa Brooda, sent de heilje äare Hoaten jestoakjt worden.

⁸Doawäajen, wan ekj aus dien Brooda en Christus, driest jenuach sennen kunn, die to sajen, waut du doonen sust,

⁹woa ekj ekj die leewa en Leew bedden, wiels ekj aul eemol dee oola Paulus sie, un nu noch om Christus Jesus sienen Wellen faustjenomen sie.

¹⁰Ekj hab die waut to froagen fa mienen Sän Onesimus, dee mien ieejna Sän en Christus wort, wäarent ekj faustjenomen sie.

¹¹Dee nuzt die verhäa nuscht, [1] oba es nu fa ons beid eene Help jeworden.

¹²Dän schekj ekj trigj. Nemm du am opp, wiels daut es soo, aus wan ekj mien ieejnet Hoat schekjen wudd.

¹³Ekj wudd am jieren hia jehoolen haben, daut hee mie en diene Städ jedeent haud, nu daut ekj wäajen daut Evangelium ensetten mott.

¹⁴Oba ekj well nuscht onen diene Enweljunk doonen, daut dien goodet doonen nich jedwungen wia, oba ut dienen frieen Wellen kjeem.

¹⁵Veleicht es dit, wuawäajen hee die eene Tietlank wajch kjeem, daut du am opp emma sust trigjhaben,

¹⁶un nich mea aus eenen Sklow, oba aus eenen, dee mea es aus een Sklow; nu aus eenen leewen Brooda, besondasch fa mie, oba woo väl mea fa die, beides em Fleesch uk em Harn.

¹⁷Wan du mie dan fa eenen Poatna hoolen deist, dan nemm am soo opp, aus wan du mie oppnämen wurscht.

¹⁸Un wan hee die irjentwoo Schoden jemoakt haft, ooda waut schuldich es, dan räakjen mie daut aun.

¹⁹Dit schriew ekj, Paulus, met miene ieejne Haunt: Ekj woa daut betolen. Nich noch to sajen, daut du mie die selfst schuldich best.

²⁰Brooda, doo mie daut om onsen Harn sient haulwen togood, daut du mie om Christus sient haulwen daut Hoat leichta moakst.

²¹Ekj schreef die, wiels ekj mie doaropp veloten kunn, daut du wurscht jehuarsom sennen, un ekj weet, daut du mea doonen woascht, aus ekj die saj.

²²Dan uk noch, moak fa mie eene Gauststow reed. Ekj räakjen doamet, daut jie mie derch june Jebäda wada haben woaren.

²³Epafras, mien metjebungna en Christus Jesus, bestalt die to jreessen.

²⁴Soo uk Markus, Aristarch, Demas, un Lukas, miene Metoabeida.

²⁵Mucht onsen Harn Jesus Christus siene Jnod met dienem Jeist sennen! Amen!