Read Plautdietsch (Low German) – De Bibel Rechta 12 Bible Online

Rechta 12 - Plautdietsch (Low German) – De Bibel bible

Rechta 12

¹De Mana von Efraim worden toopjeroopt un jinjen no Zafon un säden to Jefta: Wuarom best du toom Kjrich jegonen jäajen de Amonita un hast ons nich jeroopt, daut wie metkomen kunnen? Wie woaren die met dien Hus toop vebrennen!

²Dan säd Jefta to an: Ekj un mien Volkj musten eenen schwoaren Kaumf jäajen de Amonita bestonen. Un ekj hab junt uk jeroopt, oba jie haben mie nich jeholpen.

³Un aus ekj sach, daut jie nich halpen wullen, jeef ekj mien Läwen han un jinkj jäajen de Amonita, un de HAR jeef dee en miene Jewault. Wuarom kom jie nu no mie, om met mie to kjamfen?

⁴Un Jefta vesaumeld aule Mana von Gilead un kjamft jäajen de Mana von Efraim un besiejd dee. See wieren vebettat, wiels de Mana von Efraim jesajcht hauden: Jie sent je bloos een Aunhenjsel von Efraim, wiels jun Launt Gilead licht medden en daut Launtstekj von Efraim un Manasse!

⁵Un de Mana von Gilead besaden de Äwajenj biem Jordan, wua de Efraimita äwagonen wullen. Wan dan een Flichtlinkj ut Efraim doaräwa wull, fruagen see am: Staumst du ut Efraim? Un wan hee dan nä säd,

⁶foddaden see am opp: Saj emol Schibbolet! Säd hee oba: Sibbolet, wiels hee daut nich aundasch utspräakjen kunn, jreepen see am un schluagen am doot. Soo kjeemen doa aun de Äwajenj biem Jordan 42.000 Mana ut Efraim to dood.

⁷Jefta wia sas Joa Rechta en Israel. Un aus hee storf, wort hee en siene Staut en Gilead begroft.

⁸Jefta sien Nofolja aus Rechta en Israel wia Ibzan ut Betlehem.

⁹Dee haud 30 Säns un 30 Dajchta. Hee vesorjd Mana von buten fa aul siene 30 Dajchta un hold uk 30 Frues von buten fa siene Säns. Un hee wia säwen Joa Rechta en Israel,

¹⁰un dan storf hee un wort en Betlehem begroft.

¹¹No däm wort Elon, ut däm Staum Sebulon, Rechta, un dee wia tieen Joa Rechta en Israel,

¹²un dan storf hee un wort en Ajalon en daut Launtstekj von Sebulon begroft.

¹³Un no däm wort Abdon, Hillel sien Sän ut Piraton, Rechta en Israel.

¹⁴Dee haud 40 Säns un 30 Grootsäns, waut opp 70 Äsels reeden. Un hee wia acht Joa Rechta en Israel,

¹⁵un dan storf hee un wort en Piraton, en daut Launtstekj von Efraim aun de Amalekita Boaj, begroft.