Read Plautdietsch (Low German) – De Bibel 2. Johanes 1 Bible Online

2. Johanes 1 - Plautdietsch (Low German) – De Bibel bible

2. Johanes 1

¹De Eltesta schrift dit aun de jewälde Fru un äare Kjinja, de Jemeent. Ekj sie junt derch Jesus Christus goot. Dee, dee Ensecht haben en de Woarheit, dee sent aundre Menschen uk goot.

²Daut es wiels de Woarheit en ons es, un emma bliewen woat.

³Jnod, Metleet un Fräd von Gott dän Voda un sienen Sän Jesus Christus muchten met ons bliewen en Woarheit un en Leew!

⁴Ekj wia sea froo, daut ekj eenje von diene Kjinja funk, dee en de Woarheit waut Jesus Christus es läwen, gaunz no däm Jeboot, daut wie vom Voda jekjräajen haben.

⁵Un nu saj ekj die, jeieede Fru, well wie ons unjarenaunda goot sennen. Ekj schriew die kjeen nieet Jeboot. Daut es daut oole Jeboot, daut wie von Aunfank aun jehaut haben.

⁶Daut es woo wie ons goot sent, wie hoolen siene Jebooten. Daut es daut Jeboot wont jie von Aunfank aun jehieet haben un wuano jie läwen sellen.

⁷Doa sent väle Veleida enne Welt nenn jegonen, dee nich bekjanen, daut Jesus Christus aus Mensch met Fleesch un Bloot jekomen es. Soo wiest sikj de Veleida un Jäajenchrist.

⁸Paust opp daut jie daut nich velieren, wuafäa wie [1] jeoabeit haben. Jie sellen junen vollen Loon kjrieen.

⁹Wäa ut Christus siene Lia rutjeit un nich doabennen blift, dee haft Gott nich. Wäa en Christus siene Lia blift, dee haft beid, dän Voda uk dän Sän.

¹⁰Wan wäa no junt kjemt, dee dise Lia nich brinjt, dän nämt nich em Hus nenn un bejreest dän uk nich.

¹¹Wäa soone bejreest, nemt Poat aun äare beese Woakjen.

¹²Ekj hab noch väl, daut ekj junt schriewen mucht, oba ekj kom leewa nich met Tint un Papia. Ekj räakjen hantokomen un direkjt met junt to räden, un dan es onse Freid dobbelt groot.

¹³Diene jewälde Sesta äare Kjinja bestalen die to jreessen.