Read Plautdietsch (Low German) – De Bibel Rechta 10 Bible Online

Rechta 10 - Plautdietsch (Low German) – De Bibel bible

Rechta 10

¹No Abimelech sienen Doot kjeem wada een Maun opp, om Israel to raden. Daut wia Tola, Puwa sien Sän, un Dodo sien Grootsän ut däm Staum Isachar. Hee wond en Schamir opp daut Boajlaunt en Efraim.

²Hee wia 23 Joa Rechta en Israel. Dan storf hee un wort en Schamir begroft.

³No am kjeem Jair ut de Launtschoft Gilead opp un wort fa 22 Joa Rechta en Israel.

⁴Hee haud 30 Säns, dee opp 30 Äsels reeden un 30 Städa hauden. Dise Städa ligjen en Gilead un heeten bat dän vondoagschen Dach “Jair Darpa”.

⁵Un Jair storf un wort en Kamon begroft.

⁶Oba de Israeliten deeden wada, waut däm HARN schlajcht jefoll, un deenden de Baal Jetta un de Astarten, un uk de Jetta von Aram, de Jetta von Sidon, de Jetta von de Moabita un Amonita, un de Jetta von de Filista. Däm HARN oba dreiden see dän Rigjen un deenden am nich.

⁷Dan brend däm HARN sien Oaja äwa Israel opp, un hee jeef an en de Filista un de Amonita äare Jewault.

⁸Un 18 Joa worden aule Israeliten, waut aun jantsied Jordan en Gilead, en daut frieejoasche Amorita Launt, wonden, von de Amonita furchtboa unjadrekjt.

⁹Un de Amonita kjeemen uk äwa dän Jordan un jreepen de Stam Juda, Benjamin un Efraim aun. Soo jerod Israel en eene groote Unjadrekjunk.

¹⁰Dan schrieejen de Israeliten nom HARN om Help un säden: Wie haben ons jäajen die vesindicht, wiels wie onsen Gott veloten un de Baal Jetta jedeent haben.

¹¹Oba de HAR säd to de Israeliten: Haben junt nich uk de Ägipta, de Amorita, de Amonita, de Filista,

¹²de Sidonia, de Amalekita un de Maonita unjadrekjt? Oba ekj holp junt ut äare Jewault rut, aus jie no mie om Help schrieejen.

¹³Un dan hab jie mie doch wada veloten un aundre Jetta jedeent. Doawäajen well ekj junt nich mea raden.

¹⁴Got doch to de Jetta schrieen, waut jie junt utjesocht haben! Lot dee junt en june Noot halpen!

¹⁵Oba de Israeliten säden toom HARN: Wie haben jesindicht, doo met ons, soo aus die daut jefelt, oba lot ons nich unjagonen; rad ons doch vondoag!

¹⁶Un see schauften de Bilda von de framde Jetta wajch un deenden wada däm HARN. Dan wort am daut to groff, daut de Israeliten soo jeploacht worden.

¹⁷De Amonita vesaumelden sikj toom Kjrich un stalden äa Loaga en Gilead opp; de Israeliten oba vesaumelden sikj bie Mizpa.

¹⁸Un de väaschte Mana ut de Launtschoft Gilead fruagen sikj besorcht: Wäa es de Maun, dee dän Aunfank moakt, met de Amonita to kjamfen? Wäa daut äwanemt, saul Gowernia äwa aule Enwona en Gilead woaren.