Read Plautdietsch (Low German) – De Bibel Hebräa 13 Bible Online

Hebräa 13 - Plautdietsch (Low German) – De Bibel bible

Hebräa 13

¹Blieft faust en de Broodaleew.

²Vejät nich gaustfrie to sennen, wiels doaderch haben eenje Enjel oppjenomen, onen daut to weeten.

³Denkjt aun de faustjenomne, soo aus wan jie uk en Kjäden wieren. Denkjt aun dee, dee meshaundelt woaren, soo aus wan jie selfst to lieden hauden.

⁴De Ehe saul bie aule en Ieren jehoolen woaren, un daut Ehebad saul rein bliewen; wiels Gott woat de Huara un Ehebräakja rechten.

⁵Siet nich hungrich no Jelt. Siet tofräd met waut jie haben. Gott haft jesajcht: “Ekj woa die nich veloten, die nich em Stich loten.”

⁶Soo kjenn wie em vetruen sajen: “De Har es dee, dee mie halpt, ekj woa mie nich ferchten. Waut kaun een Mensch mie aundoonen?”

⁷Denkjt aun june Liera, dee junt daut Gotteswuat jesajcht haben. Kjikjt waut dee fa een Enj haben, un jleeft soo aus dee jleewden.

⁸Jesus Christus es deeselwja jistren un vondoag un fa aule Eewichkjeit.

⁹Lot junt nich derch veschiedne framde Lieren vom rajchten Wajch aufbrinjen. Daut es sea goot wan daut Hoat derch Jnod faust woat. Menschliche Jebooten wäajen waut äten un waut nich äten, kjennen daut nich doonen, dee haben noch kjeenen waut jenuzt.

¹⁰Wie haben eenen Aultoa, von däm dee, waut noch nom oolen Bunt deenen, kjeen rajcht to äten haben.

¹¹De Tieren, wuavon de Priesta daut Bloot aus een Sindopfa en daut Aulaheilichste nenn drajcht, woaren butrem Loaga vebrent.

¹²Doawäajen haft Jesus uk butre Staut jeläden, om de Menschen derch sien ieejnet Bloot to heiljen.

¹³Dan well wie nu uk ut de Staut rut gonen un met am toop de Schaund droagen.

¹⁴Wie haben hia kjeene bliewende Staut, wie sieekjen dee, dee noch komen saul.

¹⁵Dan well wie nu derch Christus Gott emma lowen, un wan aus een Opfa. Daut meent, onse Leppen sellen am bekjanen un lowen.

¹⁶Vejät nich goodet to doonen un aundre mettohalpen. Daut sent Opfa, dee Gott jefaulen.

¹⁷Horcht no june Liera un schekjt junt to daut waut see junt sajen. Dee woaken äwa june Seelen un motten doafäa Räakjenschoft aufjäwen. Daut es bäta fa junt, wan dee daut met Freid doonen kjennen un nich met stänen.

¹⁸Bät fa ons. Wie haben dän Troost, daut wie een goodet Jewessen haben. Wie wellen en aulem waut wie doonen een ordentlichet Läwen fieren.

¹⁹Doot dit soo, ekj saj junt, daut ekj soo schwind aus mäajlich no junt komen kaun.

²⁰Mucht de Frädensgott, dee onsen Harn Jesus, dän grooten Schophoad, vom Doot trigjebrocht haft un derch sien Bloot eenen eewjen Bunt reedjemoakt haft,

²¹junt fäich moaken fa aulet goode un toom doonen von Gott sienen Wellen. Mucht hee en junt [15] derch Jesus Christus daut wirkjen, wuaraun hee een Jefaulen haft. Jesus Christus traft aule Iea von Eewichkjeit bat Eewichkjeit! Amen.

²²Leewe Breeda, hoolt mie daut togood un nämt daut aun, daut ekj junt derch disen korten Breef aunjespornt hab.

²³Jie sellen dit uk weeten, daut ons Brooda Timotäus wada friejeloten worden es. Wan hee boolt bat hia kjemt, well ekj met am toop junt besieekjen.

²⁴Jreest aul june Liera un aule heilje. De Breeda von Italien bestalen junt to jreessen.

²⁵Gott siene Jnod met junt aula!