Read Plautdietsch (Low German) – De Bibel Rechta 8 Bible Online

Rechta 8 - Plautdietsch (Low German) – De Bibel bible

Rechta 8

¹De Mana von Efraim säden to Gideon: Wuarom deetst du ons daut aun, daut du ons nich roopst, aus du toom Kaumf jäajen de Midianita jinjst? Un see zankten sikj jrintlich met am.

²Hee säd oba to an: Waut hab ekj nu jedonen, waut met junt to vejlikjen es? Es nich daut noläsen von Efraim bäta aus de gaunze Wienarnt von Abieser?

³Gott haft de Midianita äare Volkjsleida, Oreb un Seeb en june Henj jejäft. Waut hab ekj doonen kunt, em vejlikj met daut waut jie jedonen haben? Aus hee daut säd, leet äa Oaja äwa am no.

⁴Gideon wia met de 300 Mana, waut bie am wieren, äwa däm Jordan jekomen. Un wiels see von de Vefoljunk gaunz meed wieren,

⁵säd hee to de Mana von de Staut Sukkot: Jäft miene Mana, waut mie oppe Haken foljen, Broot, wiels see sent gaunz meed, un ekj mott de Midianita Kjennichs, Sebach un Zalmunna, hinjaraun joagen.

⁶Oba de väaschte Mana von Sukkot säden: Sent Sebach un Zalmunna äare Fusten aul en diene Henj, daut wie diene Truppen Broot jäwen sellen?

⁷Dan säd Gideon: Goot, wan de HAR Sebach un Zalmunna en miene Jewault jeft, well ekj jun Fleesch met Spekjasch ut de Wiltnis un met Spekjapitschen vedraschen!

⁸Un hee jinkj von dort nopp no Pnuel un fruach uk dort no Broot, oba de Mana von de Staut auntwuaden am krakjt soo aus de Mana von Sukkot.

⁹Un hee säd uk to de Lied von Pnuel: Wan ekj heel trigjkom, well ekj disen Schutzplauz dolrieten!

¹⁰Sebach un Zalmunna oba hauden sikj met äa Häa von de Menschen vom Oosten en Karkor jeloagat. 15.000 Mana wieren an von äa gaunzet Häa noch jebläwen, un 120.000 wieren en dän Kaumf to dood jekomen.

¹¹Un Gideon nodad sikj an opp dän Wajch von dee, dee en Zelten wonden, waut aun de oostne Kaunt Nobach un Jogboha jeit. Un wiels de Midianita jleewden en Sechaheit to sennen, äwafoll hee dee gaunz onen daut see doamet jeräakjent hauden.

¹²Un Sebach un Zalmunna vesochten wajchtokomen; oba hee vefoljd an un neem de beid Midianita Kjennichs faust, Sebach un Zalmunna, un vesprenjd daut gaunze Häa daut see utenaunda randen.

¹³Aus Gideon, Joasch sien Sän, vom Kaumf trigjkjeem un de Stiej von Heres raufjinkj,

¹⁴jreep hee sikj eenen Jung von de Staut Sukkot un forscht däm ut. Dee schreef am de väaschte Mana un de Leida von de Staut opp, aules toop 77 Nomes.

¹⁵Un aus hee no Sukkot kjeem, säd hee to de Mana von de Staut: Kjikjt, hia sent Sebach un Zalmunna, wuawäajen jie mie vespotten deeden, un säden: Hast du Sebach un Zalmunna äare Fusten aul en diene Henj, daut wie diene Lied, waut meed sent, Broot jäwen sellen?

¹⁶Un hee jreep sikj de väaschte Mana von de Staut un hold spekjaje Stakja ut de Wiltnis un vedrascht de Mana von Sukkot doamet.

¹⁷Un dän Schutzplauz von Pnuel leet hee dolrieten un de Mana von de Staut ombrinjen.

¹⁸Gideon fruach Sebach un Zalmunna: Wäm likjenden de Mana, waut jie opp dän Boajch Tabor dootjemoakt haben? See auntwuaden: Dee likjenden krakjt die, an leet daut aula no Kjennichsäns.

¹⁹Un hee säd: Daut sent miene Breeda, miene Mutta äare Säns, jewast. Soo secha aus de HAR läft: Wan jie dee läwen jeloten hauden, wudd ekj junt nich doot moaken.

²⁰Un hee säd to sienen ieeschtjebuarnen Sän Jeter: Sto opp un schlo dee doot! Oba de Jung trock sien Schwieet nich ut de Scheed; hee fercht sikj, wiels hee noch soo junk wia.

²¹Sebach un Zalmunna oba säden: Moak du die opp un doo daut selfst! Wiels soo aus de Maun es, soo es uk siene Krauft! Dan stunt Gideon opp un schluach Sebach un Zalmunna doot. Un hee neem sikj de goldne Haulfmonen, waut aun de Halsa von äare Kameelen hongen.

²²Dan säden de Mana von Israel to Gideon: Sie du Kjennich äwa ons, du un dien Sän un dien Grootsän no die! Wiels du ons ut de Midianita äare Jewault jerat hast.

²³Oba Gideon säd to an: Ekj well nich Kjennich äwa junt sennen, un mien Sän saul uk nich Kjennich äwa junt sennen; de HAR saul äwa junt rejieren!

²⁴Gideon oba säd to an: Eent velang ekj von junt: Jäft mie de Uarinj, waut jie em Kjrich jesaumelt haben! Wiels de besiejde Fiend Ismaeliten wieren, hauden dee goldne Uarinj jedroacht.

²⁵See auntwuaden: Dee jäw wie die jieren. Un see spreeden een Äwatrakjsel ut, un jieda eena schmeet siene enjesaumelde Rinj doanopp.

²⁶Un daut Golt von de Rinj, waut hee jefoddat haud, wuach meist 20 Kilo, onen de kjliene Monen un Uarinj un Kjennichskjleeda, waut de Midianita äare Kjennichs jedroacht hauden, un dän Schmuck aun de Halsa von äare Kameelen.

²⁷Un Gideon muak von daut Golt eenen Efod un stald däm en siene Heimatstaut Ofra opp. Un gaunz Israel kjeem dort han, un bäd daut Bilt aun un wort däm HARN soo aus daut ontru. Un daut wia, waut Gideon un siene Famielje toom Schoden wia.

²⁸Soo worden de Midianita jedwungen sikj ver de Israeliten to bekjen; un see kunnen sikj nich mea jäajen Israel erhäwen, soolang aus Gideon läwd. Un daut Launt haud 40 Joa Fräd.

²⁹Un Jerubaal, Joasch sien Sän, jinkj trigj no sien Hus un wond doa.

³⁰Un hee haud 70 Säns, wiels hee väl Frues haud.

³¹Uk siene Näbenfru, waut hee en Sichem haud, brocht am eenen Sän to Welt; däm nand hee Abimelech.

³²Un Gideon, Joasch sien Sän, storf aus hee gaunz oolt wia un wort en de Graufstäd von sienen Voda Joasch en Ofra, opp daut Launt von Abieser siene Volkjsgrupp, begroft.

³³Aus Gideon ieescht jestorwen wia, randen de Israeliten vom nieen de Baal Jetta hinjaraun un muaken sikj dän Baal Berit to äaren Gott,

³⁴un vegauten däm HARN, äaren Gott, waut an ut de Jewault von aul äare Fiend runtom jerat haud.

³⁵Uk Gideon siene Nokomen betolden see de groote Doten, waut Gideon fa Israel jedonen haud, met Ondankboakjeit.