Read Plautdietsch (Low German) – De Bibel Rechta 21 Bible Online

Rechta 21 - Plautdietsch (Low German) – De Bibel bible

Rechta 21

¹De Mana von Israel hauden en Mizpa jeschwuaren un jesajcht: Kjeena von ons doaf siene Dochta eenen Maun ut Benjamin to Fru jäwen!

²Un de Israeliten kjeemen no daut Heilichtum en Betel un schrieejen dän gaunzen Dach ver Gott. See hielden sea, un säden:

³HAR, du Gott en Israel, wuarom es daut en Israel passieet, daut Israel vondoag een Staum weinja jeworden es?

⁴Aum näakjsten Morjen muak daut Volkj sikj tiedich opp un bud dort eenen Aultoa un opfad Gott Brauntopfa un Dankopfa.

⁵Dan wort jefroacht; Es von de Stam en Israel irjentwäa nich jekomen, aus to de Vesaumlunk ver däm HARN oppjeroopt wort? Wiels see hauden jeschwuaren: Wäa nich nom HARN no Mizpa kjemt, mott stoawen!

⁶Un de Israeliten deed daut leet om äaren Broodastaum Benjamin, un see säden: Vondoag es een gaunza Staum ut Israel utjerot.

⁷Woo wudd wie an halpen kjennen, daut de äwajebläwne Benjaminita to Frues komen? Wiels wie haben bie däm HARN jeschwuaren, daut wie an kjeene von onse Dajchta to Frues jäwen!

⁸Un see fruagen: Es veleicht eena ut de Stam von Israel nich to de Vesaumlunk ver däm HARN jekomen? Un werkjlich, ut de Staut Jabesch en Gilead wia kjeena no daut Loaga to de Vesaumlunk jekomen.

⁹See talden daut Volkj, un stalden faust, daut doa kjeen Birja ut Jabesch en Gilead wia.

¹⁰Dan schekjt de Vesaumlunk von Israel doa 12.000 Kjrieja han met däm Oppdrach: Got han un schlot de Birja von Jabesch en Gilead met Frues un Kjinja toop met Schwieed doot!

¹¹Un daut es, waut jie doonen sellen: Aun aule Mana, un aun aule Frues, waut eenen Maun jehaut haben, sell jie dän Baun derchfieren!

¹²Un see fungen mank de Birja von Jabesch en Gilead 400 Mejales, dee onbefriet wieren un kjeenen Maun aunjehieeden. Dee brochten see no daut Loaga en Silo, waut em Launt Kanaan licht.

¹³Dan schekjten de vesaumelde Israeliten Bootschofta han un vehaundelden met de Benjaminita, waut opp dän Rimmon Steen wieren, un vespruaken an Fräd.

¹⁴Soo kjeemen de Benjaminita to jane Tiet trigj. Un see jeewen an de Mejales, dee see bie de Bestrofunk von Jabesch en Gilead veschoont hauden. Oba daut wieren noch nich jenuach fa an.

¹⁵De Israeliten wieren truarich, wiels de HAR eenen Staum ut äare Medd rutjeräten haud.

¹⁶Un de Leida vom Volkj säden: Woo sell wie de äwajebläwne Benjaminita Frues veschaufen? Wiels en gaunz Benjamin es kjeene Fru aum Läwen jebläwen.

¹⁷Un de äwaläwende von Benjamin motten doch äa Oafgoot hoolen, om daut nich een Staum von Israel utstoaft.

¹⁸Oba wie kjennen an onse Dajchta nich to Frues jäwen, wiels de Israeliten jeschwuaren un jesajcht haben: Veflucht es dee, dee eenen Maun ut Benjamin eene Fru jeft!

¹⁹Un see säden: Kjikjt, jieda Joa woat en Silo däm HARN to Ieren een Fast jefieet. Silo lach nom Nuaden von Betel, un nom Oosten von de Gaus, waut von Betel no Sichem jeit, un nom Sieden han von Lebona.

²⁰Un see säden to de Benjaminita: Got un lajcht junt en de Wiengoades oppe Lua,

²¹un wan jie dan seenen, daut de Mejales von Silo toom Fastdaunz komen, dan moaracht ut de Wiengoades rut un jriept junt jieda eene Fru un nämt dee met no Hus nom Staum Benjamin.

²²Wan oba äare Vodasch ooda äare Breeda komen un sikj bie ons doaräwa bekloagen, dan woa wie to an sajen: Erboarmt junt äwa ons, wie haben nich fa eenen jiedren eene Fru jefungen en däm Kaumf; un jie haben an dee uk nich jejäft, soo daut jie aun nuscht schuldich sent.

²³De Mana von Benjamin befoljden dän Rot, un jreepen sikj jieda eene von de daunzende Mejales un neemen sikj dee to Fru. Dan jinjen see trigj no äa Oafgoot, buden de Städa wada opp un wonden doabennen.

²⁴Uk de Israeliten jinjen utenaunda, een jiedra no sienen Staum un no siene Volkjsgrupp, no daut Oafgoot, waut an wia toojedeelt worden.

²⁵To dee Tiet wia kjeen Kjennich en Israel; un een jiedra deed, waut hee fa rajcht hilt.