Read Plautdietsch (Low German) – De Bibel Hebräa 4 Bible Online

Hebräa 4 - Plautdietsch (Low German) – De Bibel bible

Hebräa 4

¹Wiels daut Vespräakjen, en Gott siene Ru nenn to komen, noch steit, well wie gaunz doano seenen, daut kjeena von junt doarenn trigj blift.

²Ons es de goode Norecht jesajcht worden jrod soo aus jane Menschen enne Wiltnis. Oba de jeprädichte Bootschoft holp an nuscht, wiels see nich jleewden, aus see daut hieeden. [6]

³Wie oba, dee wie jleewen, gonen en de Ru nenn, soo aus hee säd: “Ekj schwua en mienem Oaja, daut see nich en miene Ru nenkomen sullen.” Doabie es hee met sien Woakj aul foadich von don aun, aus de Welt jemoakt wort.

⁴Opp eene aundre Städ haft hee vom säwenden Dach soo jesajcht: “Un aum säwenden Dach rud Gott von aul siene Oabeit.”

⁵Un dan säd hee oba uk wada: “See sellen nich en miene Ru nenkomen.”

⁶Wiels daut noch soo steit, daut eenje en dise Ru nenn komen woaren, un dee, dän daut toieescht jeprädicht wort, nich nenn jekomen sent, wiels see nich jleewden un nich jehorchten,

⁷stalt hee noch eemol eenen Dach, een “vondoag”, doafäa reed. Lange Tiet nohäa leet hee derch David sajen: “Vondoag! Wan jie vondoag siene Stemm hieren woaren, dan vehoat june Hoaten nich.”

⁸Wiels wan Josua an to dee Ru jebrocht haud, wudd Gott [7] nohäa nich noch von eenem aundren Dach jerät haben.

⁹Soo jeft daut fa Gott sien Volkj noch eene vesproakne Ru, eene Sabatru.

¹⁰Daut es soo, wäa en Gott siene Ru nenn kjemt, dee rut uk von siene Oabeit, jrod soo aus Gott von siene.

¹¹Well wie doaropp han aule Fliet aunsaten, en dise Ru nenn to komen, daut nich irjentwäa tofaul komen mucht derch onjehuarsom sennen, soo aus jane.

¹²Gott sien Wuat läft un es kjraftich un schoapa aus daut schoapste dobbelt schniedende Schwieet, un schnitt derch bat daut Seel un Jeist uteneen deelt, uk Jläda un Moakjt frie lajcht. Daut Wuat recht de Jedanken un Enstalungen em Hoat.

¹³Doa es nuscht waut Gott nich sitt. Aules licht gaunz frie un opjedakjt ver siene Uagen, un wie motten ons ver am veauntwuaten.

¹⁴Wiels wie Jesus, Gott sienen Sän, aus Huagenpriesta haben, dee derch dän gaunzen Himmel jegonen es, well wie aun ons Bekjantnis fausthoolen.

¹⁵Wie haben nich eenen Huagenpriesta, dee nich met onse Schwakheiten metfeelen kaun, oba eenen, dee en aules krakjt soo vesocht worden es aus wie sent, oba onen to sindjen.

¹⁶Doawäajen well wie voll vetruen nom Jnodentroon gonen, daut wie Metleet kjrieen un Jnod finjen to de rajchte Tiet, wan ons de Help needich fälen woat.