Read Plautdietsch (Low German) – De Bibel Hebräa 3 Bible Online

Hebräa 3 - Plautdietsch (Low German) – De Bibel bible

Hebräa 3

¹Doawäajen, heilje Breeda, dee jie uk met ons vom Himmel häa jewält sent, kjikjt opp Jesus, dän Apostel un Huagenpriesta, dän wie bekjanen.

²Hee wia Gott tru, dee am enjesat haud, soo aus uk Moses Gott en sien gaunzet Hus [4] tru wia.

³Jesus traft oba jratre Iea aus Moses, soo aus däm Bumeista von een Hus jratre Iea traft aus daut Hus selfst.

⁴Aule Hiesa woaren von wäm jebut. Oba dee, dee aules but, es Gott.

⁵Moses wia woll een trua Deena von Gott mank sienem gaunzen Volkj. Daut wia aus een Tieekjen fa daut, waut noch eemol sull jesajcht woaren.

⁶Oba Christus wia aus Sän tru äwa Gott sien [5] Hus. Daut Hus sent wie, wan wie daut vetruen un de Freid aun onse Hopninj fausthoolen.

⁷Soo aus de Heilja Jeist sajcht: “Vondoag, wan jie siene Stemm hieren woaren,

⁸vehoat june Hoaten nich, soo aus daut passieed, aus see mie en de Wiltnis vesochten, aus see mie soo jäajenaun wieren.

⁹June Vodasch vesochten mie un stalden mie opp de Proow, un hauden doch 40 Joa jeseenen, waut ekj fa an deed.

¹⁰Doawäajen wort ekj bossich äwa dit Volkj un säd: Emma erren see en äa Hoat, un see vestonen miene Wäaj nich.

¹¹Soo schwua ekj en mienem Oaja: See sellen nich en miene Ru nenn komen.”

¹²Seet junt väa, Breeda, daut kjeena von junt een beeset un nich jleewendet Hoat haft, daut von däm läwendjen Gott aufkjemt.

¹³Rät junt unjarenaunda aule Dach Moot too, soolang aus daut noch “vondoag” heet, daut sikj von junt kjeena derch de aunschmäarende Sind hoat moaken lat.

¹⁴Wie jehieren gaunz werkjlich to Christus, wan wie daut vetruen von Aunfank bat Enj fausthoolen.

¹⁵Soo aus jesajcht es: “Vondoag, wan jie siene Stemm hieren, dan vehoat june Hoaten nich, soo aus don, aus see mie vesochten.”

¹⁶Wäa wieren dee, dee doa jehieet hauden un doch jäajenaun wieren? Wieren daut nich aules soone, dee met Moses ut Ägipten rut jetrocken wieren?

¹⁷Un äwa wäm must Gott sikj 40 Joa oajren? Wia daut nich äwa dee, dee doa sindijden, un doot en de Wiltnis ligjen bleewen?

¹⁸Un wäm sest deed Gott met eenem Eit vespräakjen, daut see nich en siene Ru nenn komen wudden, aus dee, dee onjehuarsom wieren?

¹⁹Soo see wie, daut dee nich doa nenkomen kunnen, wiels see nich jleewden.