Read Plautdietsch (Low German) – De Bibel Rechta 7 Bible Online

Rechta 7 - Plautdietsch (Low German) – De Bibel bible

Rechta 7

¹Gideon, däm see uk Jerubaal nanden, muak sikj tiedich opp met sien gaunzet Kjrichshäa, waut bie am wia, un see loagaden bie de Harod Kjwal. Soo daut hee de Midianita äa Loaga von doa nom Nuaden han bie däm Boajch More em Tol haud.

²De HAR säd to Gideon: Dien Häa es too groot! Soo kaun ekj de Midianita nich en june Henj jäwen. Sest woaren de Israeliten sikj puchen un sajen: Wie haben ons met onse ieejne Krauft jerat!

³Doawäajen lot nu derch daut gaunze Loaga bekaunt jäwen: Wäa Angst haft un vezoacht es, dee kaun trigjgonen. Soo deed Gideon dee derchsäwen. Un dan wongen 22.000 om, soo daut mau 10.000 bie Gideon bleewen.

⁴Un de HAR säd to Gideon: Dien Häa es noch emma too groot. Brinj de Mana rauf no de Kjwal, dort well ekj dee selfst utwälen. Ekj woa die sajen, wäa metgonen saul un wäa nich.

⁵Dan fieed Gideon de Mana rauf nom Wota. Un de HAR säd to Gideon: Wäa met siene Tung Wota lekjt, soo aus een Hunt lekjt, däm stal aun eene Sied han; un wäa sikj hankjneet om to drinkjen, däm stal aun de aundre Sied han.

⁶Dan wia daut eene Zol von 300 Mana, waut met de Tung Wota ut de Haunt jelekjt hauden. Aul daut äwaje Volkj haud sikj opp Kjneeen jelajcht un jedrunken.

⁷Dan säd de HAR to Gideon: Derch de 300 Mana, waut daut Wota met de Tung jelekjt haben, well ekj junt raden un de Midianita en diene Jewault jäwen. Daut äwaje Volkj lot aula no Hus gonen.

⁸De 300 utjewälde Mana neemen dän Väarot un de Posaunen von de aundre, un de äwaje Israeliten leet hee trigjgonen, jieda eenem no sien Hus. Oba de 300 Mana hilt hee bie sikj. Un de Midianita äa Häa lach unjen ver am opp daut jlikje Flekj.

⁹En dee Nacht säd de HAR to Gideon: Sto opp un go rauf no daut Loaga; ekj hab daut en diene Henj jejäft!

¹⁰Wan du oba Angst hast, dan go ieescht met dienen Deena Pura toop rauf nom Loaga,

¹¹un horch die daut aun, waut see dort eena toom aundren räden. Daut woat die Moot moaken, an auntojriepen. Dan jinjen Gideon un sien Deena Pura rauf un schlikjten sikj bat aun de butaschte Loagawajchta naun.

¹²Un de Midianita un Amalekita un aul dee ut däm Oosten, waut sikj doa jeloagat hauden, bedakjten daut jlikje Flekj aus een Schwoarm Graushoppa, un äare Kameelen jinjen nich to talen wäajen de groote Aunzol, soo aus Saunt aum Mäaresstraunt.

¹³Aus Gideon sikj doa aun de Wajchta naun schlikjt, vetald jrod eena däm aundren eenen Droom un säd: Horch, mie dreemd: Een Bulkje Joaschtbroot rold vom Boajch rauf en ons Loaga nenn, un stad aun ons Zelt, schmeet daut om un dreid daut äwakopp, soo daut daut Zelt plaut lach.

¹⁴Dan säd de aundra: Daut es nuscht aundret aus daut Schwieet von Gideon, däm Israelit, Joasch sien Sän. Gott haft de Midianita met daut gaunze Loaga en siene Jewault jejäft.

¹⁵Aus Gideon disen Droom un waut dee meend jehieet haud, kjneed hee sikj ver Gott dol toom aunbäden. Dan kjeem hee trigj no daut israelitische Loaga un säd: Moakt junt opp! De HAR haft de Midianita äa Loaga en june Henj jejäft.

¹⁶Un hee deeld de 300 Mana en dree Gruppen un jeef jieda eenem eene Posaun un eenen Fiastock enne Haunt, un eene ladje Kruck, om dän brennenden Fiastock to bedakjen.

¹⁷Dan säd hee to an: Kjikjt no mie un doot daut krakjt soo; wan ekj aun däm Raunt von daut Loaga kom, dan kjikjt jeneiw waut ekj doonen woa, un doot daut uk soo!

¹⁸Wan ekj, un dee waut bie mie sent, met de Posaunen blosen, dan doot uk runtom daut Loaga met de Posaunen blosen, un roopt: Fa dän HARN un fa Gideon!

¹⁹Medden en de Nacht kjeem Gideon met siene 100 Mana bat aun daut Loaga. De Midianita hauden jrod de Wajchta jewakjselt. Dan blosden de Mana rom Gideon met de Posaunen un schluagen de Krucken, waut see enne Henj hauden, entwei.

²⁰Dan blosden uk aule dree Aufdeelungen met Posaunen un schluagen de Krucken entwei. See hilden met de linkje Haunt dän Fiastock un met de rajchte Haunt de Posaun, om to blosen, un roopten: Hia es daut Schwieet fa däm HARN un fa Gideon!

²¹Doabie stunden see runtom daut Loaga, jieda eena opp sienen Plauz. Em Loaga oba rand aules derch eenaunda, see schrieejen un vesochten fuat to komen.

²²Un wäarent de 300 Mana met de Posaunen blosden, leet de HAR en daut Loaga soone Vewerrunk oppkomen, daut eena jäajen däm aundren kjamft. Un daut gaunze Häa jeef sikj oppe Flucht en de Rechtunk no Bet Schitta, Zereda, un bat aun de Jrens von Abel Mehola bie Tabat.

²³Dan worden de Mana von de Stam Naftali, Asser un Manasse toopjeroopt, om de Midianita to vefoljen.

²⁴Un Gideon schekjt uk Bootschofta opp daut Boajlaunt en Efraim un leet doa sajen: Komt rauf de Midianita entjäajen un nämt an de Wotastäden wajch bat Bet Bara un uk dän Jordan! Dan vesaumelden sikj aule Mana vom Staum Efraim, un besaden de Wotastäden bat aun Bet Bara un uk dän Jordan.

²⁵See jreepen uk twee Volkjsleida von de Midianita, Oreb un Seeb. Dän Oreb schluagen see aun däm Orebsteen doot, un dän Seeb, bie däm Wienkjala Seeb. Dan vefoljden see de Midianita. De aufjehakte Kjap von Oreb un Seeb brochten see no Gideon äwa däm Jordan.