Read Plautdietsch (Low German) – De Bibel Hebräa 1 Bible Online

Hebräa 1 - Plautdietsch (Low German) – De Bibel bible

Hebräa 1

¹Gott, dee en verhäaje Tieden foaken un opp väle veschiedne Wäaj derch de Profeeten to onse Vodasch jerät haft,

²haft nu en dise latste Doag derch sienen Sän to ons jerät. Hee haft am doatoo bestemt, aules to oawen. Derch dän Sän haft Gott uk de Welt jemoakt.

³De Sän strolt de Harlichkjeit von Gott ut, däm hee en siene Oat un Wies uk jeneiw likjent. Derch sien kjraftjet Wuat drajcht un unjahelt hee aules waut doa es. Hee haft ons von de Sinden jereinicht, un sikj dan bie de rajchte Haunt von de Majestät em Himmel jesat.

⁴Soo es hee väl hecha to stonen jekomen aus de Enjel, soo väl hecha aus sien Nomen, dän hee jeorwen haft, hecha es aus äara.

⁵To woonen Enjel haft Gott jeemols jesajcht: “Du best mien Sän; ekj sie vondoag dien Voda jeworden?” Ooda: “Ekj woa sien Voda sennen, un hee woat mien Sän sennen?”

⁶Gott sajcht, daut wan hee sienen Ieeschtjebuarnen wada enne Welt nenn brinjen woat, “dan sellen aul siene Enjel am aunbäden”.

⁷Von de Enjel sajcht hee: “Hee moakt siene Enjel soo aus Wint, un siene Deena soo aus Fiaflaumen.”

⁸Oba vom Sän sajcht hee: “Dien Troon, oo Gott, blift emma un eewich. Du harschst äwa dien [1] Rikj en Jerajchtichkjeit.

⁹Du jefst aules rom om jerajcht sennen, un Ojjerajchtichkjeit kaust du nich lieden. Doawäajen haft Gott, dien Gott, Freideneelj äwa die jegoten, mea aus äwa aundre.”

¹⁰Hee säd uk: “Aum Aunfank hast du Har dän Grunt fa dise Welt jelajcht, un de Himmel sent een Woakj von diene Haunt.

¹¹Dee woaren vegonen, du oba woascht bliewen. Dee woaren aula soo aus een Kjleet oolt woaren.

¹²Du woascht dee opprollen aus een Mauntel, un dee omtrakjen aus een Kjleet. [2] Oba du blifst soo aus du best, un dien Läwen nemt kjeen Enj.”

¹³Oba to woonen Enjel haft hee jeemols jesajcht: “Sett hia bie miene rajchte Sied, bat ekj die von diene Fiend eene Footbenkj moaken woa”?

¹⁴Sent de Enjel nich aules Deenstjeista, un doatoo jeschekjt, dee waut de Seelichkjeit oawen woaren to deenen?