Read Plautdietsch (Low German) – De Bibel Rechta 17 Bible Online

Rechta 17 - Plautdietsch (Low German) – De Bibel bible

Rechta 17

¹Opp daut Boajlaunt en Efraim läwd een Maun met Nomen Micha.

²Dee säd to siene Mutta: De 1.100 Selwastekja, waut die sent wajchjenomen worden un wuawäajen du ver miene Uaren dän Fluch utjesproaken hast, daut Jelt es bie mie; ekj selfst hab daut jenomen. Dan säd siene Mutta: Du best vom HARN jesäajent, mien Sän!

³Aus Micha ar de Selwastekja trigjeef, säd see: HAR, ekj wei die daut Jelt nu, om daut du mienen Sän säajnen kaust. Doa saul een Gottesbilt von jemoakt un een Aufgott jegoten woaren. Soo kjemt am daut Jelt wada togood.

⁴Un hee jeef siene Mutta daut Jelt trigj. Dan neem siene Mutta 200 Selwastekja un jeef däm Goltschmett dee. Un dee muak een Gottesbilt un eenen jegotnen Aufgott, un daut wort en Micha sien Hus oppjestalt.

⁵Soo haud de Maun Micha eene Städ toom aunbäden. Hee leet uk eenen Efod un Husjetta moaken un sad eenen von siene Säns aus Priesta en.

⁶To dee Tiet wia kjeen Kjennich en Israel, un een jiedra deed, waut hee fa rajcht hilt.

⁷Doa wia oba een junga Maun ut Betlehem en Juda, ut eene Volkjsgrupp en Juda; daut wia een Levit, un wond doa aus een framda.

⁸De Maun trock oba ut de Staut Betlehem rut, om eene Städ to finjen, wua hee bliewen kunn. Un sien Wajch fieed am derch daut Boajlaunt en Efraim un uk bat Micha sienen Hoff.

⁹Dan fruach Micha am: Wua kjemst du häa? Hee auntwuad am: Ekj sie een Levit ut Betlehem en Juda, un sieekj no eene Städ wua ekj aus framda wonen kaun.

¹⁰Dan säd Micha to am: Bliew doch bie mie, du saust aus mien Voda un mien Priesta sennen! Ekj well die jieda Joa tieen Selwastekja un diene Kjleeda un Noarunk jäwen.

¹¹De Levit wia doamet envestonen un bleef doa; un hee wort doa aus een Sän behaundelt.

¹²Un Micha weid däm Levit toom Priesta. Un de junga Maun wort sien Priesta un bleef en Micha sien Hus.

¹³Micha oba säd: Nu weet ekj, daut de HAR mie goodet doonen woat, wiels ekj eenen Levit toom Priesta hab.