Read Plautdietsch (Low German) – De Bibel 1. Johanes 2 Bible Online

1. Johanes 2 - Plautdietsch (Low German) – De Bibel bible

1. Johanes 2

¹Leewe Kjinja, ekj schriew junt dit, daut jie von de Sind wajch bliewen. Wan oba doch wäa sindjen sull, dan hab wie Jesus Christus, dee onen Sind es, un dee bie Gott dän Voda fa ons enstonen deit.

²Christus haft met sien Doot onse Sinden betolt, un nich mau onse, uk von aule Menschen oppe Welt.

³Wan wie Gott siene Jebooten hoolen, kjenn wie doaderch weeten, daut wie am kjanen.

⁴Wäa doa sajcht, daut hee Gott kjant, un oba nich siene Jebooten helt, es een Lieeja, un de Woarheit es nich en am.

⁵Wäa oba Gott sien Wuat nojeit, bie däm es de Leew to Gott volkomen jeworden.

⁶Wäa doa bekjant, en Christus to sennen, sull uk soo läwen aus Christus jeläft haft.

⁷Leewe Frind, waut ekj junt nu schriew es nich een nieet Jeboot. Daut es daut oole Jeboot, daut jie von Aunfank aun jehieet haben. Daut oole Jeboot es daut Wuat, daut jie jehieet haben.

⁸Un doch schriew ekj junt een nieet Jeboot, daut en Jesus Christus woa es un uk en junt, wiels daut diestre veschwinjt, un daut woare Licht schient nu.

⁹Wäa doa sajcht, daut hee em Licht es, oba sienen Brooda fient es, dee es noch em diestren.

¹⁰Wäa sienen Brooda goot es, läft em Licht, un derch am kjemt kjeena tofaul.

¹¹Oba wäa sienen Brooda fient es, es em diestren, un läft uk em diestren, un weet nich wua hee hanjeit, wiels daut diestre am de Uagen veblent haft.

¹²Leewe Kjinja, ekj schriew junt, daut junt de Sinden vejäft sent wäajen Jesus sien Nomen.

¹³Ekj schriew junt Vodasch, wiels jie dän kjanen, dee von Aunfank es. Ekj schriew junt junge Mana, wiels jie dän beesen besiecht haben.

¹⁴Ekj hab junt Kjinja jeschräwen, wiels jie dän Voda kjanen. Ekj hab junt Vodasch jeschräwen, dee jie dän kjanen, dee von Aunfank es. Ekj hab junt junge Mana jeschräwen, dee jie stoakj sent un Gott sien Wuat em Hoat haben un dän beesen besiecht haben.

¹⁵Siet nich hinjaraun no daut waut de Welt auntobeeden haft. Wäa de Welt un äare Lost jieren haft, en däm es nich de Leew vom Voda.

¹⁶Wiels aules waut en dise Welt es, jeltjierich sennen, hinjaraun sennen no waut de Uagen jankat un sikj groot doonen, daut staumt nich vom Voda. Daut es von dise Welt.

¹⁷De Welt un waut dee auntobeeden haft woat vegonen. Wäa oba deit waut Gott well, woat eewich bliewen.

¹⁸Kjinja, de latste Stund es hia! Un jie haben jehieet, daut de Jäajenchrist komen woat. Doa sent nu aul väl Jäajenchristen jekomen. Doawäajen weet wie, daut de latste Tiet hia es.

¹⁹Dee sent von onse Medd rutjegonen, oba dee wieren nich von ons. Wan dee von de onse jewast wieren, wieren see bie ons jebläwen. Oba dee jinjen rut, daut daut to seenen wia, daut see nich von de onsaje wieren.

²⁰Oba junt haft Christus dän Heiljen Jeist jejäft, un jie weeten de Woarheit.[2]

²¹Ekj hab junt nich doawäajen jeschräwen, aus wan jie de Woarheit nich weeten. Jie weeten de Woarheit un daut von de Woarheit kjeene faulsche Lia komen kaun.

²²Wäa doa sajcht, daut Jesus nich de Christus es, es daut nich een Lieeja? Wäa dän Voda un dän Sän nich aunerkjant, daut es de Jäajenchrist.

²³Wäa dän Sän nich aunerkjant, haft uk dän Voda nich. Wäa sikj oba to Jesus dän Sän von Gott bekjant, dee haft uk dän Voda.

²⁴Hoolt daut em Gloowen faust waut jie von Aunfank jehieet haben. Wan daut bie junt bliewen woat, waut jie von Aunfank jehieet haben, dan woa jie uk met dän Voda un met dän Sän vebungen bliewen.

²⁵Daut es waut hee ons [3] vesproaken haft: daut eewje Läwen.

²⁶Ekj hab junt von dee jeschräwen, dee junt veleiden wellen.

²⁷Oba jie haben dän Heiljen Jeist jekjräajen, un dee läft en junt, un jie haben daut nich needich, daut junt wäa belieren mott. Waut de Jeist junt lieet es woa un nuscht jeloagen. Un soo aus hee junt lieet, soo blieft en am.

²⁸Un nu, Kjinja, blieft en am. Dan kjenn wie secha sennen wan hee komen woat un woaren nich ver am toschaund woaren.

²⁹Wan jie weeten, daut Gott jerajcht es, weet jie uk, daut wäa daut rajchte deit, dee es von Gott jebuaren un es sien Kjint.