Read Plautdietsch (Low German) – De Bibel 3. Johanes 1 Bible Online

3. Johanes 1 - Plautdietsch (Low German) – De Bibel bible

3. Johanes 1

¹De Eltesta, aun dän leewen Gajus, dän ekj werkjlich goot sie.

²Mien leewa Frint, ekj bäd doarom, daut et die en aules mucht goot gonen un daut du muchst jesunt sennen, soo aus die daut ennalich goot jeit.

³Ekj wia sea froo aus Breeda kjeemen un säden, daut du opprechtich läfst un die en dienem Waundel aun de Woarheit helst.

⁴Ekj hab kjeene jratre Freid aus to hieren, daut miene Kjinja no de Woarheit en Christus läwen.

⁵Leewa Frint, du best doarenn tru, waut du fa de Breeda deist, besondasch noch wan daut framde sent.

⁶Dee räden hia en de Jemeent von woo gootmeenent du best. Un du deist goot, de Breeda soo opp dän Wajch to halpen, daut Gott doaraun eenen Jefaulen haft.

⁷Wiels dee sent opp de Reis om de Bootschoft von Christus wieda to brinjen, un doafäa nämen see nuscht von dee waut nich jleewen.

⁸Doawäajen sull wie soone Mana unjastetten, daut wie doaderch metoabeiden, de Woarheit to vebreeden.

⁹Ekj hab waut aun de Jemeent jeschräwen, oba Diotrefes, dee jieren bowenaun stonen well, well met ons nuscht to doonen haben.

¹⁰Wan ekj kom, woa ekj am daut väahoolen, waut hee deit. Hee rät schlajcht von ons un beschulcht ons faulsch. Un hee es doamet noch nich tofräd. Hee selfst nemt de Breeda nich opp, un hindat aundre, dee daut muchten, un stat dee ut de Jemeent.

¹¹Leewa Brooda, moak daut nich no, waut schlajcht es. Nemm du daut goode toom Biespel. Wäa goodet deit es von Gott. Wäa schlajchtet deit haft Gott nich jeseenen.

¹²Von Demetrius rät aulemaun goot, un Gott haft sikj to am bekjant. Wie räden uk goot von am, un jie weeten, daut wie fa de Woarheit stonen.

¹³Ekj haud die noch väl to schriewen, oba ekj wudd leewa nich met Tint un Fada schriewen.

¹⁴Ekj räakjen die boolt to seenen, un dan woa wie ons aunkjikjen un doaräwa räden.

¹⁵Ekj wensch die Fräd! Diene Frind bestalen die to jreessen. Jrees dee Frind doa aula, eenen jiedren met sienem Nomen.