Read Plautdietsch (Low German) – De Bibel Jakobus 3 Bible Online

Jakobus 3 - Plautdietsch (Low German) – De Bibel bible

Jakobus 3

¹Drenjt junt nich doano, Liera to woaren, miene Breeda. Denkjt doaraun, wie Liera woaren strenja von Gott beuadeelt woaren.

²Wie loten ons aula veschiednet to schulden komen. Wäa en aul sien räden nuscht faulschet sajcht, es een volkomna Maun un kaun sienen gaunzen Kjarpa beharschen.

³Wan wie de Pieed oppteemen, daut ons dee horchen motten, dan hab wie dee doaderch gaunz en onse Jewault.

⁴Kjikjt emol no de groote Schäp, dee vom stoakjen Wint jedräwen woaren. Dee woaren vom Kapitän met een kjlienet Rooda doahan jestieet, wuahan hee well.

⁵Soo es uk de Tung een kjlienet Jlett un kaun groote Dinja aunrechten. Waut fa een groota Woolt kaun doch met een kjlienet Fia aunjestekjt woaren!

⁶Un de Tung es een Fia. De Tung es eene ojjerajchte Welt mank onse Jläda, dee dän gaunzen Kjarpa veorreinicht. Dee sat onse gaunze Natua en Flaumen met Fia direkjt ut de Hal.

⁷Menschen haben aulahaunt Tieren, Väajel, Kruptieren un Wotatieren kunt tom moaken,

⁸oba de Tung, daut orruje Dinkj voll dootbrinjendet Jeft, kaun kjeena unja Kontroll brinjen.

⁹Met de Tung low wie Gott dän Voda, un met de Tung flieekj wie de Menschen, dee no Gott sien Bilt jeschaufen sent.

¹⁰Ut eenem Mul kjemt lowen un flieekjen. Miene Breeda, daut saul soo nich sennen.

¹¹Jeft eene Kjwal ut een Loch seetet un betret Wota tojlikj?

¹²Kaun een Fiejenboom Oliewen ooda eene Wienrank Fiejen droagen? Jrod soo ommäajlich kaun eene soltje Kjwal tojlikj seetet Wota jäwen.

¹³Es mank junt irjentwäa weis un vestendich? Dee saul en siene gooden Waundel wiesen daut hee weis un truhoatich es.

¹⁴Wan jie oba betre Aufgonst un ieejennuzjet Sträwen em Hoat haben, dan pucht nich met june Weisheit, wiels daut stemt nich met de Woarheit.

¹⁵Soone Weisheit kjemt nich von bowen. Dee staumt von dise Welt. Dee es onjeistlich un staumt vom Soton.

¹⁶Wua de Menschen aufjenstich un nosikj sent, doa es aules ut de Ordnunk un doa jeit daut bees too.

¹⁷De Weisheit von bowen es ieeschtens rein, dan frädlich, jelind, lat sikj sajen, es voll Metleet un goode Woakjen, es nich partieisch un heichelt nich.

¹⁸Jerajchtichkjeit es eene Arnt, dee en Fräd von dee jeseit woat, dee doa Fräd vebreeden.