Read Plautdietsch (Low German) – De Bibel Hebräa 8 Bible Online

Hebräa 8 - Plautdietsch (Low German) – De Bibel bible

Hebräa 8

¹De Hauptsach, dee wie to sajen haben, es dit: Wie haben eenen Huagenpriesta, dee em Himmel bie däm Aulmajchtjen sien Troon aun de rajchte Sied sett.

²Hee deent doa aus Huagapriesta em Aulaheilichsten, em woaren Aunbädungszelt, daut Gott selfst oppjestalt haft, un nich een Mensch.

³Jieda Priesta woat aunjestalt, Gowen un Opfa to brinjen. Doawäajen must disa uk waut haben, daut hee opfad.

⁴Wan hee oppe Ieed wudd sennen, wudd hee nich Priesta sennen, wiels doa aul Priesta sent, dee doano opfren aus daut Jesaz daut velangt.

⁵Waut dee doonen es mau een Schauten un een nomoaken von daut himlische, soo aus Gott Moses daut befool, aus dee daut Zelt opprechten sull. Hee säd: “See doano, daut du aules jeneiw no daut Mosta moaken woascht, daut ekj die opp däm Boajch wiesen deed.”

⁶Nu oba haft Jesus een Aumt jekjräajen, daut soo väl bäta es aus daut oole, wiels daut Tastament, wua hee Vemedla es, bätre Vespräakjungen aus Grunt haft.

⁷Wan daut ieeschte Tastament gaunz tofrädstalent jewast wia, wudd daut nich sennen needich jewast, een tweedet to moaken.

⁸Oba Gott wia met de Menschen nich tofräd un säd: “Kjikjt emol, de Tiet kjemt, daut ekj met daut Volkj Israel un met daut Volkj Juda eenen nieen Bunt moaken woa.

⁹Dee woat nich soo sennen aus dee Bunt, dän ekj met äare Vodasch muak, aus ekj dee aune Haunt foot un ut Ägipten rut brocht. Wiels, see sent nich en mienen Bunt jebläwen. Doawäajen dreid ekj mie von an wajch, säd de Har.

¹⁰Dit es de Bunt, dän ekj nohäa met daut Volkj Israel moaken woa, sajcht de Har. Ekj woa an mien Jesaz en äaren Senn jäwen, un woa an daut en daut Hoat nenn schriewen, un woa äa Gott sennen, un see sellen mien Volkj sennen.

¹¹Un kjeena saul sienen Brooda ooda näakjsten mea belieren derwen un sajen: Lia dän Harn kjanen! Wiels dee woaren mie aula kjanen vom kjlansten bat dän jratsten.

¹²Ekj woa mie äwa an erboarmen, un woa äare Sinden vejäwen un nich mea doaraun denkjen.”

¹³Wan hee von “een nieen Bunt” rät, dan meent daut, de ieeschta es oolt jeworden. Un waut äwaellat un utjenuzt es, veschwinjt boolt.