Read Plautdietsch (Low German) – De Bibel Rechta 20 Bible Online

Rechta 20 - Plautdietsch (Low German) – De Bibel bible

Rechta 20

¹Aule Mana von Israel von Dan em Nuaden bat Beerscheba em Sieden un uk dee ut Gilead em Oostjordan Launt vesaumelden sikj un worden sikj eenich ver däm HARN sien Heilichtum en Mizpa.

²Un nich bloos de väaschte Mana von de Stam kjeemen toop, uk de gaunze Jemeent von Israel vesaumeld sikj, 400.000 Mana waut tofoot wieren, un met een Schwieet bewaufnet wieren.

³Oba de Benjaminita hieeden doavon, daut gaunz Israel no Mizpa jekomen wia. Un de Israeliten säden: Sajcht doch, woo dit schentelje passieet es?

⁴Dan auntwuad de Levit, de Maun to de Fru, waut doa dootjemoakt wia, un säd: Ekj kjeem met miene Näbenfru no Gibea en Benjamin, om doa äwa Nacht to bliewen.

⁵Dan muaken de Birja von Gibea sikj jäajen mie opp un besaden wäajen mie de Nacht daut Hus. See wullen mie ombrinjen. Un miene Näbenfru haben see soo lang vejewaulticht, bat see storf.

⁶Dan neem ekj miene Näbenfru un veschneet dee un schekjt de Stekja no jieda Staum von daut Oaflaunt en Israel. Wiels de Mana von Gibea haben een Vebräakjen un waut Onveschämdet en Israel jedonen.

⁷Jie sent hia nu aula toop, jie Israeliten. Nu doot junt beroden un beschluten, waut passieren saul!

⁸Dan stunden see aula en Eenichkjeit opp un säden: Kjeena von ons doaf trigj no Hus gonen,

⁹ea wie de Lied von Gibea bestroft haben! Wie wellen lossen

¹⁰un jieda tieenda Maun, ut aule Stam von Israel, doatoo bestemmen fa daut Volkj, waut doa jekomen es, Äten to vesorjen, om Gibea en Benjamin fa daut onveschämde, waut see medden en Israel jedonen haben, to bestrofen.

¹¹De Mana von Israel vesaumelden sikj en Eenichkjeit toopjeschloten, jäajen de Staut Gibea.

¹²De Stam von Israel schekjten Bootschofta veropp derch dän gaunzen Staum Benjamin un leeten an sajen: Waut es daut fa Oppscheiseljet, waut bie junt passieet es?

¹³Nu jäft ons de Mana rut, de onveschämde Menschen von Gibea! Daut wie dee doot moaken kjennen un soo daut beese ut Israel utroden. Oba de Benjaminita wullen äare Breeda, de aundre Israeliten, nich jehorchen.

¹⁴Un de Benjaminita vesaumelden sikj ut de Städa no Gibea, om jäajen de Israeliten toom Kaumf to gonen.

¹⁵Un doa worden aun däm Dach 26.000 Mana ut de Städa von Benjamin jetalt, waut daut Schwieet to brucken vestunden, un dan noch 700 utjeläsde Mana von de Birja von Gibea.

¹⁶Un mank dit gaunze Volkj wieren 700 utjeläsde Mana, waut linkjsch wieren un met däm Schleida een Hoa, secha trafen kunnen.

¹⁷Oba von Israel, buta de Benjaminita, worden 400.000 Mana jetalt, waut aula met een Schwieet bewaufnet wieren; un aules stoakje Kjrieja wieren.

¹⁸De Mana von Israel jinjen no daut Heilichtum en Betel, om von Gott Rot to holen. See fruagen am: Wäa von ons saul daut väaschte en dän Kaumf jäajen Benjamin gonen? De HAR säd: De Staum Juda.

¹⁹Soo muaken de Israeliten sikj tiedich zemorjes opp, un jinjen bat ver Gibea

²⁰un stalden sikj toom Kaumf jäajen de Mana von Benjamin opp.

²¹Dan kjeemen de Benjaminita ut Gibea rut un schluagen aun däm Dach 22.000 von de Israeliten doot.

²²Dan jinjen de Israeliten trigj no Betel. See hielden dän gaunzen Dach bat aum Owent, ver däm HARN äwa äaren Velust. Dan fruagen see däm HARN: Sell wie noch emol jäajen onse Breeda, de Benjaminita, toom Kaumf gonen? De HAR auntwuad: Got jäajen an!

²³Dan spruaken de Mana von Israel sikj Moot to un stalden sikj aum näakjsten Dach noch emol opp de selwje Städ opp.

²⁴Un aus de Israeliten aum näakjsten Dach bat dicht aun de Benjaminita kjeemen,

²⁵dan kjeemen de Benjaminita wada ut de Staut rut un schluagen von de Israeliten 18.000 Kjrieja doot, waut aula met een Schwieet bewaufnet wieren.

²⁶Dan jinjen aule Israeliten, daut gaunze Kjrichsvolkj, no Betel un hielden ver däm HARN äwa äaren Velust. See deeden fausten bat aum Owent un brochten däm HARN Brauntopfa un Dankopfa.

²⁷Un de Israeliten befruagen däm HARN. Wiels to jane Tiet wia Gott siene Bundeskjist dort,

²⁸un Pinhas, Eleasar sien Sän un Aaron sien Nokomen, verecht doa dän Priesta Deenst. Un see fruagen: Sell wie noch eemol loosgonen, om jäajen de Benjaminita, onse Breeda, to kjamfen, ooda sell wie daut oppjäwen? De HAR säd: Got han, morjen well ekj an en june Henj jäwen.

²⁹Ditmol brukten de Israeliten eene Lest un vestuaken eenen Deel von äare Mana opp veschiedne Städen runtom Gibea.

³⁰Dan stalden see sikj krakjt soo aus aun de väaje beid Doag ver de Staut toom Kaumf opp.

³¹Aus de Mana von Benjamin ut de Staut kjeemen, leeten de Israeliten sikj toom Schien von an trigjschlonen un lokten an von de Staut wajch. Opp de Wäaj, oppe kole Stap, wuavon dee eena no Betel un de aundra no Gibeon jeit, schluagen de Mana von Benjamin bie 30 Israeliten doot.

³²Dan dochten de Benjaminita: Wie schlonen dee wada trigj soo aus verhäa! Oba de Israeliten hauden sikj daut berät: Wie wellen flichten, om daut wie an von de Staut wajchlocken opp de beid Wäaj nopp!

³³Oba bie Baal Tamar hilden see aun un stalden sikj toom Kaumf opp. Un to jlikje Tiet kjeemen de Mana von Geba nom Wasten han ut äaren Vestäakj rut.

³⁴Un 10.000 utjesochte Kjrieja, jinjen loos jäajen Gibea. Oba de Mana von Benjamin wieren onungsloos enne Faul jeroden. Un daut kjeem to eenen schwoaren Kaumf.

³⁵Un de HAR holp de Israeliten jäajen de Benjaminita, soo daut de Israeliten aun däm Dach 25.100 Benjaminita doot schluagen, waut aula met een Schwieet bewaufnete wieren.

³⁶Dan musten de Benjaminita daut seenen, daut see jeschloagen wieren. Un de Mana von Israel jeewen de Benjaminita Rum, wiels see veleeten sikj opp de Grupp waut see aun Hinjakaunt dicht bie de Staut aunjelajcht hauden.

³⁷Dan kjeemen de Mana von Hinjakaunt äwadäl, un äwafollen de Staut un schluagen aule Enwona met daut schoape Schwieet doot.

³⁸Un soo aus daut berät wia, stekjten see de Staut aun, soo daut von dee eene Ruakwolkj oppjinkj.

³⁹Aus de Israeliten sikj em Kaumf oppe Flucht jeewen un de Benjaminita aum Aunfank bie 30 Mana von de Israeliten dootjeschloagen hauden, soo daut see dochten: Dee hab wie wada jeschloagen soo aus em väajen Kaumf!

⁴⁰Dan funk von de Staut, eene Ruakwolkj aun opptogonen. Un aus de Mana von Benjamin sikj omkjikjten, sagen see, daut de gaunze Staut en Flaumen stunt.

⁴¹Un de Mana von Israel wongen om toom kjamfen, oba de Mana von Benjamin jinkj een groota Schrakj derch, wiels see sagen, daut fa an aules veloaren wia.

⁴²Un see flichten fa de Israeliten no de Wiltnis opptoo, oba äare Vefolja bleewen an oppe Haken, un von de aundre Sied neemen de Israeliten waut von de Staut kjeemen, an enne Kjlam.

⁴³De Mana von Benjamin worden omkjrenst, jesprenjt un doljeschloagen von Noha bat nom Oosten han bat Gibea.

⁴⁴Doa follen von Benjamin 18.000 stoakje Mana.

⁴⁵Eene Grupp kjeem noch wajch un rand no de Stap opptoo, no däm Rimmon Steen. Oba de Mana von Israel schluagen doa oppe Wäaj noch 5.000 Benjaminita doot un vefoljden dee wieda bat Gidom un schluagen doa noch 2.000 Mana von an doot.

⁴⁶Soo follen aun däm Dach aules toop 25.000 Mana ut däm Staum Benjamin, waut aula met een Schwieet bewaufnet, un stoakje Kjrieja wieren.

⁴⁷Mau bloos 600 Mana kjeemen bat däm Rimmon Steen un bleewen doa vea Moonat.

⁴⁸De Mana von Israel oba reisden derch daut gaunze Launtstekj von Benjamin un muaken aules doot, Menschen un Vee, un brenden de Städa un Darpa dol.