Read Plautdietsch (Low German) – De Bibel Rechta 15 Bible Online

Rechta 15 - Plautdietsch (Low German) – De Bibel bible

Rechta 15

¹Eene korte Tiet lota, aus jrod Weit jearnt wort, wull Simson siene Fru besieekjen un ar een Kosenbockje brinjen. Hee säd to äaren Voda: Ekj mucht en de Stow nenn no miene Fru gonen! Oba äa Voda leet am nich nenn,

²un säd: Ekj wia en de Meeninj, die wia daut met ar gaunz enoolent jeworden, doawäajen hab ekj dienen Bejleita dee jejäft. See haft oba eene jinjre Sesta, waut noch bäta lat aus äa; dee kaust du en äare Städ haben!

³Dan säd Simson to an: Ditmol sie ekj frie von Schult, wan ekj de Filista beeset aundoo!

⁴Simson jinkj un jreep sikj 300 Fas, un bunk emma twee met de Zäajel toop un stuak eenen Fiastock en däm Knoppen.

⁵Dan stekjt hee de Fiastakja aun un leet de Fas opp de Filista äare Jeträajd Flekja loos. Soo jinjen de Goawen, un daut riepe Jeträajd waut noch opp de Flekja stunt, en Flaumen opp; un uk en de Wien un Oliewengoades brend daut Fia nenn.

⁶Dan fruagen de Filista: Wäa haft daut jedonen? Un dan wort jesajcht: Simson, däm Maun von Timna sien Schwieesän. Daut es de Rach doafäa, daut dee am de Fru wajchjenomen un däm Bejleita jejäft haft! Dan jinjen de Filista doahan un vebrenden de Fru met äaren Voda toop.

⁷Simson säd to an: Wan jie daut soo doonen, woa ekj kjeene Ru haben, bat ekj aun junt Rach jeeeft hab!

⁸Un hee schluach an dol, soo daut see eenen grooten Schoden kjrieejen. Un dan trock hee sikj trigj un wond en de Steenaheel bie Etam.

⁹De Filista jinjen un loagaden sikj en Juda un breeden sikj bie Lehi ut.

¹⁰Oba dee von Juda fruagen: Wuarom sent jie jäajen ons oppjekomen? De Filista auntwuaden: Wie wellen Simson faustnämen un am daut trigjtolen, waut hee ons aunjedonen haft.

¹¹Dan jinjen 3.000 Mana von Juda no de Heel bie Etam un säden to Simson: Wuarom hast du ons en soone Jefoa jebrocht? Wist du nich, daut de Filista äwa ons rejieren? Simson oba säd to an: Ekj hab an bloos trigjetolt, waut see mie aunjedonen haben.

¹²Dan säden de Mana von Juda: Wie sent jekomen, die to binjen un en de Filista äare Henj to jäwen. Simson säd to an: Jie motten mie oba schwieren, daut jie selfst mie nuscht aundoonen woaren!

¹³See auntwuaden am: Wie wellen die bloos binjen un en äare Henj jäwen, un vesechren die, daut wie die nich doot moaken woaren. Un see bungen am met twee niee Strenj un brochten am ut de Heel rut.

¹⁴Un aus Simson no Lehi jebrocht wort, stemden de Filista een Siejes Jeschrech aun. Oba däm HARN sien Jeist kjeem äwa am, un hee vereet de Strenj aun siene Oarms, aus wan daut Frensen wieren waut vom Fia vebrent wieren, soo daut de Strenj aun siene Henj veschmolten.

¹⁵Dan funk hee eenen freschen Äsel Bakknoaken un neem sikj däm enne Haunt un schluach doamet 1.000 Filista doot.

¹⁶Un Simson säd: Met eenen Äsel Bakknoaken hab ekj an en Klompes jehiept; met eenen Äsel Bakknoaken hab ekj 1.000 Mana dootjeschloagen.

¹⁷Un aus hee daut jesajcht haud, schmeet hee dän Bakknoaken fuat. Un von dan haft de Städ dän Nomen Ramat Lehi (Bakknoaken Boajch).

¹⁸Aus am sea darschten deed, roopt hee dän HARN aun un säd: Du hast soonen grooten Siech jejäft derch dienen Deena siene Haunt; nu oba mott ekj vedarschten un en de onbeschnädne äare Henj faulen!

¹⁹Dan spoold Gott de Hollinj von Lehi, daut doa Wota rutrand. Un aus Simson doavon drunk, läwd hee wada opp, un siene Krauft kjeem wada trigj. Doawäajen heet de Städ: “Roopakjwal”; un dee es doa en Lehi vondoag noch to finjen.

²⁰Un en dee Tiet, aus de Israeliten von de Filista unjadrekjt worden, wia Simson 20 Joa Rechta en Israel.