Read Plautdietsch (Low German) – De Bibel Rechta 3 Bible Online

Rechta 3 - Plautdietsch (Low German) – De Bibel bible

Rechta 3

¹Dit sent de Velkja waut de HAR em Launt äwaleet, om de Israeliten derch an oppe Proow to stalen.

²Wiels see von däm Kjrich jäajen Kanaan aul nuscht wisten, wull hee an doamet uk kjamfen lieren.

³Dit wieren de Volkjsgruppen: De fief Volkjsleida von de Filista un aule Kanaanita, dee von Sidon un de Hiwita waut aun de Libanon Boaj wonden, von däm Boajch Baal Hermon aun bat aun Hamat.

⁴Dise bleewen, om de Israeliten auftoproowen. De HAR wull seenen, auf see siene Jebooten jehorchen wudden, waut hee äare Vodasch derch Moses jejäft haud.

⁵De Israeliten wonden medden mank de Kanaanita, Hetita, Amorita, Perisita, Hiwita un Jebusita.

⁶See neemen dee äare Dajchta to Frues un jeewen de Junges von de Velkja äare Dajchta to Frues un deenden äare Jetta.

⁷De Israeliten deeden, waut däm HARN schlajcht jefoll, un vegauten däm HARN, äaren Gott, un deenden de Kanaanita äare Jetta, dän Baal un de Aschera.

⁸Dan brend däm HARN sien Oaja äwa Israel opp, un hee jeef an en de Jewault von Kuschan Rischatajim, däm Kjennich von Mesopotamien. Acht Joa worden see von Kuschan Rischatajim unjadrekjt.

⁹Dan schrieejen de Israeliten nom HARN om Help, un de HAR deed an eenen Rada beroopen: Otniel, Kenas sienen Sän, Kaleb sien jinjsta Brooda.

¹⁰Däm HARN sien Jeist kjeem opp am, un hee wort Rechta en Israel un jinkj toom Kaumf. Un de HAR jeef Kuschan Rischatajim, dän Kjennich von Mesopotamien, en siene Jewault, soo daut hee däm Kjennich von Mesopotamien trigjschlonen kunn.

¹¹Dan haud daut Launt 40 Joa Fräd. Un Otniel, Kenas sien Sän, storf.

¹²Oba de Israeliten deeden wada, waut däm HARN schlajcht jefoll. Doawäajen leet de HAR Eglon, dän Moabita Kjennich, äwa an Macht jewennen.

¹³Un Eglon stunt sikj toop met de Amonita un de Amalekita, un jinkj un besiejd de Israeliten un besad de Staut Jericho.

¹⁴Un de Israeliten deenden Eglon, däm Moabita Kjennich, 18 Joa.

¹⁵Dan schrieejen see nom HARN om Help, un de HAR beroopt an eenen Rada: Ehud, Gera sienen Sän, ut däm Staum Benjamin. Hee wia linkjsch. Un aus de Israeliten am doatoo bestemden, äare Aufgowen no däm Moabita Kjennich Eglon to brinjen,

¹⁶muak hee sikj een kortet, tweeschniedjet Schwieet un bunk sikj daut unja sien Kjleet aun siene rajchte Sied aun.

¹⁷Hee brocht Eglon, däm Moabita Kjennich, de Aufgowen. Eglon wia een sea fata Maun.

¹⁸Aus hee de Aufgowen aufjejäft haud, leet hee de Mana, waut dee doahan jedroacht hauden, trigjgonen.

¹⁹Hee selfst wonk om bie Gilgal bie de jeschnizte Steena un jinkj trigj no Eglon un leet am sajen: Ekj hab eene jeheeme Norecht fa die! Un Eglon säd to siene Deena: Got rut! Dan jinjen dee aula rut.

²⁰Un Ehud kjeem nenn no am. Hee oba saut en de kjeele Bowastow, waut fa am auleen bestemt wia. Ehud säd to am: Ekj hab fa die eene Norecht von Gott. Un hee stunt von sienem Stool opp.

²¹Ehud oba foot met de linkje Haunt no daut Schwieet opp siene rajchte Sied un spekjt am daut em Buck nenn.

²²Daut gaunze Schwieet, un soogoa uk noch de Jräp, veschwungen en sienem Buck, un sien Fat bedakjt daut Schwieet, wiels hee daut nich ut sienem Buck rutjetrocken haud.

²³Ehud oba jinkj derch de näakjste Stow rut. De Däaren to de Bowastow haud hee toojemoakt un veräajelt.

²⁴Aus hee dan rut jegonen wia, kjeemen däm Kjennich siene Deena un sagen, daut de Däa veschloten wia, un säden: Hee es veleicht em Stofkje opp siene Jeschaften jegonen.

²⁵Aus see ieescht lang jewacht hauden un kjeena de Däa von de Bowastow opmuak, neemen see dän Schlätel un schlooten op. Un dan lach äa Har doa doot oppe Flua.

²⁶Ehud oba haud sikj en dee Tiet fuatjebrocht, aus see doa jewacht hauden. Hee jinkj aun de jeschnizte Steena vebie un kjeem bat Seira.

²⁷Un aus hee doa aunkjeem, blosd hee met de Posaun opp daut Boajlaunt en Efraim. Un de Mana von Israel jinjen met am vom Boajch rauf un hee jinkj veropp.

²⁸Un hee säd to an: Komt mie schwind hinjaraun! De HAR haft june Fiend, de Moabita, en june Henj jejäft! Dan jinjen see met am met un besaden de Äwajenj äwa däm Jordan, waut no de Moabita jinjen, un leeten doa kjeenem äwa.

²⁹See schluagen aun däm Dach von de Moabita soo bie 10.000 Mana doot, aules stoakje Kjrieja; soo daut kjeena doavon kjeem.

³⁰Soo worden de Moabita to dee Tiet unja de Jewault von Israel jebrocht. Un daut Launt haud 80 Joa Fräd.

³¹Hinja Ehud kjeem Schamgar, Anat sien Sän. Dee schluach 600 Filista met eene Ossenpikj doot. Soo rad uk hee de Israeliten von äare Fiend.